[49] Efeso 1

¹Oi au o Paula, nai apositolo i Jisu Karisito, ena lewa ni Kalou, vei ira na lewe ni lotu mai Efeso, ka sa yalo dina vei Jisu Karisito:

²Me nomudou na loloma kei na vakacegu, mai vua na Kalou o Tamada kei na Turaga o Jisu Karisito.

³Me vakarokorokotaki na Kalou, na Tamai Jisu Karisito na noda Turaga, o koya sa vakalouvinakataki keda ena ka ni veivakalouvinakataki vakayalo kecega, e na vei yasana vakalomalagi ena vuku i Karisito.

⁴Ena Nona digitaki keda e liu ena Vukuna, sa qai tauyavutaki e muri o vuravura, me da yalosavasava ka sega ni cala e matana e na loloma.

⁵Ni sa nona i tuvatuva makawa tu mai, me da wili me luvena ena vuku i Jisu Karisito, ena Nona lewa savasava,

⁶Ka me vakavinavinakataki na cecere ni Nona loloma, ena Nona ciqomi keda meda ka lomani.

⁷Sa mai vakabulai keda o Koya ena Nona dra, ka sa vosoti kina na noda i valavala ca, me vaka na Nona loloma levu.

⁸O koya sa vakalevutaka vei keda na yalomatua kei na yaloqaseqase,

⁹Ni sa vakatakila vei keda na Nona lewa ka vuni tu, me vaka na ka sa vinakata, ni sa nakita oti tu mai e lomana,

¹⁰Na kena yaco na siga dina sa lokuci tu, me na vakasoqoni vata kina vei Karisito, na veika kece mai lomalagi kei vuravura.

¹¹Sa mai vakayacori keda o koya meda vakaivotavota vata, ni da sa nakiti oti tu mai liu, ena Nonai tuvatuva me vaka Nona lewa,

¹²Ka sa dodonu vei keitou sa liu ena vakabauti Karisito, me keitou vakacaucautaki Koya sa lagilagi.

¹³Oi kemudou talega, dou sa mai cabo bula vua, e na nomudou a rogoca na vosa ni vakavuvuli dina, nai tukutuku vinaka ni nomudou vakabulai; sa yaco kina mo dou vakabauta, ka dou sa dregati kina ena Yalo Tabu sa yalataki,

¹⁴Na Yalo Tabu ena mai vakadeitaka tiko vei keda ni da sa luve ni Kalou, me yacova na siga ni noda vakabulai, me dokai na Nona vinaka.

¹⁵Ena vuku ni ka oqo, oi au talega, ni'u sa rogoca oti na nomudou vakabauta na Turaga o Jisu, kei na nomudou loloma talega, vei ira kecega era sa lotu,

¹⁶Au sa sega ni qai cegu me'u dau vakavinavinakataki kemudou, ena noqu dau cavuti kemudou yadudua ena noqu masu:

¹⁷Vua na Kalou ni noda Turaga o Jisu Karisito, na Tamada vakaiukuuku, me solia vei kemudou na yalo ni yalomatua kei na veivakatakilai vakayalo, mo dou kilai koya vinaka kina,

¹⁸Ni sa qai tadola na matamudou vakayalo; mo dou kila kina nai nuinui sa kacivi kemudou kina o koya, kei na kena talei nai ukuuku sa tu vua, me baleti ira na nona yalosavasava,

¹⁹Kei na Nona dau vakaraitaka na Nona kaukauwa levu vei keda sa vakabauta, me vakaraitaka kina na Nona kaukauwa vakaidina,

²⁰Me vaka na Nona vakaturi Karisito cake tale mai na mate, ka vakatikori koya ena ligana i matau, e na veiyasana vakalomalagi,

²¹Me uasivi cake kina vei ira kecega sa liu, kei ira sa lewa, kei ira sa kaukauwa, kei ira sa turaga, kei na yaca kecega sa cavuti ena gauna oqo, kei na gauna mai muri.

²²A sa vakamalumalumutaka na ka kecega me tu ena ruku ni Yavana, ka solia vua na kaukauwa me lewai ira kecega, sai koya nai soqosoqo lotu,

²³O koya na yagona, na kena i vakataucokotaki, sa vakasinaiti ena ka kecega, sa vakasinaita na ka kecega ena ka kecega.