[17] Eseta 9

¹E nai ka tinikarua ni vula o Adari, ena i ka tinikatolu ni siga, sa yaco na gauna me sa vakayacori kina na nona i vakaro vakalawa na tui. Ena siga era sa namaka kina o ira na kedra meca na Iperiu me ra sa tauri ira, sa qai yaco na kena veibasai, o ira na Iperiu era sa kaukauwa mai vei ira na meca.

²Era sa soqoni vata mai na Iperiu ena veikoro ena vanua taucoko nei Esirosi na tui me ra tarai ira ka vakamalumalumutaki ira kece na meca. Sa sega e dua sa rawa ni tarovi ira baleta ni sa tarai ira kece na rere.

³O ira kece na vakailesilesi ni veiyasana, na vunivola, na kovana kei ira kece sa dau cakava na cakacaka ni tui, era sa vukei ira na Iperiu ena vuku ni ra sa rui rerevaki Motekai.

⁴Sa rui levu o Motekai ena vale ni tui, na kena i rogorogo sa robota na yasana taucoko; na tamata oqo o Motekai sa tubu vakalevu na nona nuitaki.

⁵O ira na Iperiu era sa vakamalumalumutaka na kedra meca kecega e nai seleiwau kei na veivakamatei vakaca, ka ra sa cakava ga na ka era vinakata vei ira na meca.

⁶E Susani era sa vakamatei kina e lima na drau na tagane.

⁷O Parasanadaca, o Dalifoni, o Asipaca,

⁸O Poraca, o Adalia, o Aridaca,

⁹O Parimasata, o Arisai, o Aridai kei Vajesaca”

¹⁰na tini na luvei Amani oqo na kedra meca na Iperiu era sa vakamatea” era sa sega ga ni taura e dua na ka.

¹¹Ena siga o ya sa kau mai vua na tui nai wiliwili ni tamata era sa vakamatei e Susani.

¹²Sa tukuna na tui vei Eseta, "o ira na Iperiu era sa vakamatea e lima na udolu na tagane e Susani na cecere kei iratou na luvei Amani. Na cava sa caka e na kena vo ni veiyasana? ena vakadonui vei iko, se cava o sa vinakata? ena vakayacori vei iko."

¹³Sa tukuna mai o Eseta, "kevaka sa vinaka vua na tui, me vakadonui vei ira na Iperiu sa tiko e Susani, me mataka tale me vaka ga na lewa ni siga ni kua me ra vakaliligi tale na luvei Amani ena vatavata."

¹⁴Sa lewa tale na tui me vakayacori oqo, sa soli na lewa ka ratou sa vakaliligi na luvei Amani e tini oqo.

¹⁵Era sa soqoni tale mai na Iperiu e Susani e nai ka tinikava ni siga ni vula o Adari, era sa vakamatea e tolu na drau na turaga e Susani ka ra sa sega ga ni taura e dua na ka e taukeni.

¹⁶O ira kece na vo ni Iperiu ena veiyasana era sa soqoni vata me ra na taqomaki ira, era sa galala mai vei ira na kedra meca, era sa vakamatea e vitusagavulu ka lima na udolu na kedra meca; era sa sega ga ni taura e dua na ka e taukeni.

¹⁷Oqo nai ka tinikatolu ni siga ni vula o Adari. E nai ka tinikarua ni siga ni vula era sa vakacegu, ka me sa nodra siga ga ni kana kei na marau.

¹⁸O ira na Iperiu e Susani sa cecere, era sa soqoni vata e nai ka tinikatolu ni siga, nai ka tinikava ni siga, nai ka tinikalima ni siga ni vula o Adari era sa vakacegu tiko kana ka marau tiko.

¹⁹O ira kece na Iperiu sa tiko ena veikoro lalai sa sega ni vakabai, era sa daumarautaka nai ka tinikava ni siga ni vula o Adari me siga ni kana marau kei na vakacegu, ka vakau i loloma mai vua e dua ki na dua tale.

²⁰Sa vola oqo o Motekai ka vakauta vei ira na Iperiu na veika oqo, vei ira kece sa tiko ena veiyasana nei Esirosi na tui, vakavoleka se vakayawa,

²¹me vakadeitaka vei ira ni oqo na soqo ni veiyabaki ka me daucaka e nai ka tinikava kei na tinikalima ni siga ni vula o Adari,

²²Ena veisiga ni ra sa vakacegu tiko na Iperiu mai vei ira na kedra meca, me vaka na vula sa veisau mai na veivakararawataki ki na marau vei ira, na tagi vakararawa ki na vakacegu; me ra cakava vei ira na kana kei na marau kei na vakau i loloma vei ira na dravudravua.

²³Era sa ciqoma na Iperiu nai tovo oqo o koya era sa tekivutaka, me vaka sa vakadeitaka o Motekai ni sa vola vei ira,

²⁴Baleta ni o Amani na luvei Amedaca na Aqaqaite na kedra meca na Iperiu, e a bucina me ra vakarusai na Iperiu ka caka na kena vakawirimadigi me ra sa vakarusai;

²⁵Ia ni sa lako ki vua na tui o Eseta, sa vola nai vakaro e nai vola ni buki vere sa cakava o Amani, e na vukudra na Iperiu, e dodonu me vakalesui tale ki vei koya, o koya kei ira kece na luvena me ratou vakaliligi ena vatavata.

²⁶Era sa vakatoka na siga o ya me Purimi, e vakatoka yaca mai na Puri. Nai vola oqo, mo ni kila kina na ka sa yaco kei na ka sa vakayacori vei iratou,

²⁷O ira na Iperiu era sa vakadeitaka ka vakaukauwataka vei ira kei ira na nodra kawa kei ira na sa sema mai vei ira, me kua tale ni tao na kena marautaki na rua na siga oqo ena veiyabaki me vaka nai vakamacala sa volai oti yani me vaka na veika me caka,

²⁸Na siga oqo e dodonu me vakananumi ka maroroi e nai tabagauna kecega, ki na vuvale kecega, na yasana kecega, na koro kecega, ni siga oqo ni Purimi me kua ni mudu na kena vakayacori tiko e na kedra maliwa nai tabatamata.

²⁹O Eseta na ranadi na luvei Abiali, kei Motekai na Iperiu, sa vola nai vola, na vakatulewa me vakadeitaka na lewa ni Purimi.

³⁰Sa vakauta o Motekai nai vola ki vei ira kece na Iperiu, ki na dua na drau ruasagavulu ka vitu kece na yasana e na matanitu nei Esirosi na tui vata kei na vosa ni veivakacegui kei na dina,

³¹Me vakadeitaki na veisiga vakaoqo ni Purimi kei na kena gauna me vaka sa lewai mai vei Motekai kei Eseta na ranadi. Sa tau na lewa oqo vei rau kei ira kece na kawa vaka Iperiu me baleta tiko na nodra lolo kei na nodra vutugu tiko.

³²Na lewa nei Eseta sa vakadeitaka na ka oqo na vuku ni Purimi, ka sa volai e na dua nai vola.