[48] Kalatia 5

¹O koya mo dou sa tudei ena galala sa mai sereki kemudou kina o Karisito, ka mo dou kakua ni baci vesuki tale e nai vua ni veivakabobulataki.

²Oi au o Paula, au sa tukuna vei kemudou, kevaka dou na lesu tale kina veicilivi, ena sega ni dua na ka vinaka dou na rawata mai vei Karisito.

³Au tu me'u vakadinadinataka vei ira taucoko sa cilivi, ni dodonu me ra talairawarawa tiko kina vunau taucoko.

⁴Ena sega ni yaga vei kemudou o Karisito, kevaka dou nanuma mo dou vakadonui ena vunau, sa na yali tani kina vei kemudou na loloma.

⁵Oi keda ena veivuke ni Yalo Tabu, eda sa waraka na nuitaki ni yalododonu ena vakabauta.

⁶Sa sega ni qai yaga na cili kei koya e sega ni cili, ni da sa tu vata kei Karisito Jisu, ia na noda vakabauta ga sa cakacakataki ena loloma.

⁷Dou sa cici vinaka tiko mai, o cei e mai tarovi kemudou me kakua kina ni dou muria na dina?

⁸E sega ni kitaka o Koya sa kacivi kemudou nai vakarau oqo.

⁹Ena dua ga na tiki ni leveni lailai, ena vakacacana nai buli madrai taucoko.

¹⁰Sa tu na noqu vakabauti kemudou ena vuku ni Turaga, sa sega ni rawa mo dou qai lomalomarua tale; ia o koya ga e via vakaleqai kemudou tiko, ena taura na kena i sau.

¹¹Oi au, na veiwekani, kevaka me'u vunautaka tiko na veicilivi, a cava me'u qai sotava tiko kina na veivakararawataki? Me sa oti na veivakacacani ena vuku ni kauveilatai.

¹²Au vinakata o ira era via vakaleqai kemudou tiko, mera sa vakatalai tani mai vei kemudou!

¹³Ni dou sa kacivi na veiwekani mo dou galala; dou kakua ni vakayagataka na nomudou galala me vakayacori kina nai tovo vakayago, ia mo dou bulataka ga na loloma, ka dou veivukei tiko.

¹⁴Nai vunau taucoko sa vakataucokotaki ga ena dua walega na yatu vosa, me vaka oqo, "Mo lomana na kai nomu me vakataki iko."

¹⁵Ia kevaka dou sa veikati ka veivakacacani tiko vaka i kemudou, dou qarauna de dou na veivakarusai tikoga vakai kemudou!

¹⁶Me'u tukuna vei kemudou: Mo dou lako voli ena Yalo Tabu, dou na sega ni cakava kina na gagadre ca ni tovo vakayago.

¹⁷Nai tovo vakayago e sega ni veiriti kei na Yalo Tabu, kei na Yalo Tabu talega e sega ni veiriti kei na tovo vakayago; Oi rau oqo, e rau sega ni rawa me rau bula vata, ka sega kina ni rawa mo dou cakava na ka ga dou vinakata.

¹⁸Ia kevaka sa tuberi kemudou tiko na Yalo Tabu, ena sega ni lewai kemudou na vunau.

¹⁹Nai valavala ni tovo vakayago ena basika ga mai, me vaka na: Dauveibutakoci, dautagane kei na dauyalewa, nai valavala vakasisila, na daudara,

²⁰Na dauqaravi matakau, na dauvakadraunikau, na dauveicati, na dauveileti, na daulomaca, na daucudru katakata, na dau nanumi koya ga, na dauveivakalewai, na dauveitovaki,

²¹Na dauvuvu, na daulaba, na daumateni, na daumarau vakalialia, kei na veika sa vaka kina; na veika oqo au sa tukuna oti vei kemudou, ni o ira kece era cakava tiko na veika oqo, era na sega ni rawata na matanitu ni Kalou.

²²Ia na vua ni Yalo Tabu na loloma, na reki, na vakacegu, na dauvosota vakadede, na dauyalololoma, na dauyalovinaka, na vakabauta,

²³Na dauyalomalua, na dauyalomalumalumu. Na veika oqori sa sega ni ia kina na cudruvi ena vunau.

²⁴O ira kece era sa nei Karisito era sa vakota tiko kina kauveilatai, na nodra gagadre ca ni tovo vakayago kei na kena veilasa ca kece sara.

²⁵Kevaka eda sa bula ena Yalo Tabu, meda lako voli talega ena Yalo Tabu.

²⁶Meda kakua ni vakasaqara na dokai kei nai rogorogo, eda na veicacati ga kina ka veilomacataki.