[30] Emosi 5

¹Dou rogoca na vosa Au tukuna vei kemudou, na tagi vakararawa, na mataqali i Isireli:

²Era sa bale sobu na goneyalewa savasava ni Isireli; era na sega ni tucake tale, ena sega ni dua me vakatura cake tale, ena vanua e bale koto kina.

³Ni sa vosa vaka oqo o Jiova: "Na koro dau lewena tu e dua na udolu, ena vo ga kina e dua na drau, mai na dua na drau e vo era na qai kau tani me vo ga e lewe tini."

⁴Sa tukuna vakaoqo o Jiova kina mataqali i Isireli: "dou vakasaqarai Au mo dou bula kina;

⁵Dou kua ni vakasaqaqara ki Peceli, se curumi Kilikali, se lako ki Pieri-sepa o Kilikali ena kau vakabobula, o Peceli ena vakadravuisigataki.

⁶Dou vakasaqarai Jiova mo dou bula, de qai caudre mai vaka na buka nona cudru ena vale i Joseva, ka veivakarusai, ni sega ni rawa me dua e bokoca mai Peceli”

⁷Oi kemudou sa vukica na lewa dodonu me ka walega, ka buluta kina qele na i valavala e dodonu!"

⁸O koya e buli Peleadi kei Oraioni; e vukica na i yaloyalo ni mate me dua na mataka vinaka, e bulia na siga ni buto me bogi; e kaciva na wai ni wasawasa me drodrova yani na vanua mamaca; o Jiova na yacana.

⁹E vakamalumalumutaki ira na tamata qaqa, me vakarusai rawa kina na koro kaukauwa.

¹⁰Era cata na veivunauci e matana votu, ka ra sevaki koya edau vosa vakadodonu.

¹¹Ni dou sega ni kauwaitaka na dravudravua ka beci koya, ena nomudou kovea mai vua, nai sau ni kena sila me bula kina, e dina ni dou tara vale tiko ena vatu dou taya, dou na sega ni na tudei kina; dou na tea na veiwere ni vaini, ia dou na sega ga ni na gunuva na kena waini.

¹²Niu sa kila na nomudou dau talaidredre kei na bibi ni nomudou i valavala ca: Dou vakasesewani ira na lotu dina, ka taura nai lavo ena sala tani; ka vakauti ira cala na vakaloloma me kua ni ra kila na ka dodonu.

¹³O koya oqo era na sogota kina na gusudra na yalomatua, ni ra kila ni sega ni Vakalou na veika sa yaco tiko.

¹⁴Dou vakasaqara na vinaka ka sega na ka ca, mo dou bula kina; me rawa ni tiko kina kei kemudou o Jiova na Kalou ni lewe vuqa, me vaka na nona vosa.

¹⁵Dou cata sara na ka ca, ka taleitaka na ka vinaka; dou vakataudeitaki kemudou ena nomudou i tikotiko, de na qai yalololoma mai vei kemudou na mataqali i Joseva na kena e vo tiko, o Jiova na Kalou ni lewe vuqa.

¹⁶O koya oqo, sa tukuna kina o Jiova na Kalou ni lewevuqa: "Ena vakayacori na veitagicaki ena vei tutu ni sala, era na vaka'Oilei! Oilei! ni ra lako tu ena sauka ni sala era dau muria, era na tukuna vei ira na dauteitei mera tagi talega, kei ira na dauveiqaravi vei ira na mate me ra na tagi vakararawa talega.

¹⁷Mai na veiloga vaini me yaco tiko na tagi vakararawa, ni'u na lako yani kina" sa tukuna o Jiova.

¹⁸Ena ca vei kemudou ni dou gadreva na siga i Jiova! Na vinaka cava ni siga i Jiova vei kemuni? Ena yaco na buto rerevaki, ka sega na rarama.

¹⁹Ena vaka nona drotaka na laione e dua na tamata, ka waraki koya tu e dua na Pera! Se me curu kina dua na loma ni vale, ka tatabaki na ligana ki lalaga, qai katia mai na ligana e dua na gata daukata gaga!

²⁰E sega li ni siga i Jiova e butobuto ka sega na rarawa? E sega li ni butobuto ka sega kina na rarama?

²¹"Au cata, Au vakasisilataka nomudou siga ni solevu, Au sega talega ni taleitaka na nomudou dau vakasoqoni vata ena lotu.

²²Dina ni dou cabora vei Au nai soro kama kei na nomudou i sevu ni vuata, Au na sega ni vakadonua, Au na sega talega ni ciqoma nomudou i soro ni veivinakati o koya sa uro.

²³Dou kakua ni laga sere mai vei Au, ni'u sega ni via rogoca nai rorogo ni nomudou yaya ni qiriqiri.

²⁴Ia dou vakatara mada me drodro yani na lewa dodonu me vaka na wai, kei nai valavala dodonu me vaka na drodro ni wai kui kaukauwa.

²⁵"Vei kemuni na mataqali i Isireli, dou a dau cabora tiko vei Au, nai Soro Tabu kei nai soro ni vakavinavinaka ena loma ni vasagavulu na yabaki ena vanua dravuisiga?

²⁶Dou a colati sekutu na nomudou Tui kei kaiuni na nomudou matakau, oi rau nomudou ka domoni vei ira taucoko nomudou Kalou, dou a cakava ga ena ligamudou.

²⁷O koya qo Au na biuti kemudou mo dou kau vakabobula me sivi mai o Tamasiko." Sa tukuna o Jiova, na yacana na Kalou ni lewe vuqa.