[2] Lako Yani 20

¹Na Kalou sa vosa ka tukuna na veika kece oqo:

²"Oi au o Jiova na nomuni Kalou, Au sa kauti kemuni tani mai na vanua o Ijipita mai na vanua ni veivakabobulataki.

³"Me kua tale ni dua na Kalou vei kemuni, Oi Au ga.

⁴"Mo ni kua ni cakava vei kemuni e dua na i vakatakarakara ceuti O se me dua na ka e veivakatautauvatanitaki ena ka mai lomalagi, se, e vuravura se, ena ruku i vuravura;

⁵Mo ni kua ni cuva vei ira se qaravi ira. Ni sai Au o Jiova na Nomuni Kalou, oi Au na Kalou Vuvu, ka Au dau vakabasikata yani vei ira na gone ena i katolu kei na i kava ni tabatamata, na nodra caka cala na qase, o ira sa dau cati Au,

⁶Ia, Au sa dauvakaraitaka na loloma, ki vei ira na vakaudolu, vei ira sa lomani Au ka maroroya na Noqu i vakaro.

⁷"Mo ni kakua ni vakawaletaka na Yaca i Jiova na Nomuni Kalou, ni na sega ni vosoti ira sa vaka kawaletaka na Yacana.

⁸"Mo ni nanuma na i kavitu ni siga, ka mo ni maroroya me ka tabu.

⁹Me ono na siga ni cakacaka, ka me caka kina na cakacaka,

¹⁰Ena i kavitu ni siga, sa Siga ni Vakacecegu i Jiova na Nomuni Kalou. Mo ni kua ni cakava kina e dua na cakacaka: kemuni se o ira na luvemuni tagane se yalewa, se o ira na dauveiqaravi tagane se yalewa, se na bulumakau se o ira na vulagi sa tiko ena nomuni loma ni bai.

¹¹E ono na siga, o Jiova sa bulia kina na lomalagi kei na vuravura, na wasawasa kei na ka kece sa tu kina, sa vakacegu ena i ka vitu ni siga. o Jiova sa vakalouvinakataka na siga ni vakacegu ka doka.

¹²"Mo vakarokorokotaki rau na tamamu kei na tinamu, me balavu kina na nomuni veisiga ena vanua sa solia vei kemuni o Jiova na Nomuni Kalou.

¹³"Mo ni kua ni laba.

¹⁴"Mo ni kua ni cakava na veidauci.

¹⁵"Mo ni kua ni butako.

¹⁶"Mo ni kua ni beitaka vakailasu na wekamuni.

¹⁷"Mo ni kua ni kocova na vale nei wekamuni; Mo ni kua ni kocova na watina na wekamuni, se na nona dauveiqaravi na wekamuni, se na nona manumanu se dua ga na ka sa nona na wekamuni."

¹⁸O ira na tamata kece, era, sa vakadinadinataka na kurukuru kei na yaseyase, na rorogo ni davui kei na kena sa kubou mai na ulunivanua, ni ra sa raica na tamata na veika oqo, era sa sautaninini ka tu vakayawa.

¹⁹Era sa tukuna vei Mosese, "Mo vosa mai, ni keimami na vakarorogo, me kua ga ni vosa vei keimami o Jiova de keimami na qai mate."

²⁰Sa tukuna o Mosese vei ira na tamata, "Mo ni kakua ni rere: ni sa lako mai o Jiova me vakatovolei kemuni, me tiko kina na rerevaki Jiova vei kemuni, mo ni kua kina ni valavala ca."

²¹Era sa tu vakayawa na tamata, o Mosese ga sa qai toso voleka yani ki na vanua sa tu kina na Kalou.

²²Sa tukuna o Jiova vei Mosese, "Mo tukuna vaka oqo vei ira na luvei Isireli; 'O ni sa raica ni, Au a sa vosa vei kemuni mai lomalagi.

²³'Mo ni kua ni cakava e dua na ka me tiko vata kei Au O na Kalou ni siliva se Kalou ni koula, mo ni kua ni cakava vei kemuni.

²⁴'Nai cabocabo ni soro qele, mo ni cakava vei Au, mo ni vakacabora kina na i soro kama kei na i soro ni veivinakati, na nomuni sipi kei na nomuni bulumakau. Ena vanua kecega sa teivaki kina na Yacaqu, Au na lako mai kina vei kemuni ka Au na vakalouvinakataki kemuni kina.

²⁵'Kevaka o ni sa cakava vei Au na i cabocabo ni soro vatu, mo ni kua ni cakava ena vatu sa bini oti tu. Kevaka o ni sa cakava ena i yaya ni cakacaka, o ni sa vakadukadukalitaka.

²⁶'Mo ni kua ni lako cake ena i kabakaba ki na Noqu i cabocabo ni soro, de na qai laukune kina na nomuni luvawale.'