[44] Cakacaka 17

¹E ratou lako sivita mai na koro levu o Amifipoli kei Apolonia, ka ratou lako sara ki Cesalonaika, a sa tiko kina e dua na nodra vale ni lotu na Jiu.

²Me vaka ga sa dau i tovo tu i Paula, me dau lako yani vei ira ena nodra lotu, ena tolu na Siga Tabu e veiwasei kina vei ira o Paula ena i Vola Tabu,

³E vakamacalataka ka vakaraitaka ni o Karisito e dodonu me kune rarawa, me mate, ka tucake tale mai na mate, au tukuna oqo vei kemudou, "O Jisu ga au vunautaka tiko oqo vei kemudou, sai Koya na Karisito."

⁴E so vei ira na vakarorogo sa tarai na yalodra me ra sa muri Paula kei Sailasa; oqo e wili kina e lewe levu sara na tamata lotu dina era kai Kiriki, kei na vica tiko na marama era vakaitutu e cake.

⁵Ia o ira na Jiu lomaqa sa vuvu, era vakasokumuni ira vata mai na dauvakacaca ka ra dau tu ena loma ni koro levu, me sa yaco e dua na vakacaca levu, na vakacaca oqo me basuraki kina na vale i Jesoni, me rawa ni biu mai tuba o Paula kei Sailasa, me rau na la'ki lewai ena matana levu.

⁶Ia ni rau sa sega ni laurai kina, era sa tauri Jesoni kei na so na lewe ni lotu, ka yarataki iratou yani vei ira na veiliutaki ena loma ni koro levu oqo,era kacivaka tiko oiratou na tamata oqo e ratou vakatanitaka tiko nai vakavuvuli kei vuravura, e ratou sa lako mai vei keda.

⁷"O Jesoni sa vakacurumi rau e nona vale, kei na ka kece e ratou cakava sa veisaqasaqa sara ga kei na lawa i Sisa, ni tukuni e dua tale tiko na tui “ oqori o Jisu."

⁸Ni ra sa rogoca na veika oqo nai liuliu ni koro kei ira na lewe vuqa, era sa rarawa sara ga vakalevu.

⁹Ni sa mai tauri taucoko nai vola tukutuku vei Jesoni kei ira na kena vo, era sa qai laivi iratou me ratou lako.

¹⁰Na ka era cakava na lewe ni lotu, era sa vakatotolotaka na nodrau vakau ena bogi ki Peria o Paula kei Sailasa. Ni rau sa yaco yani ki keya, e rau lako vakadodonu sara kina nodra vale ni lotu na Jiu.

¹¹E vinaka cake sara na nodra bula vakayalo mai vei ira na kai Cesalonaika, ni ra sa dau vakarautaka tu na yalodra mera ciqoma na vosa ni Kalou, era sa dau vakasaqaqara ena i Vola Tabu ena i veisiga, me ra kila na dina ni vosa ni Kalou.

¹²Na kenai vakaraitaki ni lewe levu era sa mai lotu kina, ka so sara ga vei ira na marama ni Kirisi era vakaitutu e cake ka vaka talega kina eso vei ira na turaga.

¹³Ia ni ra sa kila rawa na Jiu mai Cesalonaika ni sa vunautaka tiko o Paula na vosa ni Kalou mai Peria, era sa qai lako mai ka mai vakavuna e dua na tiko yavavala vei ira na lewe ni vanua.

¹⁴Ni ra sa kila na lewe ni lotu era sa sega ni vakaberabera ena nodra sa vakauti Paula me soko tani yani e wasawasa, ia o Sailasa kei Timoci e rau tikoga e Peria.

¹⁵E so vei ira na veitomani kei Paula era kauti koya sara ki Aceni, sa qai vakauta mai kea e dua nai tukutuku o Paula vei Sailasa kei Timoci, me rau mai tomani koya e kea, sa mani rau biubiu mai. Ira Na Tamata Vuku E Aceni

¹⁶Ni waraki rau tiko mai Aceni o Paula, sa vusolo na yalona ena nona rarawataka ni sa raica, na kena duri tu ena veiyasa ni koro levu oqo na Kalou matakau.

