[10] 2 Samuela 1

¹Oqo sa qai yaco ni sa mate oti o Saula, ni sa lesu mai o Tevita ena nona valuti ira na Amalekaite, sa tiko mai Sikiladi o Tevita me rua na siga,

²Ena i katolu ni siga, sa lako mai e dua na tamata nai to nei Saula. Sa kakabasubasu tu mai na nona i sulu ka sa kuvu levu talega na uluna. Ni sa yaco mai vei Tevita sa lutu kina qele ka vakalolomataki koya.

³Sa tarogi koya o Tevita, "O lako tiko mai vei?" sa sauma mai, "Au sa dro mai na nodra i valu na Isireli."

⁴Sa tarogi koya tale o Tevita, "Sa vakacava tiko nai valu, tukuna mai vei au." Sa sauma mai, "Era sa dro na tamata mai nai valu ka e levu era sa davo ka mate sara, o Saula kei Jonacani na luvena e rau sa mate talega."

⁵Sa vosa o Tevita vua na tamata ka taroga, "O kila vakacava ni rau sa mate o Saula kei Jonacani?"

⁶Sa tukuna mai na cauravou oqo, "Sa yaco mai na ulunivanua o Kiliboa ni sa tautauri tiko o Saula ena nona moto, era sa muri koya tiko na ose kei na qiqi ni valu.

⁷"Ni sa rai lesu mai sa raici au, ka kacivi au sara. Au sa sauma yani, 'Sai au oqo.'

⁸"Sa tukuna mai vei au o Saula, 'Ocei o iko?' Au sa sauma vua, 'Oi au e dua na Amalekaite.'

⁹"Sa tukuna tale mai vei au, 'Tu mai ka vakamatei au. Sa tarai au na veilecayaki “ ia, au se bula tikoga.'

¹⁰"Au sa qai butuki koya ka vakamatea, ni'u sa kila ni na sega ni bula tale mai na nona bale sobu. Au sa taura nai sala mai na uluna, na qato mai ligana ka kauta mai oqo vua na noqu turaga."

¹¹Sa basuraka na nona i sulu o Tevita kei ira kece sa tiko vata kei koya.

¹²Era sa vakaloloku ka lolo ka tagi me yacova na yakavi ena vuku i Saula kei Jonacani na luvena, ena vukudra talega na tamata ni Kalou kei na vuvale na Isireli, baleta ni ra sa bale e nai seleiwau.

¹³Sa vosa o Tevita vua na cauravou, "O lako mai vei?" Sa sauma mai, "Oi au na vulagi mai vei ira na Amalekaite."

¹⁴Sa tukuna vua o Tevita, "O sa sega ni rere vakacava ena nomu dodoka na ligamu mo vakamatea nai lumuti ni Kalou?"

¹⁵Sa kacivi mai e dua na tagane ka tukuna vua, "Lako volekati koya ka vakamatea!" sa samuti koya ka sa mate talega.

¹⁶Sa tukuna vua o Tevita, "Sa tara na ulumu na nomu dra, ni sa vakatusa na gusumu ena vukumu, 'Ni'u sa vakamatea na lumuti ni Kalou.'"

¹⁷Sa tagi lagalaga o Tevita ka sametaka na tagi ena vukui Saula kei Jonacani na luvena,

¹⁸ka tukuna me vakavulici e Juta na Sere ni Dakaititi ka sa volai ena i vola nei Jasa:

¹⁹"Sa labati na totoka kei Isireli ena nomuni tikina cecere! Era bale vakacava na qaqa!

²⁰Kua ni tukuna e Kaca Me kua ni cavuti ena veisalatu e Esikiloni De ra qai rekireki na goneyalewa ni Filisitia De ra qai qaqa na goneyalewa mai vei ira na sega ni cili.

²¹"O iko na ulunivanua o Kiliboa, Me kua vei iko na tegu, Me kua na uca vei iko, Me kua ni solia e dua na ka na buca Ni sa viritaki mai kea nai sasabai ni qaqa! Nai sasabai nei Saula sa sega ni lumuti ena waiwai!

²²Mai na nodra dra na vakamatei, Mai na nodra uro na qaqa, Na dakai nei Jonacani sa sega ni lesu tale, Na i seleiwau nei Saula sa sega ni lesu lala.

²³"O Saula kei Jonacani sa lomani ka taleitaki ena nodra bula, Ena nodrau mate, e rau sa sega ni tawase; E rau sa tasiri me vaka na ikeli, E rau sa kaukauwa cake mai na laioni.

²⁴"Kemuni na goneyalewa ni Isireli, Mo ni tagicaki Saula o koya sa vakaisulutaki kemuni ena lokaloka kei na ka vivinaka; Sa biuta o koya na koula ena nomuni kote.

²⁵"Era sa bale vakacava na qaqa ena loma ni i valu! O Jonacani sa samuti ena tikina cecere.

²⁶Au sa rarawa ena vukumu, na taciqu Jonacani; O sa rui vinaka vei au, Na nomu loloma vei au sa rui vinaka Sa sivia sara na loloma ni yalewa.

²⁷"Era sa bale vakacava na tamata qaqa Kei na yaragi ni valu me rusa!"