[5] Vakarua 19

¹"Ni sa tamusuka na Kalou o Jiova na veimatanitu, na nodra vanua ena soli vei kemuni, o ni na vakasesei ira ka tiko ena nodra veikoro ena nodra veivale,

²"Mo ni vakatikitikitaka e tolu na koro vei kemuni ena nomuni vanua o koya sa solia veikemuni na Kalou o Jiova mo ni taukena.

³"Mo ni vakarautaka na kena gaunisala, ka wasea vakatolu na tikina ena nomuni vanua o koya sa solia veikemuni o Jiova na nomuni Kalou mo ni taukena, o koya sa vakamatea e dua na tamata me dro kina.

⁴"Na tamata laba oqo, ena bula kevaka sa veivakamatei ni a sega ni nakita, ni a sega ni cata na wekana oqo e liu.

⁵"Me vaka sa lako yani ki veikau e dua na tamata kei na wekana me ta kau, ka sa taura e ligana nai matau me taya na vunikau, qai cadruti mai ligana nai matau qai taya na wekana, ka mani mate saraOni sa dro ki na dua na koro ni drodro oqo, ena bula;

⁶"De qai yaco na veisausaumi ena dra ni se tiko na cudru katakata ena vuku ni mate kei na gaunisala talega ni sa rui yawa, sa tobo ka vakamatei na tamata o ya, e dina ga ni a sega ni nakita na nona veivakamatei.

⁷"O ni sa vakaroti kina oqo, 'Mo ni wasea e tolu na koro ni drodro vei kemuni.'

⁸"Kevaka sa vakalevutaka o Jiova na nomuni Kalou na nomuni yasana, me vaka sa bubuluitaka vei ira na qase, ka solia vei kemuni na vanua sa yalataka me solia vei ira na nomuni qase,

⁹"Kevaka o ni sa muria na i vakaro kece ni Kalou ka cakava, me vaka au sa vakarota vei kemuni ena siga oqo, o ya mo ni lomani Jiova na nomuni Kalou, ka lako tikoga ena nona sala, mo ni qai vakuria tale ena tolu na koro ni drodro me kuria na tolu sa tiko rawa,

¹⁰"De na qai vakadavea tikoga na dra sega cala ena vanua sa solia vei Kemuni o Jiova na nomuni Kalou me nomuni votavota ka me beitaki tiko ga vei kemuni na vakadave dra.

¹¹"Ia, kevaka ga e dua sa cata sara na wekana, ka sa toka vuni me vakamatei koya, ni sa mate oti, qai dro kina dua na koro oqo,

¹²"O ira na qase ni koro o ya, me ra qai kauti koya mai kea ka soli koya ki vei ira na wekana o koya sa mate, me vakamatei kina.

¹³"Me kua ni vakaloloku na matamuni, mo ni kauta tani e Isireli na yalo sa beitaki ni vakadave dra, me rawa ni vinaka kina vei kemuni.

¹⁴"Mo ni kua ni tosoya nai yalayala ni vanua o koya era sa biuta tu na qase ena nomuni votavota o koya o ni na taukena ena vanua sa solia o Jiova na nomuni Kalou.

¹⁵"E dua nai vakadinadina me kua ni tucake me beitaka e dua na tamata ena vuku ni caka cala se i valavala ca sa cakava, me rua se tolu nai vakadinadina me vakadeitaka na veibeitaki.

¹⁶"Kevaka sa tucake e dua nai vakadinadina lasu me vakadinadinataka e dua na caka cala,

¹⁷"Me rau qai tucake ruarua e na mata ni Kalou na lewe rua oqo, ena mata ni bete kei na turaga ni lewa talega, o ira sa veiqaravi ena gauna o ya.

¹⁸"Na turaganilewa me cakava e dua na vakatataro vakatotolo, kevaka sa lasu nai vakadinadina, o koya sa solia tiko nai vakadinadina lasu vua na tacina.

¹⁹"Me qai caka vua me vaka sa vinakata o koya me cakava vei tacina, mo ni qai biuta tani kina na tamata ca mai veikemuni.

²⁰"O ira sa vo tiko me ra rogoca ka rere, me kua tale kina ni dua e cakava na ka ca ena kemuni maliwa.

²¹"Me kua ni rai vakalomalomana tiko na matamuni, na bula ki na bula ga, na mata kina mata ga, na bati ki na bati, na liga ki na liga kei na yava ki na yava.