[2] Lako Yani 32

¹Ni ra sa raica na tamata ni sa berabera na nona lako sobu mai o Mosese mai na ulunivanua. Era sa soqoni vata na tamata vei Eroni ka tukuna vua, "Mai cakava mada vei keimami na Kalou, me liu vei keimami; na tamata oqo o Mosese, na tamata sa kauti keimami tani mai Ijipita, keimami sa sega ni kila se cava sa yaco vua."

²Sa tukuna vei ira o Eroni, "Mo ni kauta kece mai na koula sa tiko e daligamuni, na watimuni, na luvemuni tagane, na luvemuni yalewa, mo ni kauta mai vei au."

³Era sa kauta mai na koula sa tu vei ira, o ira na tamata kecega, ka solia vei Eroni.

⁴Sa ciqoma na koula mai na ligadra, ka sa bulia vakavinaka ena i yaya ni tulituli, ka sa kune sara e dua na luveni bulumakau buli. Era sa tukuna mai na tamata, "Oqo na nomuni Kalou, Isireli, o koya sa kauti kemuni tani mai Ijipita!"

⁵Ni sa raica o Eroni, sa tara e dua nai cabocabo ni soro, ka cakava e dua na vakatutu ka vaka, "Ni mataka na Solevu vei Jiova."

⁶Era sa yadra ena mataka ka dua, ka vakacabora na i soro kama, ka kauta mai nai soro ni veivinakati, era sa dabe sobu na tamata ka kana, ka gunu, ka tucake, ka veiqitori.

⁷Sa vosa o Jiova vei Mosese, ka vaka: "Lako sobu, o ira na nomu tamata o a kauti ira mai Ijipita, era sa vakadukadukalitaki ira.

⁸"Era sa vuki tani vakatotolo mai na sala Au a vakarota vei ira. Era sa cakava vei ira na luve ni bulumakau buli, era sa lotu kina ka vakacabo i soro kina, ka tukuna tiko, 'Oqo na nomuni Kalou, Isireli, o koya sa kauti kemuni tani mai na vanua o Ijipita!'"

⁹Sa qai tukuna vei Mosese o Jiova, "Au sa raici ira na tamata oqo, e dina, era sa tamata domoqa!

¹⁰"Oqo, mo laivi Au mada, me vakamai ira na Noqu cudru, ka Me'u kani ira. Au na cakava mai vei iko e dua na matanitu levu."

¹¹Sa vakamamasu o Mosese vei Jiova na nona Kalou ka vaka: "I Jiova ena cava sa rui katakata kina na Nomuni cudru ena vukudra na Nomuni tamata, o ira, o ni sa kauti ira tani mai Ijipita ena kaukauwa levu kei na ligamuni qaqa?

¹²"Na cava me ra vosa kina na Ijipita ka tukuna, 'Sa kauti ira tani mai, me mai vakamavoataki ira ka vakamatei ira ena veiulunivanua ka vakayali ira mai na matai vuravura?' Mo ni vukica tani na Nomuni cudru katakata, ka vakagolea tani na ca levu oqo mai vei ira na nomuni tamata.

¹³"Mo ni nanumi Eparama, Aisake, kei Isireli, na Nomuni tamata o ni a yalayala ga kina vakai Kemuni, ka tukuna, 'Au na vakalevutaka na nomu kawa me vaka na kalokalo ni lomalagi; kei na vanua kece oqo, Au na solia vei ira na nomu kawa, me ra taukena ka sega ni mudu.'"

¹⁴O Jiova sa vakamamadataka na nodra cudruvi na Nona tamata me vaka sa tukuna oti.

¹⁵Sa lako sobu mai na ulunivanua o Mosese kei na rua na vatu ni tukutuku sa tiko e ligana. Na vatu oqo sa volai ena yasana ruarua; sa volai ena yasana ka dua kei na yasana tale ka dua.

¹⁶Na vatu oqo sa cakava ga na Kalou, na volavola sa volavola ga na Kalou, ceuti ena vatu.

¹⁷Ni sa rogoca o Josua na rorogo mai vei ira na tamata ni ra sa kaikaila tiko, sa tukuna sara vei Mosese, "Sa tiko e dua na rorogo ni valu ena i tikotiko."

