[55] 2 Timoci 4

¹Au sa vakaroti iko ena mata ni Kalou kei na turaga o Jisu Karisito, o koya ena lewai ira na bula kei na mate, ena nona na rairai mai vakaiukuuku.

²Mo vunautaka na vosa! Mo vakarau tu, ena gauna ni vinaka se gauna e ca kina na ka kece, tukuna na ka e ca, vunauci ira sa cala, dauveivakaroti tiko ena veivakavulici, ka mo vosota tiko vakadede.

³Ena yaco na gauna era na sega ni vosota rawa na taucoko ni vakavuvuli dodonu, ia era na murimuri lomadra, ni sa sega ni tiko vei ira na daliga e rogo kei na nodra sa bulia ga eso me nodra qasenivuli.

⁴Era na vagolea tani na daligadra mai na ka dina, ka qai rogoca ga na i tukutuku buli.

⁵Ia mo yadrava tiko na veika kece oqo, vosota tiko na veivakararawataki, gumatua tikoga ni vunautaka na vosa kei nai tavi o sa lesi kina.

⁶Au sa vakarau oti tu, me'u sa liviraki, ka sa voleka mai na siga me'u sa gole yani.

⁷Au sa vala oti ena valu vinaka, sa oti na noqu a ciciva tiko mai na cere, au sa taura dei tu ga na vakabauta.

⁸Au sa kila tu, ni sa maroroi me noqu na i sala vakaturaga ni valavala dodonu, o koya ena solia vei au na Turaga ni lewa dodonu ena siga o ya, ka sega ni o au duadua ga, vei ira kece talega era nuitaka tiko na nona rairai mai.

⁹Mo sasaga vakaukauwa mo lako vakatotolo mai vei au;

¹⁰Ni o Timasa sa biuti au, ni sa rui lomana tale vakalevu na vuravura oqo, ka sa lako sara ki Cesalonaika “ Kirisiki ki Kalatia sara, o Taitusi ki Talimetia.

¹¹O Luke duaduaga sa qai tiko vei au, mo raici Marika ka kauti koya mai vei au, ni na mai vukei au vakalevu ena cakacaka qo.

¹²O Tikiko au sa talai koya ki Efeso.

¹³Mo kauta mai nai tutuvi au solia tiko vei Karipo mai Tiroa “ nanuma na i vola ka vakabibi nai vola kuli ni sipi.

¹⁴E vakararawataki au vakalevu o Alekisada na matai ni varasa. Me na qai sauma ga vua na Turaga me vaka na ka e cakava,

¹⁵Mo qarauni iko tiko mai vua, ni o koya e dua sa bau coqa vakalevu na ka keitou tukuna.

¹⁶Ena noqu matai ni veilewai e sega sara ga ni dua me tokoni au, era a biuti au kece me kakua ni dua na ka mera beitaki kina.

¹⁷Ia sa tu vata kei au na Turaga me vakayaloqaqataki au, me'u rawa ni tukuna tikoga na dina ni tukutuku vinaka, me ra rogoca na kai matanitu tani, sa vakabulai au talega mai na gusu ni laione.

¹⁸Na Turaga sa vakabulai au mai na ligadra na dau naki ca, me vakacurumi au kina nona matanitu vakalomalagi. Me nona tikoga na vakarokoroko me sega ni mudu. Emeni!

¹⁹Au sa loloma yani vakalevu vei Varasiko kei Akuila, vaka talega kina na matavuvale nei Onisivoro.

²⁰O Erasito sa tiko e Korinica, ia o Tirofimo au sa biuti koya tiko mai Milito ena vuku ni tauvimate.

²¹Mo sasaga ena nomu i gu taucoko mo lako mai ni se bera tiko na draki batabata. Sa loloma tiko yani o Apolosi, vaka talega kina o Putena, o Lino, kei Kelotia, vata kei ira kece na veiwekani.

²²Me sa tikoga ena yalomudou na Turaga o Jisu Karisito. Me nomudou na loloma. Emeni.