[49] Efeso 4

¹O koya oqo, oi au, sa vesu tu ena vuku ni Turaga, au sa vakamamasu vei kemudou, mo dou ia tiko nai valavala sa kilikili, e nai tutu dou sa kacivi kina,

²Mo dou yalomalumalumu sara ka yalomalua, mo dou vosota tiko vakadede ka veivosoti vakai kemudou ena loloma,

³Dou tovolea me maroroi tikoga na lomavata ni Yalo Tabu, ni dou sa vauci vata ena veivinakati.

⁴Ni dua ga na yago ka dua na yalo, sa dua ga nai nuinui dou sa kacivi kina;

⁵Sa dua ga na Turaga, sa dua na vakabauta, sa dua na veipapitaisotaki;

⁶Sa dua ga na Kalou ka tamada kecega, o Koya sa lewa na ka kecega, sa vakavuna na ka kecega, ka sa tiko kei kemudou kecega.

⁷Ia vei keda yadudua, na Nona loloma sa solia vei keda, me vaka nai vakarau ni Nona solisoli o Karisito.

⁸O koya oqo sa tukuna kina o koya: "Ni'u sa lako cake, ena levu ena vakabobulataki me ra bobula, ena solia nai solisoli vei ira na tamata."

⁹(Ia, "Sa lako cake o Koya"- ia na cava na kena i balebale na Nona lako sobu mada o koya e liu ki na ruku i vuravura era?

¹⁰O Koya ga sa lako sobu mai, sai Koya talega sa lako cake me yawa sivita na lomalagi, me vakasinaita kina na ka kecega).

¹¹Ni o Koya sa solia e so me apositolo (Daukatolu), ka so me parofita (Domo ni Kalou), ka so me dauvunau (veivakalotutaki), ka so mei vakatawa (Tubera nai soqosoqo lotu), ka so me qasenivuli (Vakatavulica nai Vola Tabu)

¹²Mera vakayaragitaki kina o ira nai soqosoqo lotu ki na cakacaka ni Kalou, me ra vakayalomatuataki nai soqosoqo lotu,

¹³Me rawa ni da duavata kina ena vakabauta, kei na noda kila na luve ni Kalou, meda matua vakayalo sara ka vakataucokotaki ena vuku i Karisito;

¹⁴Me oti kina na vagonegonea kei na veitosoyaki ena vuku ni vakavuvuli vou e dau veivakacalai ena vuku ni veivakaisini;

¹⁵Ia me ra dau vosataka na dina ena loloma, meda tubu cake kina ena ka kecega, vei Koya na ulu ni soqosoqo lotu na Karisito -

¹⁶O Koya na ulu sa sema mai kina na yago taucoko, sa veisemasemati kina na i sema taucoko, ni ra sa dui cakacaka vakavinaka na veitikina, sa tubu kina na yago ka veitarai cake ena veilomani.

¹⁷O koya oqo au sa kerei kemudou kina ena vuku ni Turaga, mo dou kakua ni vakamurimuri ira na sega ni lotu, ena nodra i valavala vakalialia,

¹⁸Ni sa butobuto na nodra vakasama, ka sa sega ni dua nai vakaraitaki ni bula mai vua na Kalou me laurai vei ira, ena vuku ni nodra lecaika kei na lomaqa ni yalodra;

¹⁹Na ka era cakava, era sa qai veitaliataki ira ena veika vakasisila kei na nodra domona, mera bulataka nai valavala vakabutobuto.

²⁰E sega ni dua na bula vaka o ya, dou a vulica mai vei Karisito,

²¹Ni dou a vakavulici ka tuberi sara ga mai, ena veika dina me baleta na bula i Jisu:

²²Mo dou luvata tani, nai valavala ni tamata makawa kei na kena gagadre ca taucoko, e kauta mai vei kemudou na lutu sobu,

²³Ia mo dou vakavouia tiko na nomudou vakasama,

²⁴ka mo dou qai vakaisulu tiko me vaka na tamata vou ni Kalou, ena yalododonu kei na savasava.

²⁵O koya oqo, mo dou biuta tani na lasulasu, "Me dina na nomudou vosa vei ira na wekamudou," ni da sa dua ga na vuvale Oi keda.

²⁶"Kevaka dou sa cudru katakata, tauri kemudou vakamalua, de dou qai valavala ca kina." Me kakua ni sa laki dromu na matanisiga, mo dou se cudru tikoga,

²⁷Dou kakua ni vakarawarawataki kemudou vua na tevoro.

²⁸O koya sa daubutako me sa rauta na butako, ia me dua na nona cakacaka, me rawa mai kina eso na ka vinaka, ka me vukea kina eso era vakaloloma tu.

²⁹Na vosa ni veirukaki vakasisila me kakua ni lako mai ena gusumudou, me lako ga mai na vosa ni veivakatataki cake kei na vosa ni loloma, me rawa ni ra kila kina o ira era rogoca, na yalo ni loloma vei kemudou.

³⁰Dou kakua ni vakararawataka na Yalo Tabu, o koya dou sa dregati vata, me yacova na siga ni bula.

³¹Dou biuta tani kece vei kemudou, na yaloca, na cudru katakata, na cudru, na veiba kei na veivosa vakalialia mai na gusumudou,

³²Mo dou dau veilomani vakaiemudou, ena yalo e savasava, ka dou veivosoti vakaikemudou, ni sa vosoti kemudou oti na Kalou ena vuku i Karisito.