[17] Eseta 8

¹Ena siga o ya, na tui o Esirosi sa solia vei Eseta na ranadi, na vale nei Amani na kedra meca na Iperiu. Sa lako mai o Motekai ena mata ni tui, ni sa vakamacalataka oti na nodrau veiwekani.

²Sa luvata na nona mama ni taba na tui, ka solia vei Motekai, na mama vata ga e a tiko vei Amani; sa lesi Motekai o Eseta me lewa na vale nei Amani.

³Sa vosa tale vua na tui o Eseta, ka cuva sobu e yavana, ka vakamasuti koya ena wai ni mata me cakava e dua na ka me baleta na nakica sa cakava o Amani na Aqaqaite kei na kenai valavala ni veivakaleqai me baleti ira na Iperiu.

⁴Sa dodoka yani nai titoko koula vei Eseta ka sa tucake mai e mata ni tui o Eseta,

⁵Ka tukuna, "Kevaka sa vinaka vua na tui, kevaka talega au sa kune loloma e matana, me sa dodonu talega vua, ni'u sa vinaka e matana, me volai e dua nai vola me vakasukai kina na lewa sa biuta oti tu o Amani na luvei Amedaca na Aqaqaite, e a volai me ra a vakayali kina vakadua na kawa tamata na Iperiu “ mai na nona veiyasana kece na tui.

⁶"Me rawa vakacava ni'u sa vosota tiko na noqu raica na ca ena lakovi ira mai na noqu tamata? Se me'u na vosota rawa vakacava na nodra vakarusai na kai noqu?"

⁷Sa qai vosa mai o Esirosi na tui kivei Eseta na ranadi kei Motekai na Iperiu ka vaka: "Au sa solia vei Eseta na vale nei Amani, era sa vakamatei koya ena vatavata baleta ni sa via vakatauca na ligana vei ira na Iperiu.

⁸"Mo vola e dua na lewa vakalawa ena vukudra na Iperiu, me vaka ga o sa vinakata ena yaca ni tui ka dregata ena mama ni taba ni tui; nai vola kece sa volai ena yaca ni tui ka dregati ena mama ni taba sa tabu ni dua e vakacala."

⁹Era sa kacivi mai na vunivola ni tui, e nai ka tolu ni vula, na vula o Sivani, e na i ka ruasagavulu ka tolu ni siga; sa volai na veika kece me vaka nai vakaro nei Motekai, vei ira na Iperiu, na vakailesilesi vakamatanitu, na kovana, na turaga ni veiyasana, mai Idia ki Eciopea, dua na drau ruasagavulu ka vitu na yasana kece, na veiyasana e na nodra i vola tukutuku, na vei tamata yadua e na nodra dui vosa, na Iperiu ena nodra i vola tukutuku kei na nodra vosa.

¹⁰Sa vola na yaca i Esirosi na tui, sa dregata ena mama ni taba ni tui ka vakauta nai vola ena ligadra na dau ni vakauitukutuku era vodo ose, era vodo ena ose vakaturaga era susugi.

¹¹E nai vola oqo, era vakadonui kina na Iperiu era sa tiko e na veikoro kece me ra tiko vata ka taqomaka na nodra bula O me ra vakarusa, vakamatea, vakaqeavutaka na kaukauwa ni tamata, matanitu se cava ga e via tarai ira yani, o ira na gone, na yalewa se na ka era taukena,

¹²E dua ga na siga ena yasana taucoko nei Esirosi na tui, nai ka tinikatolu ni siga ni ka tinikarua ni vula na vula o Adari.

¹³Sa soli nai vola tabaki ka sa vakalawataki ki na veiyasana ka volai vei ira na tamata kecega, ni ra sa vakarau tu na Iperiu ena siga koya me ra vala lesu vei ira na kedra meca.

¹⁴O ira na kauta nai tukutuku, era sa vodo ena ose vakaturaga ka lako yani vakatotolo ka vakaqaqataki e nai vakaro vakalawa oqo mai Susani na vanua cecere.

¹⁵Sa lako tani o Motekai mai na mata i Esirosi na tui e nai sulu vakaturaga e karakarawa kei na vulavula, nai sala koula kei na lineni vinaka ka lokaloka; sa reki vakalevu na koro o Susani ka era sa mamarau.

¹⁶O ira na Iperiu era sa vakararamataki, era marau ka reki ka vakarokorokotaki.

¹⁷Ena veiyasana kece, na veikoro kece sa lako yani kina nai vakaro kei nai vakasala vakalawa kece ni tui, era sa mamarau na Iperiu ka reki vakalevu, era sa vakarautaka na kena magiti, kei na siga ni vakacegu. Sa levu sara na tamata ena vanua era sa vuki me ra wili vei ira na Iperiu baleta ni ra sa rerevaki ira vakalevu na Iperiu.