[26] Isikeli 31

¹Ia oqo sa yaco e nai katinikadua ni yabaki, e nai katolu ni vula, e nai matai ni siga ni vula, Na vosa i Jiova sa lako tale mai vei au, ka vaka,

²"Luve ni tamata, vosa vei Fero na tui Ijipita kei ira talega na nona lewe vuqa, 'O sa vakataki cei beka e na cecere?

³E dina o Asiria e dua na vuni sitari mai Lepanoni, na tabana sa vakaruguta na veikau taucoko, ka cecere sara; kei na sovuna sa tu vata na veitabana lelevu.

⁴Na wai sa vakatubura, na wai titobu sa cecere kina, na uciwai sa drodro volita na vanua sa tei kina, sa tala yani na kena soniwai kina kau kecega ni were.

⁵'E na vuku ni ka oqo sa cecere cake sara kina o koya e na kau kecega ni were,ka sa vakalevutaki na tabana,ka babalavu na tabana e na vuku ni sa daulevu na wai,sa drodro yani.

⁶Era sa caka nodra sova na manumanu vuka kecega e na tabana, era sa vakasucu talega na manumanu e ruku ni tabana, ena yaloyalo ni tabana era sa vakavale kina na veimatanitu.

⁷'Sa rairai vinaka na kena cecere kei na babalavu ni tabana, ka ni sa ti sobu na wakana ki na bati ni wai levu.

⁸Na sitari e na were ni Kalou sa sega ni vunitaki koya rawa: na vuni damanu, sa sega ni tautauvata kei na tabana, na vuni vuto talega, sa sega ni tautauvata kei na tabana lalai; sa sega e dua na kau e na were ni Kalou me tautauvata tukuna e na kena rairai vinaka.

⁹Au sa vakarairai vinakataka ena levu ni tabana: era sa vuvutaki koya kina na kau kece ni Iteni, sa tu e na were ni Kalou.'

¹⁰"O koya oqo sa tukuna kina na Kalou o Jiova: 'Ni o sa tubu balavu sara, ka sa cecere mai na tabana lelevu kecega sa dokadoka na lomana ni sa cecere o koya,

¹¹'O koya oqo Au sa soli koya kina ki na liga i koya na nodra qaqa na veimatanitu, ena cakava dina o koya; Au sa vakasavi koya tani ni sa ca sara.

¹²'O ira na kai tani, na nodra tamata rerevaki na veimatanitu, sa biuti koya tani; sa lutu sobu na tabana e na veiulunivanua kei na veibuca kecega; ka sa musuki laivi tu na tabana e na uciwai kecega ni vanua; o ira kece na kai vuravura, era a lako tu ena yaloyalona, era sa biuti koya.

¹³'Na kena caca sa tu ga, o ira na manumanu vuka kecega, na manumanu kila ni vanua, era na lako mai ki na tabadra.

¹⁴'Me kakua kina ni vakalevulevui koya cake ni sa cecere e dua vei ira kece na kau e na bati ni wai, Se vakatura cake na tabana e na maliwa ni taba ni kau, se me tu vakacecere na kau eso, vei ira era gunuva na wai: 'Ni ra sa soli kece yani ki na mate, me ra la'ki koto ki na ruku i vuravura, kei ira na luve ni tamata, era sa lako sobu ki nai Keli.'

¹⁵"Sa tukuna vakaoqo na Kalou o Jiova: 'E na siga ka lako sobu kina o koya ki bulu Au a cakava na somate. Au a tabonaka na wai titobu me kenai loloku, ka tarova na kena uciwai, ka vakatuvakaduataka na wai levu. Au a vakauqeti Lepanoni me tagicaki koya, ka sa waicala kecega na kau kece ni were ena vukuna.

¹⁶'Au a vakayavalataka na veimatanitu e na rorogo ni nona bale, Ni'u sa biuti koya sobu ki bulu kei ira era sa lako sobu ki nai Keli; kei na vunikau kecega ni Iteni, na kau digitaki ni Lepanoni, o ira kece era gunu wai, era sa vakacegui kecega e na ruku i vuravura.

¹⁷'Era sa lako sobu vata tukuna ki eli, kei ira era vakamatei e nai seleiwau; kei ira era sa ligana kaukauwa era tiko e ruku ni yaloyalona e na kedra maliwa na veivanua.

¹⁸'O sa qai vakataki cei beka vei ira na kau ni Iteni e nai ukuuku kei na kena cecere? Ia dou na sobu vata ga kei ira na kau ni Iteni ki na ruku i vuravura; dou na davo vata ga kei ira sa sega ni cili, kei ira era vakamatei e nai seleiwau. Oqo o Fero kei ira kecega na nona lewe vuqa,' sa tukuna na Kalou o Jiova."