[55] 2 Timoci 2

¹O koya oqo, o iko na luvequ mo tamata qaqa ena loloma sa tu vei Karisito Jisu.

²Kei na veika o a dau rogoca mai vei au ena kedra maliwa na lewe vuqa, mo solia ga vei ira na tamata yalodina o ira e rawa ni vakavulici ira tale eso.

³Mo tamata vosota na veika dredre me vaka na sotia vinaka i Jisu Karisito.

⁴E sega ni rawa ni dua me sa vakaisulu tu ni valu me la'ki vala, me qai vakaogai koya tale tiko ena so na cakacaka, e sega ni sotia vinaka na tamata vakaoqo.

⁵Ena sega talega ni dua me nona na koula ena veitaucici, kevaka me sega ni vakamuria vaka vinaka na kena lawa.

⁶O ira na dauteitei era teitei vagumatua mera na kania na vuana.

⁷Mo nanuma vinaka na ka au tukuna tiko vei iko, me na solia vei iko na Turaga na kila ka, mo kila kina na veika kecega oqo.

⁸Mo kila ni o Jisu Karisito, mai na kawa i Tevita, e a vakaturi cake mai na mate, me vaka na dina ni tukutuku vinaka au dau vunautaka.

⁹Ena vuku ni ka oqo au sa dau vakararawataki tu kina me vaka e dua na tamata dau basu lawa, au qai vesuki tale tu ena senicodo, ia na vosa ga ni Kalou e sega ni rawa ni ra vesuka.

¹⁰O koya oqo au na vosota kina na ca kecega ena vukudra na digitaki, me rawa kina ni ra vakabulai ka rawata na bula Sega ni mudu ena vuku i Karisito Jisu.

¹¹Oqo na vosa dina: Kevaka eda mate vata kei koya, E da na bula vata talega kei koya.

¹²Kevaka meda dau vosota, Eda na lewa vata kei koya. Kevaka meda na cakitaki koya, Ena cakitaki keda o Koya.

¹³Kevaka meda sega ni yalodina, O Koya ena dau yalodina tu ga; E sega ni dau tu vua na veidabui.

¹⁴Mo dauvakananumi ira ena veika oqo, ena vuku ni Turaga mo vakaroti ira tiko, me ra kua ni dau veiletitaka na vosa, ni sega ni dua na ka vinaka e kauta mai vei ira, era na vakaleqai ira ga na vakarorogo tiko.

¹⁵Gumatua sara mo vakaraitaki iko mo vinaka ena mata ni Kalou, na tamata daucakacaka ena sega ni dua na ka me madua kina, mo wasea vakadodonu nai vakavuvuli dina.

¹⁶Ia na dautalanoa vakasisila ka sega ni yaga, mo drotaka, ni sa vakatubura ga nai valavala e sega ni kilikili.

¹⁷Ia na nodra vosa ena kakana tiko me vaka na mate ca sa sega na kena i wali, e dua na kena i vakaraitaki o Imeneo kei Filito.

¹⁸E rau sa lako sese tani mai ena i vakavuvuli dina, era dau tukuna ni tucake tale mai na mate sa oti na kena kaukauwa; ka so vei ira na vakabauta sa rawai kina.

¹⁹Ia na yavu dei ni Kalou sa tudei ga, ka sa vakaoqo: "na Turaga sa kilai ira ga na nona tamata," kei, "ira kece sa lotu va-Karisito mera lako tani mai nai valavala ca."

²⁰Ia ena dua na vale levu e sega ni tu ga kina na veibilo koula kei na veibilo siliva, ia eso talega era bilo kau e so era bilo qele, e so era cecere eso era lolovira.

²¹Kevaka e dua na tamata sa vakasavasavataki koya mai ena veika oqo, ena yaco me bilo talei, ni sa savasava ka yaga vua na Turaga, ka na vakarau yani kina cakacaka vinaka kecega.

²²Mo dro tani mai ena vei gagadre ca vakacauravou; segata na bula dodonu, na vakabauta na loloma, kei na veivinakati kei ira sa masuta na yaca ni Turaga ena yalosavasava.

²³Ia mo qarauna tiko eso na veivosaki vakayalowai edau yaco kina na duidui, mo kila tiko eso era dau nakita me tubu kina na veivala.

²⁴Nai talatala ni Turaga e sega ni dodonu me dau vakavu veisei, ia me tamata yalo vinaka vei ira taucoko na tamata, me dau vakavuvuli vakavuku ka yalomalua.

²⁵Me ra vakavulici o ira na dauveisaqasaqa ena yalo e malumalumu, me rawa ni na tara kina na Kalou na nodra loma kaukauwa ka veivutuni sara, ka kila na dina.

²⁶Sa na qai ra kilai yalodra ka raica ni ra coriti tu ena nona tudai qaseqase na tevoro, ena nodra a vakabobulataki tu vua mera talairawarawa tiko ena nona lewa.