[44] Cakacaka 12

¹Ena gauna o ya sa kaukauwa sara kina, nona vakararawataki ira tiko eso sa lotu o Eroti na tui.

²E a vakamatei Jemesa na tuakai Joni ena i seleiwau.

³Ni raica o koya ni ra marautaka na ka o ya nai liuliu vaka Jiu, sa nakita lo e lomana me na vesuki talega o Pita, me donumaka na gauna ni kana madrai sa sega ni vakaleveni.

⁴Sa vesuki Pita, ka biuti koya sara ki na vale ni veivesu, ka vakarota me ratou lewe tini ka ono na sotia me ratou yadravi koya, ka sa nanuma tiko o koya me qai kau mai vei ira na lewe vuqa ni sa oti na lako sivia.

⁵Ena gauna taucoko e vesu tiko kina o Pita ena vale ni veivesu, sa sega talega ni mudu na nodra masulaki koya tiko vua na Kalou o ira nai soqosoqo lotu.

⁶Ena siga sa nanuma tiko o Eroti me na kauti koya mai vei ira na tamata, ena bogi o ya e moce tiko kina o Pita ena kedrau tadrua e rua na sotia, ka rua na sinucodo e vesuki tiko kina, mai na mata ni katuba ni vale ni veivesu era veivalivali e keya na sotia ena nodra yadravi koya.

⁷Ka vakasauri sa tucake tu e yasana e dua na agilosi kei na kena sa cila vakavolivolita na loma ni rumu ni vale ni veivesu o ya e dua na rarama, sa tavia na tutui Pita, vakaduria ka tukuna, "Mo tucake sara ga oqo vakatotolo!" na senicodo ka vesuki tiko kina sa taluva talega mai ligana.

⁸Sa tukuna vua na agilosi, "Mo vauca na tolomu ka daramaka nomui vava;" sa cakava vaka kina o koya. Sa tukuna tale vua, "Mo tokara mai na nomu kote. Ka muri Au mai."

⁹Sa biuta mai o koya na rumu o ya ka muria yani na agilosi, e sega ni kila tiko o koya ni yaco dina tiko e nanuma tiko ni raivotu.

¹⁰Ni rau sa sivi ira nai matai ni mata yadra kei na karua ni mata yadra, rau sa yaco sara mai kina matamata kaukamea levu sa vakanamata kina koro levu, ni rau volekata mai e tadola ga vakaikoya; e rau curu sara yani i tuba ka vakamuria sobu na gaunisala, ka vakasauri sa yali tani na agilosi.

¹¹Ni sa qai kila o Pita na ka sa yaco, sa tukuna, "Au sa kila dina oqo ni sa tala mai na nona agilosi na Turaga, me mai sereki au ena liga i Eroti, ka vaka talega kina mai na veika era sa nakita mera cakava vei au o ira na Isireli."

¹²Ni sa vakasamataka oti, sa qai lako kina vale i Meri na tinai Joni ka kilai talega ena yaca Marika, e lewe levu era soqoni tiko ena vale oqo ena masumasu.

¹³Sa tu o koya mai na matamata ni katuba levu ka tukituki, sa qai lako mai e dua na goneyalewa na yacana o Rota me mai rai se o cei.

¹⁴Ni sa mai rogoca ka kila ni sa domo i Pita, sa guilecava mada ga o koya me dolava yani na matamata ena nona sa rui marau vakalevu, sa cici tale o koya ki loma ni vale, ka kacivaka vei ira ni sa tu mai matamata levu ni katuba o Pita.

¹⁵Ia era tukuna vua, "E rairai o iko sa leqa tiko beka!" e sega ni cegu nona vakarota tikoga ni o koya dina sa tucake tu o ya. Era sa mani tukuna yani vua, "Oqori na nona agilosi."

¹⁶Sa sega ni cegu nona tukituki tikoga o Pita; ni ra sa qai dolava na katuba era raici koya kei na nodra kurabui ni o Pita dina ga.

¹⁷Ia sa vakatabataba yani o koya mera tiko lo, sa tukuna vei ira na nona sereki koya mai na Turaga mai vale ni veivesu. Sa tukuna o koya. "Dou lako ka tukuna vei Jemesa kei ira talega na veiwekani." A sa biuti ira o koya ka lako kina dua na yasana tani.

¹⁸Ni sa kida na mataka era sa vaqaqa na sotia na vuni nona yali sega ni macala o Pita.

¹⁹Ia o Eroti sa tala eso me la'ki raici koya mai ka sa yali kina o koya, sa vakarota sara ga kina o koya vei ira taucoko na mata yadra era yadravi Pita tiko mera sa vakamatei taucoko. Sa mani lako sobu kina o koya (Eroti) mai Jutia ki Sisaria, me tiko mada kina.

²⁰Sa cudruvi ira sara vakalevu na kai Taia kei Saitoni o Eroti; ena nodra lako mai me mai raici koya. Na mata i lakolako mai na vanua e rua oqo sa sega ni dua na ka me caka rawa vei ira, ni ra sa rawai koya rawa na nona vunivola levu na tui, era sa mai gadreva tiko na veisaututaki, baleta na nodrau matanitu sa vukei tiko mai ena matanitu nona na tui.

²¹Ena siga sa lokuci tu, sa qai tokara mai na nona i sulu vakatui o Eroti, ka dabe ena nonai dabedabe vakatui me tauca kina na nona vosa vakatui.

²²O ira na tamata era sa kailavaka vua, "Sa domo ni Kalou ka sega ni domo ni tamata!"

²³E vakasauri ga e dua na agilosi ni Turaga qai samuti koya, baleta ni sega ni solia me nona na Kalou na lagilagi. Sa qai kanilaka na yagona na ulo me yacova ni sa mate.

²⁴Ia na vosa ni Kalou sa tubu tikoga ka tete yani, sa vakaikuritaki tikoga na tamata sa vakabulai tiko.

²⁵Rau sa lesu tale mai Anitioki o Panapasa kei Saula ni rau sa vakacavara vinaka na cakacaka rau kacivi ira ki Jerusalemi, e dua na cauravou o Joni ka dau kilai talega Marika e rau sa kauti koya tiko mai.