[21] Dauvunau 1

¹Na nona vosa na Dauvunau, na luvei Tevita, na tui Isireli.

²"Sa ka wale, sa ka wale," sa tukuna na Dauvunau, "Sa ka wale, sa ka wale, sa ka wale na ka kecega."

³Na cava na kena yaga vua na tamata ena nona oca kecega, o koya sa vakaogai koya kina ena ruku ni mata ni siga oqo?

⁴Sa lako mai e dua nai tabatamata, sa lako yani e dua tale nai tabatamata, na vuravura sai koya, koya tikoga.

⁵Sa cadra na siga, sa dromu tale na siga, sa cici ga yani vakatotolo ki na vanua me cadra tale mai kina.

⁶Sa liwa na cagi ki na ceva, sa vuki cake ki na vualiku, sa veitosoyaki tikoga na cagi ka sa tekivu tale na nona i lakolako.

⁷E ra sa drodro kece ga yani kina wasawasa na veiuciwai; io, sa sega ni sinai na wasawasa; Era sa lesu tale ki na veiuciwai era a drodro mai kina.

⁸E ra sa cakacaka na ka kecega, Sa sega ni vakamacalataki rawa, na mate sa sega ni raica rawa se me rogoca rawa na daliga.

⁹Na ka sa tiko oti, sa tiko oqo, ka sa na tiko ga, Na ka sa caka oti, sa caka tiko oqo, ka sa na caka tiko ga. Sa sega ni dua na ka vou sa caka ena ruku ni matanisiga oqo.

¹⁰Sa dua beka na ka me rawa ni tukuni kina, "Raica oqo na ka vou"? Oqo, e se tu sara mai na gauna e liu sara.

¹¹Sa sega na vakanananu ena ka sa oti Sa sega talega na vakanananu ena ka ena lako tiko mai vei ira ena muri mai.

¹²Oi au na Dauvunau, au a tui kei Isireli mai Jerusalemi.

¹³Au a sa vakarautaka na yaloqu me'u vakasaqara ka qara matua sara ena yalomatua me baleta na ka kecega ena rukui lomalagi oqo; e ka levu oqo, sa solia na Kalou vei ira na luve ni tamata, me ra cakacaka kina.

¹⁴Au sa raica kece na ka sa caka ena ruku ni matanisiga oqo, io, e dina, sa ka wale sara ka sa vaka ga na tobo cagi.

¹⁵Na ka sa veve, sa sega ni rawa ni vakadodonutaki, kei na ka sa sega sa sega ni rawa me wiliki tale.

¹⁶Au sa veivosaki kei na yaloqu ka tukuna vua, "Raica, au sa rawata na cecere, sa levu sara vei au na vuku mai vei ira kecega sa liu vei au e Jerusalemi. Na yaloqu sa rawata na vuku, na yalomatua kei na kila na ka kece."

¹⁷Sa vakarautaki na yaloqu me kila na ka kecega, na ka ca kecega, na lialia kecega. Au sa qai kila, ni sa vaka na tobo cagi walega.

¹⁸Ni sa levu na yalomatua, sa levu talega na rarawa, o koya sa vakalevutaka na vuku, sa vakalevutaka talega na tagi yaso.