[48] Kalatia 6

¹Oi kemudou na wekaqu, kevaka e dua sa beitaki ni cala, dou lako voleka vua oi kemudou sa matua vakayalo, mo dou raici koya ka tuberi koya kina sala dina me muria, ka mo dou nanuma tiko, de dou na yaco talega me vaka kina.

²Dou dauveivukei ni colata nomudou leqa, dou sa vakayacora sara tikoga na vunau i Karisito.

³Kevaka e dua e nanuma ni o koya sa bau dua na ka, ni o koya e sega tu ni dua na ka, na tamata oqori e vakacalai koya tikoga vakai koya.

⁴Ia, mo dou dui vakatovolea vakavinaka mada na nomudou dui cakacaka, ena solia kina vei kemudou e dua na yalo e reki ena vuku ni nomudou cakacaka, ka sega ena vukuna tale e dua.

⁵Ni na dui colata na tamata yadua na nona i colacola.

⁶Vei kemudou sa vakavulici ena vosa, mo dou caka vinaka ena soli ka vua na nomudou qasenivuli.

⁷Mo dou kakua ni vakaisini kemudou, na Kalou ena sega ni vakalialiai; na ka kece e kaburaka e dua na tamata, ena tamusuka talega o koya.

⁸Ke dua e kaburaka tiko na nona i tovo vakayago, ena tamusuka na mate mai nai tovo vakayago, ia o koya sa kaburaka na veika vinaka mai na Yalo Tabu, e na tamusuka na bula sega ni mudu mai na Yalo Tabu.

⁹Meda kakua ni guce ena caka vinaka, ni da na tamusuka dina ga ena kena gauna, kevaka eda sega ni guce.

¹⁰O koya oqo, ni se tiko nai cegu ni bula, meda sa sasaga sara ga meda caka vinaka vei ira na tamata kecega, ka vakauasivi vei ira eda sa vakabauta vata.

¹¹Dou raica, ena mawe ni ligaqu dina, au sa volavola tiko yani vei kemudou ena mata ni vola lelevu!

¹²O ira era vakaraitaki ira tiko oqori ni ra sa bau totoka, o ira sara ga oqori era saga tiko vakaukauwa mo dou cilivi, me rawa kina me kakua ni tarai ira mai, na veivakararawataki ena vuku ni kauveilatai i Karisito.

¹³O ira mada ga sa cilivi oti tu, era sega sara ga ni bau bula tiko ena vunau, ia era vinakata tiko mo dou cilivi, mera vakaraitaka kina vei ira na tamata, ni sa bau dua na ka levu era cakava, ni sa dou cilivi.

¹⁴Ia sa kila ga na Kalou, ni sega tale ni dua na ka tani me lagilagi vei au, me vaka na kauveilatai ni noda Turaga o Jisu Karisito, o koya au sa vakota taucoko ena kauveilatai na veika vakavuravura e bula tu vei au, kei na veika e tu e vuravura au dau gagadre kina.

¹⁵E sega ni bibi vei Jisu Karisito, na cili se me sega ni cili, ia o koya ga sa sucu vou.

¹⁶Me yaco na vakacegu kei na loloma, vei ira kecega era vakaitovotaki ira e nai tuvatuva ni bula oqo, vei ira talega na Isireli ni Kalou.

¹⁷Me tekivu oqo ka lako yani, au kerea me kua ni dua e via mai vakararawataki au ena vuku ni ka oqo, ni sa tu ga e yagoqu na mawe ni noqu mavoa, ena vuku ni Turaga o Jisu.

¹⁸Vei kemudou na veiwekani. Na yalololoma ni noda Turaga o Jisu Karisito me tiko ena yalomudou. Emeni.