[61] 2 Pita 3

¹Oi kemudou na wekaqu, oqo sai karua ni noqu i vola yani vei kemudou, (nai vola ruarua oqo na noqu i vola ni veivakayadrati mo dou dau nanuma tiko).

²Ka mo dou vakananuma na vosa era sa vosataka e liu na parofita yalosavasava, kei na neitou veivakaroti tiko, nai apositolo ni noda Turaga ka noda i Vakabula,

³Mo dou kila tiko: ni ra na lako mai na dauveiveretaki ca ena i otioti ni gauna oqo, era na vakaivalavalataki ira ena nodra gagadre ca,

⁴Era dau tukuna, " e vei na vosa yalayala ni na lako mai? E ra sa mate yani na qase, e sega ni dua na veisau e yaco ka tekivu mai nai vakatekivu."

⁵Era sega ni vakasamataka: ni vosa ni Kalou e tekivu kina na lomalagi mai nai vakatekivu, ka tawasea talega na vanua mamaca mai na wai, ka sega ni yali na wai mai vuravura,

⁶E a vakarusai vuravura, ena kena luvuci ena waluvu mai na kaukauwa ni wai.

⁷Ia o lomalagi kei na vuravura sa tu e daidai sa maroroi tu ga ena vosa vata o ya, sa maroroi ki na bukawaqa me yacova na siga ni lewa, kei na nodra vakarusai laivi na tamata i valavala ca.

⁸Ia, oi kemudou na wekaqu lomani, mo dou kua sara ni guilecava e dua naka oqo, vua na Kalou, e dua na siga e tautauvata vua ni dua na udolu na yabaki, kei na yabaki e dua na udolu, e tautauvata ga vua ni dua na siga

⁹E sega ni rawa ni daro na nona vosa yalayala na Turaga, me vaka era nanuma tiko eso, ia sa vosoti keda tikoga vakamalua ni sa sega ni vinakata tiko meda rusa, me da veivutuni taucoko ga na kai vuravura.

¹⁰Ia na siga ni Turaga ena lako mai me vaka na daubutako ena bogi, ena vakarusai na maliwa lala kei na veika e tevuki tu ena vei lomalagi, ena domo levu ni rorogo ni kurukuru ena waicala talega na veika ka tauri vuravura tu me bula kina; ena kama yavu o vuravura kei na ka kecega sa tu kina.

¹¹O koya oqo, ni dou sa raica na kena vaqeavutaki o vuravura ena dua ga na loma ni gauna lekaleka, nai valavala cava dou na bula kina mo dou maroroya kina na savasava vakalou.

¹²Ni dou sa dauwaraka ka daugadreva sara na kena yaco mai na siga ni Turaga, ena yali kina o lomalagi ni sa kama, ena waicala talega na veika e tauri vuravura tu ni sa vakamai?

¹³Ia kivei keda; me vaka nona vosa ni yalayala, eda sa waraka na lomalagi vou kei na vuravura vou, ni ra na tiko kina nai valavala dodonu.

¹⁴O koya, oqo, oi kemudou na wekaqu, ni dou sa vakanuinuitaka tiko na veika oqo, dou gumatua Me raici kemudou o koya, ni dou maroroi kemudou tiko mai na dukadukali kei na ka vakasisila ni vuravura.

¹⁵Ka mo dou kila na vosota vakadede ni noda Turaga eda sa vakabulai kina “ me vaka na nona vosota talega na wekada o Paula, ena nona volavola mai ka tukuna tiko kina na veika e sotava, e vosota ena vuku vaKalou e soli vua.

¹⁶Me vaka talega ena nonai vola kecega, ni sa tukuna na veika oqo a sa tu kina na ka eso e dredre me kilai, ia o ira era sa sega so ni vuku ka sega ni lomadei, era sa kauta vakatani me vaka talega kina nai Vola Tabu kece, me ra na mate kina.

¹⁷O koya oqo, oi kemudou na wekaqu, ni dou sa kila vinaka mai liu, dou qarauni kemudou vinaka ena nomudou tudei, ni rawa mo dou rawai ena nodra veitemaki nai valavala ca;

¹⁸Ia dou tubu cake ena loloma kei na kila sara na noda Turaga o Jisu Karisito nai vakabula. Me soli vua na rokovi ena gauna oqo ka me sega ni mudu. Emeni.