[44] Cakacaka 18

¹Ni sa oti na veika oqo, sa biubiu mai Aceni o Paula me lako ki Koronica.

²A sa kunea kina e dua na Jiu ka yacana o Akuila, sa sucu mai Ponito, o koya kei na watina o Pirisila, e rau se qai yaco walega mai ena nodrau lako mai Itali (baleta nai vakaroi Kilotiu, me ra lako tani taucoko mai Roma na Jiu); sa lako o Paula vei rau.

³Sa la'ki tiko vata kei rau e nodrau vale o Paula ka cakacaka vata kei rau, ni rau dau cula vale laca na veiwatini oqo ka tautauvata talega kei Paula.

⁴Ena vei SigaTabu sa tu o Paula ena vale ni lotu me vakamacala vei ira na Jiu kei ira na kai Kiriki me rawai ira.

⁵Ni rau sa yaco mai o Sailasa kei Timoci ena nodrau sa lesu mai Masitonia, sa sega ni qai cegu tiko o Paula, ena nona vunautaka tiko vei ira na Jiu, ni sa Karisito o Jisu.

⁶Ia ni ra saqati koya ka vosavakacacataki koya tikoga na Jiu, sa kureitaki o koya na kuvu ni qele mai na nona I sulu, ka tukuna vei ira, "Na nomudou mate sa na baleti kemudou ga, Au sa vuluvulu mai kina. Tekivu oqo, Au sa na golevi ira sa na kai Veimatanitu Tani."

⁷A sa lako tani mai kea, ka lako kina vale ni dua na tamata ka yacana o Jasitusi, e tamata lotu dina, na nona vale e toka tikiva na vale ni lotu.

⁸Nai liuliu ni vale ni lotu o Kirisipo sa vakabauta na Turaga, kei ira talega nona matavuvale. E lewe levu vei ira na kai Koronica ni ra sa rogoca, era sa vakabauta era sa papitaisotaki sara.

⁹Ena dua na bogi a vosa kina na Turaga vei Paula ena raivotu, "Mo kakua ni rere, ia mo vosa tikoga, me kua ni dua na gauna mo cegu kina,

¹⁰"Ni'u sa tiko vata kei iko, ena sega ni rawa ni dua me via vala vata kei iko me vakacacani iko, ni lewe levu vei ira ena koro levu oqo sa Noqu tu."

¹¹Sa tikoga mai kea ena nona veivakavulici tiko ena vosa ni Kalou, me rauta ni dua na yabaki ka vula ono.

¹²Ia ni sa mai kovana e Akaia o Kalio, era sa lomavata na Jiu mera lako ka tauri Paula vakaukauwa, era sa qai kauti koya kina i tikotiko ni veilewai vua na kovana,

¹³Era tukuna, "Na tamata oqo sa cikevaka tiko vei ira na tamata, me ra qarava na Kalou ka sega ni vaka nai valavala ni vunau."

¹⁴Ni vakarau me vosa yani o Paula, sa vuki o Kalio ka vosa vei ira na Jiu, kevaka e voroki na lawa ni matanitu ena kisi oqo, io, au na vakarogoci kemudou na Jiu.

¹⁵"Ia kevaka me dua ga na veiletitaki ni tutu se dua na vosa vakasabalia, se dua nomudou lawa vaka Jiu, mo dou sa raica mada ga, na mataqali leqa vaka oqo au sega ni vinakata me'u vakatulewa kina."

¹⁶Sa cemuri ira taucoko mai na i tikotiko ni veilewai.

¹⁷O ira kece na kai Kirisi era sa tauri Sosiceni o koya sa lewa na vale ni lotu, era sa qai vakamokulaki koya ena mata ni tikotiko ni veilewai. Ia sa sega sara ga ni via kauwai kina o Kalio.

¹⁸E vica tale na siga nona tiko e kea o Paula sa qai tatau ni vakamoce vei ira na lewe ni lotu, ka sokota yani na baravi kei Siria, e rau sa lako vata kei koya o Akuila kei Pirisila mai Kenikiria ka la'ki koti tasi kina o koya ni cakava e dua nona bubului.

¹⁹Ni sa yaco mai Efeso nai lakolako oqo, sa biuti rau tu e keya; ia o koya sa lako ki vale ni lotu ka veiwasei vei ira na Jiu.

²⁰Era kerei koya me se tei tiko tale mada me vica na siga, e tukuna o koya ni sa sega ni rawa ni sa lekaleka sara tiko vua na gauna.

²¹Ni sa vakarau me biuti ira, sa qai tukuna, "E dodonu me'u tiko mai Jerusalemi me donuya na soqo ni marau mai oqo, ia au na lesu tale mai vei kemudou, kevaka sa lewa ni Kalou." A sa cavu i kelekele mai Efeso.

²²Ka la'ki kele tale na waqa ki Sisaria, a sa cabe cake me sotavi ira na soqosoqo lotu, yavi tale mai kea nai kelekele me soko sobu ki Anitioki.

²³Ni nona tiko vakalailai mai kea, sa biubiu tale mai ka lakova yani na veikorokoro ena yasana o Kalatia kei Firijia, ena nona veivakayaloqaqataki kei na nona vukei ira na tisaipeli, mera tubu cake vua na Turaga.

²⁴E dua na Jiu na yacana o Apolosa, e a sucu mai Alekisadaria, sa tamata dauvunau, ka qasenivuli titobu ni Vola Tabu, a sa lako mai o koya ki Efeso.

²⁵Na tamata oqo e sega ni vakamelei rawa na titobu ni nona i vakavuvuli kei na nona i vunau baleta na Turaga, e dina mada ga ni kila tu ga o koya e dua na tamata o Joni na dauveipapitaisotaki, ka sega tale ni dua e se kila o koya.

²⁶Ni vosa ena loma ni vale ni lotu e sega ni dau rere, Ena dua na siga e rau rogoci koya o Akuila kei Pirisila ni vosa tiko baleta na Turaga, ni oti mai na nona vunau katakata, rau sa qai kauti koya vakatikitiki ka la'ki vakamacalataka vua na bula i Karisito ni sa oti mai na gauna i Joni.

²⁷Sa mani nanuma o Apolosa me lako ki Akaia, era vukei koya na lewe ni lotu ena nodra volavola vei ira na lewe ni lotu mai kea mera ciqomi koya, ni sa yaco yani e vakatatataki cake na lewe ni lotu ena nona talaucaka nai tukutuku ni vakacegu.

²⁸E sega ni lolou sobu o koya ni tu ena matadra na lewe vuqa me vakacalai ira na Jiu, sa dusimaka ga vei ira nai Vola Tabu ni sa Karisito o Jisu.