¹⁷Na ka oqo sa lako kina o koya ki na vale ni lotu vei ira na Jiu, kei ira na kai Matanitu Tani sa lotu tiko, me wasea vei ira na cala ni matakau, ka la'ki wasea talega ena veivanua era dau osota tu na tamata, ena loma ni koro levu oqo.

¹⁸E sota talega kei ira na tamata e tu vei ira na vuku vakavuravura, ka ra vakatokai na Epikuro kei na Sitoike. Ni vunautaki Jisu vei ira kei na nona tucake tale, e so e tukuna, oqo e dua na tamata edau levu nona vosa, eso e tukuna e dua tale na kalou tani e usumaka tiko o koya meda taura.

¹⁹A ra sa tauri koya ka kauta kina vanua cecere i Arepakusi, ka tarogi koya, erawa ni keimami kila nai vakavuvuli vou cava o mai vosataka tiko oqo vei keimami?

²⁰"Ni keimami se qai rogoca vakadua ena daligai keimami na ka oqo. O koya oqo keimami via kila nai balabale dina ni veika keimami rogoca."

²¹Vei ira na kai Aceni kei ira na tu vakavulagi kina, e sega ni dua na ka mera dau malele kina, ka vaka vo duadua ga ke ra rogoca e dua nai tukutuku vou. Na Nona Vosa Vei Ena Vale Levu (Aropakasi)

²²Sa qai lako o Paula me tucake tu mai ena vanua cecere, ka dau nodra i sotasota na tamata vuli ka kila ka o Arepakusi, ka tukuna mai, oi kemudou na kai Aceni, ni'u veiraiyaki ena veisaqata ni koro, au raica rawa na levu ni lotu dou dau cakava.

²³Ni'u lakova yani na veisaqata ni koro au raica na vanua ni nomudou dau lotu, au mani raica e dua nai cabocabo ni soro sa volai koto vaka oqo: KI VUA NA KALOU SA SEGA NI KILAI. Au tukuna vei kemuni, na cava o ni via lotu kina vua e dua na Kalou o ni sega ni kila:

²⁴Na Kalou ka bulia na vuravura kei na ka kecega sa tu kina, o Koya ga sa Turaga mai lomalagi kei vuravura oqo, sa sega ni tiko o koya ena vei vale ni lotu eda tara ena ligada.

²⁵E sega ni qaravi o Koya ena ka e bulia na tamata e ligana, ni sega vua na leqa, o koya ga e solia tiko na bula, na cagi meda ceguva kei na ka kecega.

²⁶E bulia o koya nai matai ni tamata (Atama) me vakai vakawataka na kawa tamata kecega i vuravura, ka sa lewa talega na nona cadra cake e dua na tamata kei na nona dromu sobu, kei na yalayala ni vanua me taukena,

²⁷Sai naki kecega ni ka oqo mera vakasaqarai Koya ka kunei Koya sara, ni sa sega ni yawa o koya mai vei keda;

²⁸Ni sa vu ni noda bula o koya, noda rawa ka kei na ka eda taukena, me vaka na ka e tukuna e dua nomudou dau ni serekali, 'Oi keda talega na luve ni Kalou.'

²⁹O koya oqo ni sa luve ni Kalou meda kakua kina ni nanuma ni Kalou e tautauvata kei na koula se siliva se na vatu se, na ka e ceuta ga na tamata ena nona vakasama.

³⁰E dina sara, na Kalou sa guilecava na gauna ni lecaika vaka oqori, ia sa vakarota e daidai na tamata kecega ena veivanua kecega mera veivutuni.

³¹"Baleta ni sa lokuci oti tu na siga ena lewai kina na vuravura ena Nona lewa dodonu, mai vua e dua na tamata sa lesia tu o Koya, me na vakayacora nai tavi oqo. Ena vakadinadinataka o Koya vei ira na tamata ni o koya oqo, ena Nona vakaturi Koya cake mai na mate."

³²Ni ra sa rogoca ni dua na tamata e tucake mai na mate, era qai vakasesei koya, e so tale era tukuna vua, "Keimami na via rogoci iko tale ena ka o cavuta tiko oqo."

³³Sa biuti ira o Paula ka lako tani mai vei ira.

³⁴E lewe vica era tomani koya ni ra sa mai vakabauta, e dua vei ira o Taionisio mai na mata bose cecere na Arepakusi, e dua talega na yalewa na yacana o Tamarisi kei na so tale.