[49] Efeso 2

¹O koya sa vakabulai kemudou, ni dou a mate tu ena caka cala kei nai valavala ca.

²Dou a dau bula tu ena i valavala vakavuravura e liu, ena nona kaukauwa na turaga ni maliwa lala, na yalona sa cakacaka tiko ena loma ni tamata me talaidredre kina,

³Oi keda talega eda sa bulataka tu nai tovo vakayago e liu, ena noda vakayacora, ka talairawarawa tu ga, ena gagadre ca ni noda i tovo vakayago, ka sa yaco kina vei keda na cudruvi, kei ira talega na lewe i vuravura.

⁴Ia na Kalou, sa sinai ena yalololoma, ena vuku ni Nona loloma levu sa lomani keda kina,

⁵e dina mada ga ni da a mate tu ena caka cala, o koya sa vakabulai keda vata kei Karisito, (na loloma ga dou sa vakabulai kina),

⁶A sa vakaturi keda cake vata, ka vakatikori keda vata kei Karisito Jisu, ena veiyasana vakalomalagi,

⁷Me rawa ni vakaraitaka tiko, ena vei gauna mai muri, na Nona loloma levu kei na Nona yalovinaka vei keda, ena vuku i Karisito Jisu.

⁸Ni sa yalo loloma walega dou sa vakabulai kina, ena vuku ni vakabauta, sega ni baleta ni dodonu me nomudou; oqori nai solisoli loloma ga ni Kalou,

⁹E sega ni baleta na nomudou cakacaka vinaka, me kakua kina ni dua me vakadokadokai koya ena ka e cakava.

¹⁰Oi keda eda sa cakacaka ni Ligana, eda sa buli vou vei Karisito me baleta na cakacaka vinaka, o koya sa vakarautaka oti tu mai e liu na Kalou meda na muria.

¹¹O koya oqo mo dou nanuma vinaka, ni oi kemudou na kai matanitu tani, dou a vakatokai na sega cili, ka sega ni dou cilivi ena veicilivi dau vakayacori ena liga -

¹²Ka sega talega ni tu vei kemudou o Karisito, dou sega ni matanitu vata kei Isireli, a sa sega ni nomudou na ka sa yalataki ena veiyalayalati, a sa sega vei kemudou nai nuinui, ka sa sega ni nomudou na Kalou e vuravura.

¹³Ia oqo, ni dou sa tu vata kei Karisito Jisu, oi kemudou ka yawa e liu, dou sa qai voleka mai ena vuku ni dra i Karisito,

¹⁴Ni sai Koya na vuni noda veivinakati tale, sa vakaduavatataki rau na rua me sa dua ga, a sa basuraka sobu na bai sa ia kina na veivakaduiduitaki,

¹⁵Ni sa vakaotia ena Yagona na ka eda a veitawasei kina, oqori na vunau sa vakarota na valavala ni lotu, ia sa veisautaka vou o Koya na tamata, me ia nai valavala vou ni noda veiqaravi, ni sa qai veivinakati tu,

¹⁶E vakaduavatataka na tamata kei na Kalou ena kauveilatai, ena Nona vakoti ka vakamatei me bokoci kina na caka cala.

¹⁷A lako mai, o Koya me vunautaka na veivinakati vei kemudou sa yawa kei ira talega sa voleka.

¹⁸Ena vukuna, eda rawa ni torova doudou nai tikotiko ni Kalou na Tamada, ena yalo e dua bauga.

¹⁹O koya, oqo, dou sa sega tale ni qai vulagi se kai tani, ia dou sa korovata kei ira na yalosavasava, ka dou sa lewe ni matavuvale vata kei na Kalou,

²⁰Ka dou sa taracake ena nodra yavu nai apositolo kei ira na profita, o Jisu Karisito sara ga na kena i vakadei dina,

²¹Kivei Koya, sa sema vata kina na vale taucoko, sa vakatuburi me uasivi, ka me laurai kina ni dua na vale savasava ni Turaga,

²²Kivei Koya talega, dou sa tara vata kece kina, mo dou Nonai tikotiko tudei na Kalou ena Nona Yalo Tabu.