[2] Lako Yani 1

¹Oqo na yacadra na luvei Isireli era sa lako mai ki Ijipita: na tamata kei na nona vuvale era sa lakovata mai kei Jekope:

²O Rupeni, Simione, Livai, kei Juta;

³O Isakari, Sevuloni, kei Penijamini;

⁴O Tani, Navitalai, Kata kei Esa.

⁵O ira kece na kawa i Jekope sa vitusagavulu na tamata (ni sa tiko rawa mai Ijipita o Joseva).

⁶Sa mate o Joseva kei ira na tacina kece kei na kawa tamata o ya.

⁷Ia, o ira na luvei Isireli era sa vuavuai ka tubu me lewe levu, era sa tubu me lewe levu sara, ka era tamata qaqa, era sa vakasinaita talega na vanua.

⁸Sa tubu cake mai e dua na tui vou e Ijipita ka sa sega ni kilai Joseva.

⁹Sa tukuna vei ira na nona tamata, "Mo ni raica oqo, o ira na luvei Isireli era sa lewe levu ka kaukauwa vei keda;

¹⁰"Me da cakacaka mada vakavuku vei ira, ni ra sa lewe levu tiko ka yaco ni sa basika mai na i valu, era sa na to vata kei ira na meca ka valuti keda tale ka lako tani mai na vanua."

¹¹Era sa vakavuna na cakacaka me ra vakararawataki kina ena nodra oca. Era sa tara vei Fero na veikoro o, Picomi kei Ramisesi.

¹²Na levu ga ni nodra vakararawataki, sa vakavuna me ra sa tubu ga kina vakalewe levu. Oqo sa vakatubura talega na nodra rere na Ijipita me baleti ira na luvei Isireli.

¹³O ira na Ijipita era sa vakacakacakataki ira na Isireli vakararawa sara.

¹⁴Oqo, sa vakavuna na nodra bula vaka dredre na Isireli”Na cakacaka kecega era sa kitaka sa ka ni oca kei na veivakararawataki.

¹⁵Sa vosa vei ira na dauvakasucu gone o tui Ijipita. Sa dua vei ira o Sifira ka kena i karua o Pua;

¹⁶Sa tukuna vakaoqo: "Ni drau sa vakasucuma e so na Iperiu ka raica ni sa tagane, mo drau qai vakamatea, kevaka e yalewa me bula ga."

¹⁷O ira na dauveivakasucumi oqo, era sa rerevaka na Kalou, era sa sega ni vakayacora me vaka e vakarota na tui, ia era sa vakabulai ira ga na gone tagane sa vakasucumi.

¹⁸Sa kacivi ira na dauveivakasucumi na tui ka tarogi ira, "Na cava sa caka kina oqo, ni ra sa vakabulai na gone tagane?"

¹⁹Era sa tukuna vei Fero, "O ira na Iperiu era sa duidui mai vei ira na Ijipita, ni ra sa vakasucu rawa, ni bera ni yaco yani na daunivakasucu."

²⁰Sa caka vinaka na Kalou vei ira na dauveivakasucumi, ka era sa tubu ga me lewe levu na tamata ka era sa tamata kaukauwa sara.

²¹Sa yaco tiko oqo, baleta ni ra sa rerevaka tiko na Kalou o ira na dauveivakasucumi, ka sa veivakarautaki vei ira na Kalou.

²²Sa solia na i vakaro vei ira na nona tamata o Fero ka vaka: "Me ra vakamatei kece na gone tagane era vakasucumi ka viritaki ki na uciwai, o ira ga na gone yalewa me ra vakabulai."