[44] Cakacaka 13

¹Ena i soqosoqo lotu mai Anitioki era tiko kina eso na parofita ka so e qasenivuli, me vakataki: Panapasa, Simione o koya sa dau kacivi na tamata loaloa, o Lusiu na kai Kirini, o Manaini o koya e rau susugi vata kei Eroti na tui, kei Saula.

²Ena nodra veiqaravi tiko vua na Turaga ka lolo tale tikoga sa vosa kina na Yalo Tabu ka vaka, dou tawasei rau mai oqo o Panapasa kei Saula me noqu, ena vuku ni cakacaka au sa kacivi rau kina.

³Ni sa mai oti na nodra gumatua taka tiko mai na lolo kei na masumasu, era sa qai tabaki rau ena ligadra ka vakatalai rau yani.

⁴Ena veiliutaki ni Yalo Tabu e rau sa lako sobu kina ki Selusia, mai kea e rau sa qai soko tale ki Saipurusi.

⁵Ni rau sa butuka na koro o Salamisa rau sa lako sara kina nodra vale ni qaravi Kalou na Jiu ka vunau kina. E veitomani vata tiko kei rau o Joni Marika.

⁶E ratou sa lakova taucoko na veikorokoro ena yanuyanu o ya ka yaco sara ki Pafo, mai keya e ratou raica kina e dua na Jiu daucaka mana lasulasu, e parofita vakailasu ka yacana o Pari- Jisu,

⁷O koya e sa dau la'ki tu sara ga ena nona vale na kovana ni koro oqo o Sakulusi Palu, e tamata vuku ka lewa matau. Na tamata oqo sa qai kacivi rau mai o Panapasa kei Saula ka gadreva me rogoca mai vei rau na vosa ni Kalou.

⁸Ia o Elima na daucaka mana lasulasu (oqori nai balebale ni yacana) sa sogoti koya na kovana me kua ni via rogoca na nodra i vunau.

⁹Ia o Saula, sa vakatokai talega me o Paula, ni sa vakasinati tu ena Yalo Tabu sa vakaraici koya matua.

¹⁰Ka tukuna vua, o iko sa vakasinaiti ena veivakaisini kece kei na ka ca kecega, o iko na luve ni tevoro, ka meca ni ka vinaka kecega, ena sega beka ni oti na nomu dau saqata na cakacaka ni Turaga?

¹¹"Ia oqo ena tarai iko na liga ni Turaga, o na mata boko mo sega ni raica rawa na cila ni siga, me yacova mada e dua na gauna," E vakasauri ga na kena solegi na matana na butobuto me sega ni raica rawa e dua na ka, sa qai kere veivuke tu me dua me bau mai tubera na ligana.

¹²Ni sa raica na ka sa yaco na kovana sa vakabauta o koya, kei na nona qoroqoro levu ni sa vakatavuvulitaki vua na vosa ni Turaga.

¹³Ni ra sa biuti Pafo mai o Paula kei ira nona i tokani ena waqa, era sa qai mai kele i Perika e dua na koro ena yasana o Pamifilia; eke sa mai biuti rau kina o Joni Marika me sa lesu tale ki Jerusalemi.

¹⁴Ia sa biu tale mai o Perika ka mai kele i Anitioki e dua na koro ena yasana vaka Pasitia ni sa Siga Tabu era sa gole ki na vale ni lotu ka dabe sobu.

¹⁵Ni sa wiliki oti nai vunau kei ira na parofita, era sa qai kerea na liutaka tiko na lotu o ya, ka vaka, kemudou na veiwekani kevaka e tiko oqori e dua na vosa ni vakavuvuli baleti keimami, mo dou sa talaucaka sara ga oqo."

¹⁶Sa qai tucake o Paula ka kidavaki ira ena nona yaloyalo ena ligana, ka tukuna, "Oi kemudou na Isireli, kemudou sa rerevaka na Kalou, dou vakarorogo vinaka mai:

¹⁷Na Kalou ni matanitu oqo o Isireli sa digitaki ira na noda qase ka vakatuburi ira cake ena nodra a tiko vulagi ena vanua o Ijipita, sa qai kauti ira tani mai kina ena ligana mana dauveimaroroi.

