[55] 2 Timoci 1

¹Oi au o Paula nai apositoloi Jisu Karisito ena lewa ni Kalou, ena vuku ni bula ka yalataki sa tu vei Karisito Jisu.

²Vei Timoci, na noqu gone ni toko: Me yaco na loloma, na yalololoma, kei na vakacegu mai vua na Kalou o Tamada kei Karisito Jisu na noda Turaga.

³Au vakavinavinaka vua na Kalou, o koya au sa qarava ena loma e savasava, me vaka era a dau cakava na noqu qase, sa sega talega ni'u dau cegu me'u dau nanumi iko tiko ena noqu masu ena veisiga kei na veibogi,

⁴Au rui gadreva dina vakalevu, me'u raici iko, ni'u dau vakasamataka na tuturu ni wai ni matamu ena vuku ni dredre o sotava tiko, me rawa ni solia tale vei au e dua na reki kei na marau,

⁵Na gauna au vakananumi iko kina ena vuku ni vakabauta dina sa tu vei iko, au sa qai taura rawa ni a tu e liu vei Loi na bumu kei Unaisi na tinamú, ka sega ni qai vakataratutu tale vei au ni sa tu talega vei iko.

⁶O koya oqo au sa vakananumi iko tiko kina mo vakayadrata nai solisoli ni Kalou sa tiko vei iko, mai na veitabaki ni ligaqu.

⁷Ni sa sega ni solia vei keda na Kalou na yalo meda rere, ia na yalo ga ni qaqa, na loloma kei na taucoko ni yalo matua.

⁸O koya mo kua kina ni madualaka nai tukutuku ni noda Turaga, o iko o sega ni vesu vakataki au, ia mo wasea vata ga kei au na veika rarawa, ena vuku ni tukutuku vinaka ena kaukauwa ni Kalou.

⁹Ni o koya sa vakabulai keda ka kacivi keda ena kaci e savasava, a sa sega ena vuku ni noda cakacaka, ia ena nona lewa ga kei na loloma, ka sa qai mai vakavotuya vei keda o Jisu Karisito, sa nakiti sara tu mai ni se bera ni tekivu o vuravura.

¹⁰Ia ka sa sega ni rawa me tabonaki, sa yaco ga mai na noda i vakabula o Jisu Karisito, sa mai vakaoti mate vakadua ka solia na bula kei na sega ni mate rawa ena rarama ni tukutuku vinaka,

¹¹Ena ka oqo au sa tawasei kina me'u dau vunautaka, ka i apositolo, ka dauvakatavuvuli vei ira na kai matanitu tani.

¹²Oqo sara ga na vuna au sa vosota kina na veika rarawa; ka sega ni'u madua kina, ni'u sa kilai koya o koya au sa qarava, au sa kila talega ni na dina o koya vei au, ena ka au sa yalataki au kina vua, me yacova na siga sa lokuci.

¹³Nai valavala ni noqu dau vosa o a dau rogoca vei au, oqori mo taura dei, ni lako tiko mai ena taucoko ni vakabauta kei na loloma sa tu vei Karisito Jisu.

¹⁴Na ka vinaka o sa lesi kina oqori, mo maroroya ni na vukei iko kina na Yalo Tabu sa tiko kei keda.

¹⁵Ni o sa kila vinaka, ni o ira kece mai Esia era biuti au, ka sega ni dua me taleitaki au, ka dua vei ira o Pijila kei Erimojini.

¹⁶Me nodratou na loloma mai vua na Turaga na matavuvale nei Onisivoro, ni ratou dau sotava noqu leqa, ka ratou sega ni dau madualaka noqu vesu tu.

¹⁷Ena nona a yaco yani i Roma, e la'ki vakasaqarai au me kunei au, keirau a qai sota.

¹⁸Sa yalataka vua na Turaga ni na kune loloma mai matana ena siga dina o ya “ o kila vinaka na nona dau veivuke vei au ena noqu a tiko mai Efeso.