[56] Taitusi 1

¹Oi au o Paula, na i Talatala ni Kalou kei na apositolo i Jisu Karisito, ena vuku ni nodra vakabauta na sa digitaki ira na Kalou, kei na vakatusa na i vakavuvuli dina ka vakalotu.

²Me vakanuinuitaki na bula sega ni mudu o koya sa yalataka e liu na Kalou, o Koya sa sega ni lasu rawa ea qai vakatekivu e muri o vuravura.

³Ia sa vakaraitaka ena Nona Vosa ena kena gauna ni sa vunautaki, ka'u sa lesi kina me'u ia me vaka na Nona Vosa na Kalou na noda i vakabula;

⁴Vei Taitusi na luvequ dina, me vaka na vakabauta sa tu vei keda kecega: me sa nomu na loloma, na yalololoma, na vakacegu, mai Vua na Kalou o Tamada kei na Turaga o Jisu Karisito na noda i Vakabula.

⁵Au a laivi iko mai Kiriti mo rawa ni vakadodonutaka na veika sa vo tiko, ka mo lesia na Qase era vakadonui ki na vei koro yadudua, me vaka ka'u a vakarota vei iko.

⁶Kevaka e dua sa sega ni cala ka sa vakawati ga vakadua, a ra sa vakabauta o ira na luvena, ka sa sega ni beitaki vei ira na i valavala vakatani se na talaidredre.

⁷Ni sa dodonu me sega ni cala na Qase, me vaka sa i Talatala ni Kalou, me kakua ni domoqa, me kakua ni daucudrucudru me kakua ni daugunu yaqona, me kakua ni dauveiba, me kakua ni daudomona na i lavo.

⁸Ia me dauvakacegui ira na vulagi, me daulomani ira na tamata vinaka, me yalomatua, me yalododonu, me yalosavasava, me dau taura na yalona.

⁹Taura matua na i vakavuvuli dina o sa vakatavulici kina, me rawa kina ni o vakarota na i vakavuvuli sa vinaka ka vunauci ira talega era sa vosa vakatani.

¹⁰Ni ra sa lewe vuqa era sa i valavala vakatani, era dautalanoa walega ka dauveivakaisini, ka vakauasivi vei ira sa cilivi.

¹¹Ka sa dodonu me vagalui na gusudra, ni ra sa vakacalai ira kece na lewe ni vale e so, ni ra sa vakatavulica na ka sa sega ni kilikili, ena vuku ni yau vakasisila.

¹²E dua vei ira, a nodra parofita, sa tukuna, "A nodra i tovo ga na kai Kiriti me ra daulasu, ka i tovo vakamanumanu, era sa daukana ka vucesa."

¹³Sa dina na i tukutuku oqo. O koya oqo mo qai vunauci ira vakaukauwa me vinaka kina na nodra vakabauta.

¹⁴Mera kakua ni nanuma na i tukuni walega vaka Jiu, se na nodra vei vakaro na tamata era sa lesu tani mai ena i vakavuvuli dina.

¹⁵Sa savasava na ka kecega vei ira sa yalosavasava, ia vei ira sa dukadukali ka sega ni vakabauta sa sega na ka sa savasava, ia sa dukadukali na nodra lewa e loma kei na nodra vakanananu.

¹⁶Era tukuna ni ra kila na Kalou, ia ena nodra i valavala era sa cakitaka ni ra sa tamata vakasisila, ka talaidredre, ka sega ni yaga kina dua na cakacaka vinaka.