[2] Lako Yani 19

¹Ena i katolu ni vula ena nodra sa lako tani mai Ijipita na Isireli, ra sa yaco mai ki na Vanua Liwa e Sainiai ena siga vata ga era biuti Ijipita mai kina.

²Era a sa lako tani mai Refidimi ka yaco mai ki na Vanua Liwa e Sainiai, era sa mai tiko ena vanua liwa na Isireli me veidonui na ulunivanua.

³Sa lako cake vua na Kalou o Mosese, ka sa kaci mai vua o Jiova mai na ulunivanua ka vaka: "Mo tukuna vakaoqo ki na vale i Jekope, mo vosa ki na nodra vale na luvei Isireli:

⁴'O ni sa raica na veika Au a cakava vei ira na kai Ijipita, kei na noqu roqoti kemuni me vaka na taba ni ikeli ka kauti kemuni mai ki vei Au.

⁵'Oqo, kevaka ga o ni talairawarawa kina domoqu ka muri na Noqu veiyalayalati, o ni na qai i yau talei sara vei Au mai vei ira na tamata kecega; ni sa Noqu kecega o vuravura.

⁶'O ni na mata bete vakaturaga vei Au, na matanitu tabu.' Oqo na veivosa mo ni tukuna vei ira na luvei Isireli."

⁷Sa lako mai o Mosese ka kacivi ira na qase ni Isireli ka tukuna vei ira na vosa kece oqo, me vaka sa vakarota vua o Jiova.

⁸Era sa sauma kece mai na tamata ka vaka, "Na veika kece sa tukuna o Jiova, keimami na cakava." Sa vakasuka kece vei Jiova o Mosese na ka era sa tukuna na Isireli.

⁹Sa qai tukuna o Jiova vei Mosese, "Raica, Au na lako mai vei kemuni ena o vavaku, me ra na rogoca kina na tamata ni Au sa vosa vei iko, ka vakabauti iko me sega ni mudu." Sa tukuna o Mosese na nodra vosa na tamata vei Jiova.

¹⁰Sa qai tukuna o Jiova vei Mosese, "Lako vei ira na tamata ka vakasavasavataki ira e dai, kei na siga ni mataka, raica me ra savata na nodra i sulu.

¹¹"Me ra vakarau tu ena i katolu ni siga. Ni ena i katolu ni siga, o Jiova ena lako sobu mai na ulunivanua o Sainiai ena matadra kecega na tamata.

¹²"O na vauci ena vukudra kecega era sa tiko vakavoliti iko ni sa tukuni, 'Mo ni qarauni kemuni, ni kemuni sa sega ni lako cake ki na ulunivanua se tara na kena yavu. o koya sa tara na ulunivanua sa na vakamatei vakaidina.

¹³'Me kua ni dua na liga me tarai koya, me vakaviriki ga ena vatu se vanai ena dua na dakai titi; se tamata se manumanu, me kakua ni vakabulai.' Ni sa rogo vakabalavu na davui, me ra qai lako mai vakavoleka ki ulunivanua."

¹⁴Sa qai lako sobu mai na ulunivanua o Mosese ki vei ira na tamata ka vakasavasavataki ira, ka era sa savata na nodra i sulu.

¹⁵Sa qai tukuna vei ira na tamata, "Ni tu vakarau e na i ka tolu ni siga mo ni kua ni lako voleka vei ira na watimuni."

¹⁶Sa qai yaco ena i katolu ni siga, ena mataka, sa kurukuru kecega na vanua ka livaliva mai, sa dua na o vavaku sa tiko ena ulunivanua; sa rorogo vakalevu na domo ni davui, o ira kece na tamata era sa sautaninini.

¹⁷Sa qai kauti ira tani mai na tamata o Mosese me ra mai sota kei Jiova na Kalou, era sa tu mai na rukuni ulunivanua.

¹⁸Na Ulunivanua o Sainiai sa ubi taucoko tu ena kubou, baleta ni sa lako sobu mai kina o Jiova ena bukawaqa caucaudre. Sa lako cake na kubou me vaka mai na lovo. Sa yavavala vakalevu sara na ulunivanua.

¹⁹Ni sa uvu tiko vakabalavu ka sa rogo levu tiko ga mai na davui, sa vosa o Mosese ka sa sauma mai na Kalou ena rorogo.

²⁰Sa lako sobu mai o Jiova ki na Ulunivanua Sainiai. o Jiova, sa kacivi Mosese cake mai ki na ulunivanua. Sa lako cake yani o Mosese.

²¹Sa tukuna o Jiova vei Mosese, "Mo vakaroti ira na tamata, de so e via lako sivita mai na i yalayala ni ra via raici Au mai, era na rusa dina.

²²"O ira talega na bete era sa lako voleka mai vei Jiova, me ra vakasavasavataki ira, de qai vakacacani ira o Jiova."

²³Sa vosa o Mosese vei Jiova ka vaka, "Era sa sega ni rawa ni lako cake mai na tamata baleta ni Kemuni sa vakaroti ira, ena Nomuni tukuna, 'Me tiko e dua na i yalayala ena Ulunivanua o Sainiai ka me vakatabui.'"

²⁴Sa tukuna vua o Jiova, "Lako, lako sobu ka lako cake mai, o iko kei Eroni. Sa tabu ni dua na bete se tamata me takosova, se basuka mai na i yalayala ka lako mai vei Jiova, de qai vakacacani kemuni."

²⁵Sa lako sobu o Mosese vei ira na tamata ka tukuna vei ira na veika oqo.