[62] 1 Joni 3

¹Raica na kena levu ni loloma sa vakayacori vei keda mai vei tamada, meda vakatokai kina meda luve ni Kalou! O koya oqo era sega ni kilai keda kina o vuravura, ni ra sega ni kilai Koya.

²Kemudou na luvequ, eda sa luve ni Kalou; e se bera ni vakatakilai mai eda na vakaevei ena siga mai muri, ia eda sa kila tikoga ena gauna sa vakaraitaki Koya mai kina, eda na qai tautauvata kei Koya, ka ni da sa qai raici Koya ena matada dina.

³O koya sa tu vua nai nuinui oqo ena vakasavasavataki koya, me vaka ni sa savasava sara tu ga o koya.

⁴O koya yadua sa i valavala ca sa talaidredre kina i vakavuvuli dina, ni sa valavala ca na talaidredre ki na i vakavuvuli dina.

⁵Ni dou sa kila ni sa vakatakilai Koya o Koya, ena nona mai bokoca na noda i valavala ca, ka e sega tu vua na i valavala ca.

⁶O koya e tu vata kei Koya ena sega ni valavala ca. O koya e valavala ca e se bera ni rogoci Koya se kilai Koya.

⁷Oi kemudou na luvequ, me kua ni dua me dabui kemudou. O koya sa i valavala dodonu, sa dodonu ga, me vaka ga na nona valavala dodonu.

⁸O koya sai valavala ca, sa luve ni tevoro, ni sai valavala ca na tevoro mai nai vakatekivu. Oqo na vuna e lako mai kina na luve ni Kalou, me mai vakarusa na cakacaka ni tevoro.

⁹O koya yadua e sucu vou mai vua na Kalou e sega vei koya nai valavala ca, baleta ni sa sucu vou mai vua na Kalou.

¹⁰Na ka oqo ena vakatakilai Koya ga na luve ni Kalou kei na luve ni tevoro; ka sa sega ni luve ni Kalou o koya e sega ni valavala dodonu, kei koya talega e sega ni lomana na wekana.

¹¹Oqo nai tukutuku dou a rogoca mai nai vakatekivu me da veilomani vakaveiwekani.

¹²Ka me kua ni vakataki Keni, o koya sa yaloca vua na tacina ka oti qai vakamatei koya. A cava e labati koya kina? Baleta ni valavala vakatani, o tuakana e valavala dodonu.

¹³Dou kakua ni kurabui, na wekaqu, kevaka e cati kemudou o vuravura.

¹⁴Ka me da kila ni da sa vakaleleci tani mai na mate kina bula, me da lomani ira na veiwekani ka o koya e sega ni lomana na wekana sa tiko ga ena mate.

¹⁵O koya e cata na wekana sa daulaba, ka mo dou kila, o ira na daulaba e sega ni nodra na bula e sega ni mudu.

¹⁶Ena ka oqo eda kila dina kina na loloma, ka ni solia na Nona bula ena vukuda. Ka sa dodonu vaka kina meda solia na noda bula ena vukudra na wekada.

¹⁷Ia o koya sa tu vua nai yau ni vuravura oqo, ka raica na wekana ni vakaloloma tu, ka sega mada ga ni bau kauwaitaki koya, e rawa vaka cava me tukuna ni tiko vua na loloma ni Kalou?

¹⁸Oi kemudou na luvequ, meda kua ni vakaraitaka na loloma ena vosa walega se na yameda, ia ena cakacaka kei na dina.

¹⁹Ena ka oqo eda sa kila kina ni sa tu vei keda na dina, ka vakadinadinataka na yaloda.

²⁰Kevaka e beitaki na yaloda, na Kalou e levu cake, mai na yaloda, ka kila na ka kecega.

²¹Kemudou na luvequ, kevaka e sega ni beitaki na yaloda, eda sa tu vakarau vua na Kalou.

²²Na ka eda kerea vua ena solia vei keda baleta ni da maroroya na Nona i vakaro, ka cakava na ka sa vinakata o Koya.

²³Oqo na nona i vakaro: meda vakabauta na yaca ni luvena o Jisu Karisito ka veilomani, vakalevu sara, me vaka na Nona i vakaro vei keda.

²⁴O koya sa muria na Nonai vakaro sa tudei vei Koya, o koya talega ena tu vua. Ena ka oqo eda sa kila kina ni sa tu vei keda o Koya, ni sa tiko vata kei keda na Nona Yalo Tabu.