[49] Efeso 5

¹O koya oqo mo dou qai vakadamurimuria na Kalou me vakataki ira na gone ni toko.

²Ka dou bulataka tikoga na loloma, me vakataki Karisito, ena nona solia nona bula me mai mate e na vukuda, ni lomani keda, mei madrali kai soro vua na Kalou, me ka boi vinaka.

³Ia na dauyalewa kei na dautagane kei na ka kecega sa sega ni vakalou kei na kocokoco, me kakua ni cavuti ena kemudou maliwa, ni sa sega ni kilikili me vaka kina vei kemudou na tamata lotu;

⁴Me kakua na bula ni wakia vata, se veivosaki lialia se na veiwali ca, ni sega ni salavata kei na noda i tutu, ia me laurai tiko vei keda na bula ni dauvakavinavinaka.

⁵Ka mo dou kila, e sega ni rawa vua e dua na tamata dauyalewa kei na dautagane, se dua na dauwakia vata se dua na daukocokoco, se dua na dau veibutakoci, me vakai votavota ena matanitu i Karisito kei na Kalou.

⁶Me kakua ni dua me mai rawai kemudou ena vosa kamikamica, baleta ni dau yaco kina na cudru ni Kalou ena veika oqo, ni talaidredre na tamata.

⁷O koya oqo, mo dou kakua ni veitokani vata kei ira.

⁸Oi kemudou dou a butobuto tu e liu, ia oqo dou sa qai rarama ena vuku ni Turaga, mo dou vakaitovotaki kemudou me vaka na gone ni rarama,

⁹(Ni sa vua ni Yalo Tabu nai valavala vinaka kecega, nai valavala dodonu kei na dina).

¹⁰Mo dou vakasaqara ka kila na veika e vinakata na Turaga.

¹¹Dou kakua ni veitokani vata kei ira na gone ni butobuto, ia mo dou tukuna vakadodonu vei ira na nodra leqa.

¹²Ena vakamadua kevaka mo dou veitokoni ena ka era cakava vuni tiko.

¹³Baleta na ka kece eda na tukuna, ena vakaraitaki me vakavotui ena rarama, na veika kece e vakayacori vuni ena vakaraitaki mai ena rarama.

¹⁴O koya oqo sa tukuna kina o koya: "Dou yadra oi kemudou sa moce, Ka tucake mai ena mate, O Karisito ena vakararamataki kemudou."

¹⁵Dou tu mada ka dikevi kemudou, mo dou kakua ni vakataki ira na lialia, ia mo dou vakataki ira na vuku,

¹⁶Mo dou volia na gauna, baleta na ca e tiko ena veisiga oqo.

¹⁷O koya oqo mo dou kua ni bula tu vaka lecaika, ia mo dou kila tiko se cava na loma ni Turaga.

¹⁸Dou kakua ni mateni ena waini, dou na cakava kina eso nai tovo vakasisila; ia mo dou vakasinaiti ga ena Yalo Tabu,

¹⁹ka dou veivosaki vakai kemudou ena same kei na sere, na sere e vakayalo, ka dou lagata na sere e rogorogo vinaka e lomamudou vua na Turaga,

²⁰Dou dau vakavinavinaka tikoga vua na Kalou o Tamada, ena yaca ni noda Turaga o Jisu Karisito,

²¹Dou veirokorokovi ka dau veirogoci vakai kemudou, ena rere vua na Kalou.

²²Oi kemudou na yalewa vakawati, dou soli kemudou taucoko vua na watimudou, me vaka vua na Turaga.

²³Ni tagane sa ulu ni watina yalewa, me vakataki Karisito sa ulu ni soqosoqo lotu; o Koya talega sa bula kina na yago taucoko.

²⁴Me vaka na nona soli koya taucoko nai soqosoqo lotu vei Karisito, me vaka talega kina o ira na yalewa vakawati, vei ira na watidra ena ka kecega.

²⁵Oi kemudou na tagane vakawati, dou lomani ira na watimudou, me vakataki Karisito ena nona lomana nai soqosoqo lotu, a sa soli Koya taucoko ena vukuna,

²⁶Me vakatabui koya, ka vakasilimi koya, ena veivakasavasavataki ni wai mai na vosa ni Kalou,

²⁷Me rawa kina vei koya, me vakaraitaka nai soqosoqo lotu kivei Koya ga ni sai soqosoqo lotu e uasivi, sa sega vua na duka, se na veika sa vakakina, ia sai soqosoqo lotu tabu ka sega ni cala.

²⁸Oi kemudou na tagane vakawati, dou lomana na watimudou ni sa yagomudou dina; o koya sa lomana na watina yalewa sa lomani koya vakataki koya.

²⁹E sega ni rawa me dua e cata na yagona dina, ena vakamareqeta ka qarauna vinaka, me vakataki Karisito ki nai soqosoqo lotu.

³⁰Oi keda eda sa tiki ni yagona ena lewe kei na sui.

³¹"Ena vuku ni ka oqo, na tagane ena biuta kina na tamana kei na tinana, ka kabita na watina, e rau sa na yaco me duabau ga."

³²Oqo e dua na ka vuni levu, au cavuta tiko oqori na veika, me baleti Karisito kei na i soqosoqo lotu.

³³Io vei kemudou na tagane, dou lomani ira na watimudou, me vaka ga na nomu lomana na yagomu, vei kemudou na yalewa vakawati, dou dau vakarokorokotaka tiko na watimudou.