[62] 1 Joni 4

¹Vei kemudou na luvequ, dou kakua ni vakabauta na yalo kecega, ia dou vakatovolei ira na yalo oqori, se ra yalo mai vua na Kalou se sega; baleta ni levu na parofita vakailasu era sa cowiri tu oqo e vuravura.

²Ena ka oqo, dou na kila kina na yalo sa mai vua na Kalou; na yalo kece e vakatusa ni o Jisu Karisito sa yaco me mai tamata, na yalo oqo sa mai vua na Kalou.

³Kei na yalo kece e sega ni vakatusa, ni o Jisu Karisito e sega ni bulataka na bula vakatamata na yalo oqo, e sega ni mai vua na Kalou. Oqo sara ga na yalo ni meca i Karisito, o koya dou sa rogoca ni na lako mai, a sa tu sara ga oqo vei keda e daidai.

⁴Oi kemudou sa nona na Kalou, na luvequ, dou sa vakamalumalumutaki ira, baleta ni sa levu o Koya sa tiko vei kemudou, ka lailai o koya sa tiko e vuravura.

⁵O ira era sa tamata vakavuravura. Ka ra na vosataka tikoga na veika vakavuravura, o vuravura ena vakarogoci ira,

⁶Oi kemudou na luvequ sa nona na Kalou. O koya e kila na Kalou ena rogoci keda; o koya e sega ni nona na Kalou ena sega ni rogoci keda. Ena ka oqo eda na kila kina na yalo ni dina, kei na yalo ni veivakacalai.

⁷Kemudou na luvequ, me da veilomani vakalevu, ni loloma sa mai vua na Kalou; o koya sa dauloloma sa vakasucumi vou mai vua na Kalou, ka sa kila na Kalou.

⁸O koya e sega ni loloma e sega ni kila na Kalou, ka ni sa loloma na Kalou.

⁹Ena ka oqo sa vakaraitaka mai kina vei keda na loloma ni Kalou, ni sa solia mai ki vuravura na luvena e dua bau ga, ka meda rawa ni bula ena vukuna.

¹⁰Sai koya oqo na loloma, e sega ni noda lomana na Kalou, ia ena nona lomani keda, ka tala mai kina na luvena me mai buluta na noda i valavala ca.

¹¹Kemudou na luvequ, kevaka sa lomani keda tu vaka oqo na Kalou, sa dodonu vakalevu cake sara meda veilomani vaka i keda.

¹²E sega ni se bau dua me raica na Kalou ena dua na gauna. Kevaka eda veilomani vaka i keda, na Kalou ena tiko kei keda, kei na nona loloma ena tudei vei keda.

¹³Ena ka oqo eda sa kila kina ni da sa tuvata kei Koya, ka sa tu vei keda o Koya, baleta ni sa sovaraka o koya ki yaloda na yalona.

¹⁴Ka eda sa raica ka tusanaka ni sa tala mai o tamada na luvena mei vakabula kei vuravura.

¹⁵O koya yadua e vakatusa ni o Jisu e luve ni Kalou, ka e vakaraitaka ni Kalou e tiko vua, o koya talega e tu vata kei na Kalou.

¹⁶Ka eda rawa ni kila ka vakabauta na nona lomani keda na Kalou. Na Kalou sai koya na loloma, o koya e tu vua na loloma, e tu vua na Kalou, ka rau sa dua vata kei na Kalou.

¹⁷Na loloma sa vakayacora vei keda meda yaloqaqa ena siga ni veilewai; ni sa vakakina o Koya, kei na noda bula qaqa e vuravura

¹⁸Na loloma e sega ni kila na rere; ia na loloma e taucoko e vakayalia na rere, baleta na rere edau veivakatotogani. Ia o koya e se rere tikoga e sega ni tu vua na loloma.

¹⁹Eda lomani Koya baleta ni a lomani keda e liu o koya.

²⁰Kevaka e dua e tukuna, "Au lomana na Kalou," ka cata na wekana, o koya na tamata lasulasu; baleta na wekana e rau veirai tikoga e veisiga, qai rawa vakacava vua me lomana na Kalou ni sega ni rawa ni raica e matana.

²¹Oqo nai vakaro sa tau mai vua, me baleti keda; o koya e lomana na Kalou e dodonu me lomana talega na wekana.