¹⁸Ena loma ni vasagavulu na yabaki ena vanua dravuisiga, e vosoti ira tu ga mai ena nodra i valavala.

¹⁹Ni sa vakarusa oti e vitu na matanitu ena vanua o Kenani, sa qai vota vei ira na veivanua oqori me nodra i votavota.

²⁰Kei na nona solia tiko vei ira eso na turaganilewa mai na loma ni va na drau ka limasagavulu na yabaki, me yacovi Samuela na parofita sara mai.

²¹Sa oti oqo era sa qai vinakata me dua na nodra tui; na Kalou sa soli Saula na luvei Kisi vei ira, mai na yavusa i Penijamini me vasagavulu na yabaki.

²²Ia ni sa kauti koya tani na Kalou, sa qai laveti Tevita cake mai me nodra tui, sa tusanaki koya talega na Kalou ka vaka, "Au sa kunei Tevita na luvei Jese, na tamata sa kila vakavinaka na lomaqu, ena cakava kecega na Noqu lewa."

²³Na nona kawa na tamata oqo, me vaka na vosa ni yalayala, ena vakatubura cake mai kina na Kalou nai vakabula vei ira na Isireli “ o Jisu-

²⁴Sa dau vunautaka tiko mai o Joni ni se bera ni yaco mai o koya, mera veivutuni ka papitaisotaki o ira na Isireli.

²⁵"Ni sa mai vakarau cava tiko na nona gauna o Joni, sa tukuna, o cei mada o ni nanuma oi kemuni ni oi au? Oi au e sega ni mai Koya. Ia raica, o koya ena muri au mai oqo, na wa ni nona i vava au sa sega mada ga ni yacova yani na kenai vakatagedegede, me tu kina na dodonu vei au me'u sereka.

²⁶Vei kemuni na veiwekani, na kawa i Eparama kei ira o ni sa mai tiko vata era rerevaka na Kalou, ena vukumudou sa talai mai kina na vosa ni bula oqo.

²⁷Vei ira sa tiko e Jerusalemi, kei ira na kena veiliutaki, era vakayacora na ka sa parofisaitaki mai ena nodra mai vakamatei Jisu, baleta ni ra sega ni kilai Koya, dina mada ga ni ra wilika tiko ena Veisiga Tabu na nodra vosa na parofita.

²⁸Era sa qai vakamasuti Pailato me vakamatei o Koya, ni ra raica tu ni sega ni dua na ka e dodonu me mate kina.

²⁹Ni ra sa vakayacora taucoko vua na veika sa volai me baleti Koya, era sa qai biuti Koya sobu mai, e na kau ka la'ki vakotora na yagona ena dua na qara vatu.

³⁰Ia na Kalou sa vakaturi Koya cake tale mai na mate.

³¹Ena vica vata na siga sa dau vakaraitaki Koya vei ira na nonai lawalawa, era sa dau lako vata tiko mai Kaleli me yaco ki Jerusalemi, o ira sara ga oqo era tukuni Koya tiko vei ira kecega na tamata.

³²Keirau sa tu sara ga kina oqo, me keirau tukuna vei kemuni nai tukutuku vinaka ka sa yalataka mai vei ira noda qase.

³³Na Kalou sa mai vakataucokotaka na vosa ni yalayala o ya vei keda na nodra kawa, ena nona vakaturi Jisu cake mai na mate. Me vaka sa volai ena i karua ni Same: 'O iko na Luvequ, E daidai Au sa Vakatuburi Iko.'

³⁴Sa yalataka tu mai na Kalou ni na vakaturi Koya cake mai na mate, me kakua tale ni na mate. Sa tukuni oti tu ena i Vola Tabu: 'Au na solia vei iko na, veika uasivi Au sa yalataka tu vei Tevita.'

