[20] Vakaibalebale 31

¹Na vosa nei Tui Lemueli me vaka e a vosa kina vua o Tinana:

²Na cava, na luvequ? Na cava, na lewe ni ketequ? Na cava, na luve ni noqu yalayala?

³Kua ni solia na nomu kaukauwa ki vei ira na yalewa, Se, ki nai valavala era sa vakarusai kina na tui.

⁴Sa sega ni dodonu vua na tui, I Lemueli, Sa sega ni dodonu vua na tui me gunu waini, Se ki vei ira na turaga lalai me ra gunuva na gunu veiwaki;

⁵De ra qai gunu ka guilecava na lawa ni vanua ka vakatanitaka na lewa dodonu ena vukudra na vakararawataki.

⁶Solia na gunu veiwaki kaukauwa vei koya sa na rusa tiko kei na waini vei ira sa ca tiko na yalodra.

⁷Me gunu ka guilecava na nona dravudravua, Ka me kua tale ni nanuma na veika dredre e dau sotava e liu.

⁸Mo vosa ena vukudra na dau galu, ena vukudra o ira kecega sa lako tiko ki nai bulubulu.

⁹Mo dalaga, mo veilewai vakadodonu, mo vakabibitaka na nodra i tosotoso na dravudravua kei ira na vakaloloma.

¹⁰O cei sa rawa ni kunea na yalewa vinaka sara? Me sa i sau levu o koya ka lailai na rupi.

¹¹Sa dei na veivakabauti nei watina vua; Ka sa tubu tikoga na ka sa tu vua.

¹²Sa caka vinaka vei watina ena veisiga kecega sa bula kina.

¹³Sa vakasaqara na vuti ni sipi kei nai sulu, Sa marautaka na cakacaka ena ligana.

¹⁴Sa vaka na waqa ni voli ciri, ni sa kauta mai vakayawa na kena kakana.

¹⁵Sa dau yadra ni se bogibogi me vakarautaka na kedratou vakavuvale, kei na kena i votavota na goneyalewa dauveiqaravi.

¹⁶Ni sa raica e dua na qele ni sa volitaki tu, sa volia mai; na nona tubu sa tea kina e dua na were ni vaini.

¹⁷Sa vauca na tolona ena kaukauwa, ka sa vakakaukauwataka talega na ligana.

¹⁸Sa kila o koya ni sa vinaka na nona veivoli, ka sa sega ni boko na nona cina ena bogi.

¹⁹Sa dodoka vakamatau na ligana ena vuku ni kau ni culacula, kei na ligana sa taura na tutu ni i sulu.

²⁰Sa dodoka na ligana vei ira na dravudravua, Io, sa yaco sara na ligana vei ira na vakaloloma.

²¹Sa sega ni rerevaka na vulai liliwa ena vuku ni nona vuvale, ni ra sa vakaisulu ni katakata.

²²Sa cula vakamatau na nona i sulu. Na nona i sulu lineni rairai vinaka qai roka vinaka.

²³Sa kilai vinaka o watina ni curu mai ena matamata ni koro, ni sa mai tiko vata kei ira na turaga ni vanua.

²⁴Sa cula ka talia vakavinaka na i sulu ka sa dauvolitaka, sa vakarautaka vinaka nai ubi ni sulu qai volitaka vei ira na dauveivoli.

²⁵Na veivakaukauwataki kei na veidokai sa nona i sulu; E na marautaka na nona veisiga ni mataka.

²⁶Sa dauvosa vakayalomatua, ena yamena sa tu kina na lewa ni yalovinaka.

²⁷Sa vakaraica vinaka nai valavala ni nona loma ni vale, Ka sa sega ni kania na kakana ni vakawelewele.

²⁸Era na yadra mai na luvena ka kacivi koya ena veivakalouvinakataki; Na watina talega ena vakaqoroqoroi koya:

²⁹"Sa levu na yalewa era sa caka vinaka Ia, o iko sa uasivi sara."

³⁰Nai ukuuku sa veivakaisini, na rairai vinaka sa sega ni yaga, Na yalewa sa rerevaki Jiova sa vakacaucautaki.

³¹Solia vua na vua ni nona cakacaka Na nona cakacaka ga, ena vakaqoroqoroi koya ena matamata ni koro.