[62] 1 Joni 2

¹Vei kemudou na luvequ lomani, au sa vola vei kemudou na veika oqo, me kua kina ni dou i valavala ca. Kevaka sa valavala ca e dua, sa dua na noda dau “ tataro vei tamada, o Jisu Karisito na yalododonu.

²O Koya vakataki Koya sa mai buluta na noda i valavala ca, ka sega ni noda ga, ia o ira kece talega na lewe i vuravura.

³Ena ka oqo eda sa kila kina ni da sa kilai Koya, kevaka eda muria nona i vunau.

⁴Ke dua e tukuna, "Au kilai Koya," ka sega ni muria na nona i vunau, e tamata lasulasu, ka sega ni tu vua na dina.

⁵Ia o koya sa muria na nona vosa, sa tu vakaidina vua na loloma vakalou. Ena ka oqo eda sa kila kina ni da sa tuvata kei Koya.

⁶O koya e tukuna ni rau sa tuvata kei Koya, e dodonu me vakaivalavalataki koya me vaka na Nona i valavala.

⁷Oi kemudou na wekaqu, au sega ni vola vei kemudou e dua na vunau vou, ia nai vunau makawa ga mai liu dou a dau rogoca. Na i vunau makawa oqo na vosa dou a rogoca mai nai vakatekivu.

⁸Me'u tukuna tale, e dua nai vunau vou au vola vei kemudou, na ka oqo sa dina vua, vei kemudou talega, baleta na butobuto sa yali yani, ka sa cilavi keda tu oqo, o koya na rarama dina.

⁹O koya e tukuna ni sa tu vua na rarama, ka qai cata tiko na wekana, o koya e se tu vinaka sara tuga ena butobuto me yacova mai oqo.

¹⁰O koya sa lomana na wekana sa tuvata kei na rarama, ena sega ni rawa ni dua na ka ni veivakaleqai mena vakamalumalumutaki koya.

¹¹Ia o koya e cata na wekana e tu sara ga e na butobuto, ka bula lako ena butobuto, ena sega ni kila na vanua e lakova tiko, baleta na butobuto sa vaka matabokotaka na matana.

¹²Au vola yani oqo vei kemudou, na luvequ, baleta na nomudou i valavala ca sa bokoci ena vuku ni yacana.

¹³Au vola yani oqo vei kemudou, na qase, baleta ni dou sa kilai Koya ka bula mai nai vakatekivu. Au vola yani oqo vei kemudou na cauravou, ni dou sa vakamalumalumutaka na vuni ca. Au sa vola yani oqo vei kemudou, na gone lalai, ni dou sa kilai tamada.

¹⁴Au vola yani oqo, vei kemudou na qase, ni dou sa kila o koya ka bula mai nai vakatekivu. Au vola yani oqo vei kemudou na cauravou, ni dou sa kaukauwa, ka tu vei kemudou na vosa ni Kalou, ka dou rawa ni vakamalumalutaka na kaukauwa ni vuni ca.

¹⁵Dou kakua ni lomani vuravura, se na veika sa vaka vuravura, kevaka e dua e lomani vuravura, na loloma i tamada sa sega ni tiko vua.

¹⁶Na veika kece etu e vuravura “ na gagadre ca ni yago, na gagadre ca ni mata, kei na bula dokadoka “ na ka oqo e sega ni mai vei tamada, ia sa mai vuravura ga.

¹⁷O vuravura sa tekivu me yali tiko yani, kei na kena gagadre ca taucoko; ia o koya ga sa cakava na loma ni Kalou ena tudei me sega ni mudu.

¹⁸Oi kemudou na luvequ, sai otioti ni gauna oqo; me vaka dou sa rogoca ni sa lako tiko mai na meca i Karisito, me vaka ni sa levu sara tuga oqo na meca i Karisito, ka me rawa ni da kila kina, ni sai vakataotioti ni gauna oqo.

¹⁹Era lako tani yani mai vei keda, ia era sega ga ni wili vei keda, kevaka mera a wili vei keda kera a tikoga kei keda, ia nira sa lako tani era na vakaraitaki ira ga mai, ni sega sara ga ni dua vei keda me tuvata kei ira.

²⁰Ia dou sa lumuti oti tu, mai vua na yalosavasava, mo dou kila kina na ka kecega.

²¹Au sega ni vola yani oqo vei kemudou baleta ni dou sega ni kila na dina, ia baleta ga ni dou sa kila tiko ka sega ni dua e rawa ni lasu ni sa tiko na dina.

²²O cei na lasulasu ia, o koya ga sa cakitaka ni o Jisu e Karisito? O koya na meca i Karisito, e cakitaka na tamada kei na luvena.

²³O koya e cakitaka na luvena, sa sega ni tu vua o Tamada; o koya e vakatusa na luvena, sa tu vua o Tamana.

²⁴O koya oqo me tudei ena yalomudou, na ka dou a rogoca mai na vakatekivu kevaka me sa tiko vei kemudou na ka dou a rogoca mai nai vakatekivu, na luvena kei tamana e rau na tu vakaidina vei kemudou.

²⁵Kei na ka sa yalayala oti tu kina o koya me solia vei keda “ na bula sega ni mudu.

²⁶Na veika oqo au sa volavola kina vei kemudou, ena vukudra na dauveivakaisini vei kemudou.

²⁷Ia nai lumu dou sa lumuti tu kina mai vei koya, sa tu qori vei kemudou, e sega tale ni qai yaga me dua e vakavulici kemudou; ia na veilumuti vata ga ka vakavulici kemudou mo dou kila kina na veika kecega, e dina taucoko, ka sega ni ka lasu, me vaka ga nonai vakavuvuli vei kemudou, mo dou tu ga vua.

²⁸Oqo, vei kemudou na luvequ, mo dou tu dei vua, ena gauna ena rairai mai kina, meda sa na vakarau tu ka me kakua na madua vei Koya ena nona lako mai.

²⁹Kevaka dou kila ni sa yalododonu o koya, mo dou kila ni o ira kece era bulataka na yalododonu era vakasucumi vou mai vua.