³⁵O koya oqo ena dua tale na Same sa tukuna: 'O ni na sega ni vakatara na Nomuni le dua Yalosavasava me vuca mai.'

³⁶Vei Tevita, ni sa qarava vaka vinaka na nonai taba tamata me vaka na lewa ni Kalou, sa qai moce ka bulu vata kei ira na nona qase, na yagona sa vuca mai;

³⁷Ia o Koya sa vakatura cake na Kalou sa sega ni vuca mai.

³⁸O koya oqo mo dou kila sara na veiwekani, ena vukuna duadua ga na Tamata oqo (Jisu) sa rawa me bokoci kina nomudou i valavala ca;

³⁹Vei ira vakayadua era vakabauti Koya, era sa vakasavasavataki mai na ka kecega, na ka dukadukali e tu e noda bula ka sega ni vakasavasavataka rawa na vunau i Mosese.

⁴⁰Mo ni qarauni kemuni vinaka de na vakayacori vei kemuni na nodra vosa na parofita, ka vaka:

⁴¹'Raica, oi kemudou sa veibeci. Dou qai vakasarava tikoga, io dou na rusa! Ena nomudou gauna Au na cakava kina e dua na cakacaka, dou na sega ni vakabauta kevaka mada ga dou sa rogoca mai vua e dua.'

⁴²Era sa qai curu taucoko i tuba mai na loma ni vale ni lotu o ira na Jiu, ia o ira na kai Matanitu Tani era sa qai vakamasuta, me vunautaki tale vei ira nai vunau oqo ena siga ni vakacecegu ka tarava.

⁴³Ni ra veisukayaki e lewe levu na Jiu kei ira na lotu vakaJiu, era sa vakamuri rau o Paula kei Panapasa ena gaunisala rau muria, e rau vakauqeti ira ka vosa vei ira, mera ciqoma na loloma soli wale ni Kalou.

⁴⁴Ena Siga Tabu ka tarava e voleka me o ira kece na lewe ni koro levu o ya, era sa mai osota na vale ni lotu mera rogoca na vosa ni Kalou.

⁴⁵Ia ni ra sa raica na Jiu na kena osodrigi na vale ni lotu, sa ca na yalodra, era sa qai vakalasuya ka vosavakacacataka mera saqata kina na vunau i Paula.

⁴⁶Sa qai tuburi rau mai o Paula kei Panapasa e dua, na yalo qaqa, rau sa tukuna, e dodonu me vunautaki mada e liu vei kemudou na vosa ni Kalou; ia dou qai biliga tani ni dou raica ni sega ni ganiti kemudou na bula Sega ni mudu, ia oqo, keitou sa na golevi ira kina na kai Veimatanitu Tani.

⁴⁷Na ka oqo sa vakaroti keitou kina na Turaga me keitou tukuna: "Au sa vakaturi iko mo nodra rarama na Veimatanitu Tani, Mo na la'ki tuberi ira mai na tu ena sauka kei vuravura me ra vakabulai."

⁴⁸Ni ra sa rogoca na vosa oqo na kai Veimatanitu Tani era sa reki ka vakarokorokotaka na vosa ni Turaga. E lewe levu sa vakabauta era sa gadreva bula Sega ni mudu.

⁴⁹Sa sega ni tarovi rawa na kena sa tete na vosa ni Turaga kina veiyasana kecega.

⁵⁰Ia o ira na nodra i liuliu na Jiu era sa vakaculai ira na yalewa lotu, kei ira na marama dokai kei ira na veiliutaki ena koro levu o ya, mera sa vakacibi i valu me rau na vakararawataki kina o Paula kei Panapasa, rau sa qai vakatalai tani ki nodrau vanua.

⁵¹Ia e rau sa kuretaka na kuvu ni qele mai na yavadrau vei ira, ka rau lako ki Ikoniomi.

⁵²Era sa vakasinaiti na tisaipeli ena reki kei na Yalo Tabu.