[2] Lako Yani 6

¹Sa tukuna o Jiova vei Mosese, "Oqo, o na raica na veika Au na cakava vei Fero. Ena liga kaukauwa ena sereki ira kina me ra lako, ena liga kaukauwa ena vakasavi ira kina mai na nona vanua."

²Na Kalou sa vosa vei Mosese ka tukuna vua: "Oi Au o Jiova.

³"Au sa vakatakilai Au vei Eparama, vei Aisake, vei Jekope, Ni'u sa Kalou kaukauwa, ia na yaca o Jiova sa sega ni kilai vei ira.

⁴"Au sa vakadeitaka na Noqu veiyalayalati vei ira, Me'u solia vei ira na vanua o Kenani na vanua ni Sokalou era sa vulagi kina.

⁵"Au sa rogoca talega na nodra tagi na luvei Isireli, o ira sa vakabobulataki tiko mai Ijipita, Au sa nanuma talega na Noqu veiyalayalati.

⁶"O koya oqo, mo tukuna vei ira na luvei Isireli, 'ni oi Au o Jiova, Au na kauti kemuni tani mai na veivakaocai mai Ijipita, Au na vakabulai kemuni mai na veivakabobulataki, Au na voli kemuni lesu mai ena liga sa dodo tiko ena lewa cecere.

⁷'Au na tauri kemuni me vaka na Noqu Tamata, Au na nomuni Kalou. o ni na qai kila ni sai Au o Jiova na nomuni Kalou o Koya sa kauti kemuni tani mai na veivakabobulataki mai Ijipita.

⁸'Ka Au na kauti kemuni mai ki na vanua Au sa yalataka Me'u solia vei Eparama, vei Aisake, vei Jekope, ka Au na solia vei kemuni mei votavota: Oi Au o Jiova.'"

⁹Sa tukuna na veika oqo o Mosese vei ira na Isireli; ia, era sa sega ga ni via rogoci Mosese baleta na kakavorovoro ni yalo kei na nodra vesuki tu ena veivakararawataki levu.

¹⁰Sa vosa o Jiova vei Mosese ka vaka,

¹¹"Mo lako vei Fero na tui Ijipita, me sereki ira na luvei Isireli me ra lako."

¹²Sa vosa o Mosese ena mata i Jiova ka vaka: "Era sa sega ni rogoci au na luvei Isireli, me na qai rogoci au vakacava o Fero, ni sa sega ni cili na tebenigusuqu?"

¹³Sa vosa o Jiova vei Mosese kei Eroni ka solia veirau e dua nai vakaro, ena vukudra na luvei Isireli kei Fero na tui Ijipita, me ra kau tani mai na luvei Isireli mai na vanua o Ijipita.

¹⁴Oqo o ira nai liuliu ni vuvale nei dui tamadra: o ira na luvei Rupeni, na ulumatua nei Isireli, o Anoki, o Palu, o Esironi kei Kami, oqo na vuvale nei Rupeni.

¹⁵O ira na luvei Simione oqo: Jemueli, Jamini, Qada, Jakini, Soa kei Saulu na luvena e dua na yalewa ni Kenani. Oqo o ira na luvei Simione.

¹⁶Oqo na yacadra na luvei Livai, o Keresoni, o Loata, kei Merari. Na yabaki taucoko nei Livai e dua na drau tolusagavulu ka vitu na yabaki.

¹⁷Na luvei Keresoni o Libini kei Simi me vaka na nodrau vuvale.

¹⁸Na luvei Koata o Imarani, o Isari, o Epironi kei Usaieli. Na yabaki taucoko nei Koata e dua na drau tolusagavulu ka tolu na yabaki.

¹⁹Na luvei Merari o Maeli kei Musi. O ira oqo na vuvale nei Livai me vaka na nodra dui tabatamata.

²⁰O Amarami sa tauri Jokaveti me nona, na ganei tamana me watina; o Jokaveti sa vakasucumi Mosese kei Eroni. Na yabaki ni bula taucoko nei Amarami sa dua na drau tolusagavulu ka vitu na yabaki.

²¹Na luvei Isari o Kora, o Nefeki kei Sikiri.

²²Na luvei Usaieli o Misieli, Elisafani, kei Siciri.

²³Sa tauri Ilisapeci o Eroni me watina, na luvei Amenatave, na ganei Nasoni. Sa vakasucumi Natapi, Abaiu, Iliesa kei Itamari.

²⁴Na luvei Kora, o Aseri, o Elikana, o Abia-safi: o ira oqo na kawa nei Kora.

²⁵O Iliesa na luvei Eroni sa taura ki vei koya e dua na luvei Putieli me watina. Sa sucu mai kina o Finaisi. Oqo o ira kece nai liuliu vakavuvale vakalivai me vaka na nodra i tuvatuva.

²⁶Oqo ga o Eroni kei Mosese, o irau sa vosa kina na Kalou, "Me rau kauti ira tani mai na luvei Isireli mai na vanua o Ijipita me vaka na nodra tamata i valu."

²⁷O ira oqo sa vosa vei Fero na tui Ijipita, me kauti ira tani mai Ijipita na luvei Isireli. Oi rau tiko ga oqo na Mosese kei Eroni.

²⁸Sa qai yaco ni sa vosa o Jiova vei Mosese ena vanua o Ijipita,

²⁹Sa vosa o Jiova vei Mosese ka vaka: "Oi Au o Jiova, mo vosa vei Fero na tui Ijipita, tukuna vua na veika Au sa tukuna vei iko."

³⁰Sa vosa o Mosese vei Jiova, "Raica au sa tebenigusu sega cili, me rogoci au vakacava o Fero?"