[49] Efeso 3

¹Ena vuku ni ka oqo, oi au o Paula, na bobula i Karisito Jisu vei kemudou na kai matanitu tani -

²Dou sa rogoca oti beka, ni oqo na gauna ni Nona yalololoma na Kalou vei kemudou, me vaka sa solia vei au,

³Ni sa vakaraitaki vei au ena veivakatakilai vakayalo, na ka vuni oqo (me vaka na noqu a vola mada yani e liu,

⁴Na gauna dou na wilika kina nai vola o ya, dou sa na rawa ni kila kina, na veika au kila, me baleta na ka vuni i Karisito)

⁵Na ka vuni oqori, a sega ni vakatakilai vei ira na tamata lotu ena gauna e liu, ia oqo, sa qai vakatakila na Yalo Tabu, vei ira nona apositolo yalosavasava kei na parofita;

⁶O ira na kai matanitu tani era sa taukena vata, ni da sa dua ga na yago, era na taukena talega na vanua yalataki e na vuku i Karisito, mai nai tukutuku vinaka,

⁷O koya au sa lesi kina me kena i talatala, me vaka nai solisoli loloma ni Kalou, sa solia vei au, ena Nona cakacaka veivakurabuitaki.

⁸Oi au e dua e lailai sara, mai vei ira na tamata rogo ni Kalou, au qai digitaki ena Nona loloma, me i talatala vei ira na kai matanitu tani, me'u vunautaka kina na i yau vuni talei e tu vei Karisito,

⁹Me'u tukuna, me ra raica na kena totoka ni ka vuni oqo, ena Nona a vunitaka tu mai na Kalou, ka tekivu sara mai nai vakatekivu, ia sa qai vakatakila mai oqo, ena vuku i Jisu Karisito.

¹⁰Ni sa nakita oti tu mai na Kalou, ena Nona rai yawa vakayalomatua, nai soqosoqo lotu me na tucake, ka vakaraitaka na Nona kaukauwa, vei ira sa turaga kei ira sa kaukauwa ena veimaliwa lala,

¹¹Oqo na Nona i naki sara na Kalou mai na i tekitekivu, ni na qai mai vakavotukanataka na ka kece, na Noda Turaga o Jisu Karisito.

¹²Ena noda vakabauti Koya, sa solia kina vei keda, na yalo e qaqa kei na doudou, me da torova kina nai tikotiko tabu ni Kalou.

¹³O koya oqo, au sa kerei kemudou kina, mo dou kakua ni guce, ena noqu vakararawataki ena vukumudou, ni oqo dou na lagilagi kina.

¹⁴Ena vuku ni ka oqo, au cuva sobu kina me'u tekiduru, vua na Tama ni noda Turaga o Jisu Karisito,

¹⁵Ni o Koya sa vakayacani kece kina na mata vuvale mai lomalagi kei vuravura,

¹⁶Me solia vei kemudou o Koya, me vaka na noda i yau levu e tu vua, me vakaukauwataki kemudou ena yalona, ka mo dou kaukauwa e loma,

¹⁷Me tikoga ena yalomudou na Karisito ena vakabauta; mo dou vakaukauwa ka tauyavutaki ena loloma,

¹⁸ka rawata kina, mo dou kila vata kei ira kecega era sa lotu, se cava na kena rabailevu, kei na kena balavu, kei na kena titobu, kei na kena cecere -

¹⁹ka mo dou kila na loloma i Karisito, o koya sa uasivia na kila ka vakatamata, ka mo dou sinai ena ka kecega sa sinai kina na Kalou.

²⁰O koya e rawa ni cakava ga na ka e via cakava, ka sega ni da vakasamataka rawa, me vaka na kaukauwa e tu vua, ni rawa me cakava vei keda,

²¹Me vakarokorokotaki o Koya e nai soqosoqo lotu, ena vuku i Karisito Jisu, ena vei tabatamata kecega me sega ni mudu. Emeni.