[62] 1 Joni 1

¹Na ka e se tu sara mai ena i vakatekivu, o koya keitou a rogoca, ka keitou a raica ena matai keitou, o koya keitou a vakaraica matua, ka tara sara na ligai keitou, sa i koya na vosa ni bula “

²Na bula e vakaraitaki koya mai, ka keitou sa raica, ka kena i vakadinadina, ka tukuna vei kemudou na bula e sega ni mudu, ka dau tiko vata kei tamana sa mai vakatakilai Koya vei keda.

³O koya keitou a raica, ka rogoca ka tukuna vei kemudou, ni dodonu mo dou mai veitokani kei keitou; na neitou veitokani, keitou veitokani dina kei tamada kei na luvena o Jisu Karisito.

⁴Na ka oqo keitou sa volavola yani kina me rawa ni vakalevutaka na nomudou reki.

⁵Oqo nai tukutuku keitou rogoca mai vei koya ka tukuna vei kemudou, ni sa rarama na Kalou ka sa sega sara vua na butobuto.

⁶Kevaka eda tukuna tiko ni da veitokani kei koya, ka bula vakabutobuto tiko, eda sa lasu ga ka sega ni bulataka tiko na dina.

⁷Ia kevaka eda bula tiko ena bula ni rarama, ni sa rarama o Koya, ka da veitokani kei ira na wekada, na dra i Jisu Karisito na luvena sa vakasavasavataki keda oti mai na noda i valavala ca.

⁸Kevaka eda tukuna ni sega na noda i valavala ca, eda vakaisini keda tikoga, a sa sega ni tu vei keda na dina.

⁹Kevaka eda sa vakatusa na noda i valavala ca, sa yalodina ka yalododonu o Koya me vosota ka bokoca na noda i valavala ca, ka vakasavasavataki keda mai na ka kecega sa sega ni dodonu.

¹⁰Kevaka eda tukuna tiko ni da sega ni valavala ca, eda sa lasu tiko vua, ka sa sega ni tu vei keda na Nona vosa.