¹⁸Sa tukuna mai o Mosese: "Oqori sa sega ni rorogo ni kena kailavaki na qaqa, se, na rorogo ni druka, sa rorogo ga ni lagalaga sere."

¹⁹Ni sa lako voleka mai kina nodra i tikotiko, sa raica na luve ni bulumakau kei na veimeketi. Sa katakata mai na cudru nei Mosese, ka sa viritaka na vatu sa tu e ligana ka vorolaka ena i butubutu ni ulunivanua.

²⁰Sa taura na luve ni bulumakau ka vakama ena bukawaqa ka vorovorolaka vakalalai ka kaburaka yani ki wai ka cakava me ra gunuva na luvei Isireli.

²¹Sa tukuna o Mosese vei Eroni, "Na cava era sa cakava vei iko na tamata oqo mo cakava kina e dua na i valavala ca vei ira?"

²²Sa sauma o Eroni ka vaka: "Mo raica me kua ni yaco na cudru katakata i Jiova. o sa kilai ira na tamata ni ra sa tu oqo ena ca.

²³"Ni ra sa tukuna vei au na tamata, 'Mo cakava vei keimami na Kalou me liu tiko vei keimami; ni o Mosese, na tamata sa kauti keimami tani mai na vanua o Ijipita, keimami sa sega tiko oqo ni kila se cava sa yaco tiko vua.'

²⁴"Au na qai tukuna vei ira, 'Me ra kauta mai na koula ki vei au, sa qai vakamai na koula kece oqo,' ka sa basika kina na luveni bulumakau."

²⁵Ni sa raica o Mosese ni ra sa sega ni tarovi rawa, (ni sa sega ni cakava rawa e dua na ka o Eroni, era na madua ga vata kei ira na meca),

²⁶Sa tucake tu ena matamata ni tikotiko o Mosese ka tukuna; "O cei sa tiko ena yasa ni Kalou me lako mai ki ke." Era sa lako kece mai vua na luvei Livai ka soqoni vata kece vua.

²⁷Ka tukuna, "Sa tukuna vaka oqo o Jiova na Kalou e Isireli, 'O ira na tamata oqo me ra biuta nai seleiwau e tutudra, ka me ra lako yani ka lako mai ena i curucuru kecega ni tikotiko, me ra vakamatea na tamata kecega, na tacidra, na nona i tokani kei ira na wekadra.'"

²⁸O ira na luvei Livai era sa cakava me vaka na vosa i Mosese. Era sa vakabalei ena siga tikoga koya e lewe tolu na udolu na tamata.

²⁹Sa tukuna mai o Mosese, "Mo ni vakasavasavataki kemuni e daidai vei Jiova, me vakalouvinakataki kemuni kina e dai, ni sa veivala na tamata kecega, na veiluveni, na veitacini."

³⁰Sa qai yaco ena siga ka tarava sa tukuna o Mosese vei ira na tamata, "O ni sa valavala ca ena valavala ca levu sara. Au na lako cake vei Jiova; me'u na cakava mada e dua na bulubulu ena vuku ni nomuni valavala ca."

³¹Sa lesu o Mosese vei Jiova ka tukuna, "O ira na tamata oqo era sa valavala ca vakalevu sara ka era sa cakava vei ira e dua na Kalou koula!

³²"Ia oqo, kevaka o ni sa vosota na nodra i valavala ca, kevaka e sega, au sa kerea. Mo ni bokoca laivi na yacaqu mai na Noqui Vola ni Bula o ni sa dau vola."

³³Sa vosa o Jiova vei Mosese ka vaka: "O koya vakayadua sai valavala ca vei Au, Au na bokoca na yacana mai na Noqu i Vola ni Bula.

³⁴"Mo lako, ka liutaki ira na tamata ki na vanua Au sa tukuna vei iko, Raica, na noqu agilosi ena liu tiko. Na siga ga au na veisiko yani kina Me'u veitotogitaki, Au na veitotogitaki me vaka na nodra i valavala ca."

³⁵O Jiova sa vakacacani ira na tamata baleta na veika era sa cakava ena vuku ni luve ni bulumakau sa cakava o Eroni.