[2] Lako Yani 31

¹Sa vosa o Jiova vei Mosese ka vaka:

²"Raica, Au sa kacivi Besalieli ena yacana na luvei Urei, na luvei Uri ena yavusa o Juta.

³"Au sa vakacuruma vua na Yalo ni Kalou, ena yalomatua, ena vuku kei na kila ka, kei na i valavala kecega ni cakacaka vakamatai,

⁴"Me tuvana vakamatau na cakacaka, me vakayagataki kina na koula, na siliva kei na varasa,

⁵"Na kena musumusuki na vatutalei kei na kena tuvani yani, na ceuti ni kau kei na cakacaka kecega vakamatei.

⁶"Oi Au, vakaidina, Au sa digitaki Aoliapi talega na luvei Aisamaki mai na yavusa o Tani, ka, Au sa biuta na vuku “ yalomatua ki na yalodra kecega na cakacaka vakamatai, me rawa ni ra na cakava kece, me vaka Au sa vakarota vei iko:

⁷"Na vale ni veitavaki, na kato ni vakadinadina, kei na i dabedabe ni yalololoma sa toka e dela ni kato, kei nai yaya kece ni vale ni veitavaki”

⁸"Na teveli kei na kena i yaya, na i tutu ni cina kei na kena i yaya kece, na i cabocabo ni soro ni ka boi vinaka,

⁹"Na i cabocabo ni soro ni soro kama kei na kena i yaya kece, na dari kei na kena i dabedabe”

¹⁰"Na i sulu ni veiqaravi, nai sulu tabu nei Eroni na bete, kei na nodratou i sulu na luvena ena vuku ni cakacaka vakabete,

¹¹"Kei na i lumu ni veilumuti kei na ka boi kamikamica ni tikina tabu. Me ra cakava me vaka Au sa vakarota vei iko."

¹²Sa vosa o Jiova vei Mosese ka vaka,

¹³"Mo vosa vei ira na luvei Isireli ka tukuna: 'mo ni maroroya vakaidina na Noqu Siga ni Vakacecegu, ni sai koya oqo na i vakatakilakila ki na i taba tamata kecega, mo ni kila kina ni sai Au o Jiova, sa vakasavasavataki kemuni.

¹⁴'Mo ni maroroya na Siga ni Vakacecegu, ni sa tabu vei kemuni. o koya vakayadua sa vakacacana, me vakamatei, o koya sa cakacaka kina, me qai musuka tani mai vei ira na nona tamata.

¹⁵'Me caka na cakacaka ena ono na siga, na i kavitu ni siga, sa siga ni vakacegu, ka sa tabu vei Jiova. o koya sa cakacaka ena Siga ni Vakacecegu, sa na vakamatei o koya oqori.

¹⁶'Ena vuku ni ka oqo, me ra maroroya kina na Siga ni Vakacecegu na Isireli, me ra maroroya oqo ki na i tabatamata kecega, oqo na veiyalayalati e sega ni mudu.

¹⁷'Oqo nai vakatakilakila mai vei Au kei ira na luvei Isireli me sega ni mudu; ni ono na siga sa cakava o Jiova na lomalagi kei na vuravura, e nai ka vitu ni siga sa vakacegu ka vakabulabula.'"

¹⁸Ni sa oti na nona vosa tiko vei Mosese ena ulunivanua o Sainiai, o Jiova, sa qai solia vei Mosese e rua na vatu ni Vakadinadina, sa volavola kina na liga ni Kalou.