[49] Efeso 6

¹Oi kemudou na gone, dou talairawarawa vei ira na nomudou i tubutubu, me vaka vua na Turaga, ni sa ka dina oqo.

²"Mo vakarokorokotaki rau na tamamu kei na tinamu," ni oqo nai matai ni vunau levu, sa tiko kina na vosa ni yalayala.

³"Ena totoka kina na nomu bula, o na bula balavu talega kina."

⁴Oi kemudou na tama, dou kakua ni vakacudrui ira na luvemudou me ra rarawa kina, ia dou tuberi ira cake e nai vakavuvuli e vaKalou.

⁵Oi kemudou na dauveiqaravi, dou talairawarawa vei ira na nomudou Turaga vakayago, ena rere kei na sautaninini kei na yalo e savasava, me vaka vei Karisisto,

⁶Dou kakua ni cakacaka vakarairai me ra qoroi kemudou kina, ia dou cakacaka me vaka na dauveiqaravi dina i Karisito, sa cakava na loma ni Kalou mai na vuni yalona,

⁷E vakayacora vakavinaka na nona cakacaka, me vaka e cakava tiko vua na Kalou, ka sega ni vei ira na tamata,

⁸Ni kila tiko na cakacaka vinaka taucoko e vakayacori, ena solia na kenai sau na Turaga, se da bobula se da galala.

⁹Oi kemudou na Turaga, dou caka vinaka vei ira, me sa kakua na veivakasaurarataki tiko, ka mo dou kila ni tiko mai lomalagi na nomudou Turaga e levu cake, e sega vua na veivakaduiduitaki.

¹⁰Me'u tinia, oi kemudou na wekaqu, mo dou kaukauwa tiko ena Turaga, kei na kena levu ni Nona kaukauwa vakaidina.

¹¹Dou tokara ka daramaka tiko nai yaragi ni Kalou, me rawa ni dou tucake qaqa tiko kina, ka vorata nai lawaki makawa ni tevoro.

¹²Ni da sa sega ni veivala walega kei ira na tamata, ia eda veivala sara tikoga kei na dua nai tuvatuva ni bula vakatamata, kei na kaukauwa, kei koya sa lewa na kaukauwa ni butobuto, kei nai vavakoso yaloca ena veiyasana vakalomalagi.

¹³O koya oqo mo dou sa vakayagataka sara ga nai yaragi kecega ni Kalou, me rawa ni dou tudei tiko ni yaco mai na veisiga ca, ni dou sa kitaka oqo, dou na qai tudei.

¹⁴O koya oqo mo dou tucake, dou vauca ena tolomudou na dina, ka vakaisasabai na lomaseremudou ena i valavala dodonu,

¹⁵ka vakaivava ena yavamudou ena cakacaka ni tukutuku vinaka ni veivinakati;

¹⁶Vakauasivi sara, mo dou kauta voli e veisiga nai sasabai ni vakabauta, o koya, mo dou sabaya kina na nona gasau vanataki na tevoro.

¹⁷Dou tokara e ulumudou nai sala ni bula, ka taura matua nai seleiwau ni Yalo Tabu, oqori na Vosa ni Kalou;

¹⁸Dou masu tikoga ena masumasu kecega kei na daukerekere ena Yalo Tabu, dou yadrava tiko ka gumatua nomudou veinanumi ena masu, ena vukudra na tamata lotu -

¹⁹Kivei au talega, me soli vei au na galala me'u vosa, me rawa kina ni'u tukuna vakadoudou me kilai na ka vuni ni tukutuku vinaka,

²⁰Ena ka oqo au sa vesuki tu kina; me rawa ni'u vosa doudou, me vaka ni sa dodonu me'u vosa.

²¹Ia mo dou na kila, nai tuvaki ni noqu bula, kei na cakacaka au sa cakava, ena la'ki tukuna taucoko vei kemudou o Tikiko na taciqu lomani, a i talatala yalodina ni Turaga;

²²O koya au na talai koya yani vei kemudou, ena vuku ni veika au sotava, me rawa ni dou kila kina nai tuvaki ni bula eke, ka me vakaceguya talega na yalomudou.

²³Me nodra na vakacegu kei na loloma ena vakabauta na veiwekani, mai vua na Kalou o Tamada kei na Turaga o Jisu Karisito.

²⁴Vei ira kece sa lomana na noda Turaga o Jisu Karisito, ena yalodra taucoko, me nodra na yalololoma ni Kalou. Emeni.