[50] Filipai 1

¹Oi keirau o Paula kei Timoci nai talatala i Jisu Karisito, vei ira kecega nai soqosoqo lotu i Jisu Karisito, era tiko mai Filipai; kei ira nai Talatala Qase kei ira na Tuirara:

²Me nomudou na loloma kei na vakacegu ni Kalou na Tamada kei na Turaga o Jisu Karisito.

³Au dau vakavinavinaka vua na noqu Kalou, ena gauna kecega au dau nanumi kemudou kina;

⁴Dau reki na yaloqu ena veigauna kece au dau cavuti kemudou kina ena noqu masu,

⁵Ena nomudou lomavata ena i tukutuku vinaka, ka vakatekivu mai na matai ni siga me yacova tiko mai oqo,

⁶Au via vakadeitaka na ka oqo, o koya e tekivutaka na cakacaka vinaka vei kemudou, ena vakacavara vinaka, me yacova nona lesu tale mai o Jisu Karisito.

⁷Ni sa dodonu me'u dau namuni kemudou ena ka oqo, baleta ni dou na sega ni taqusi mai yaloqu, dou sa duavata kei ena noqu vesuki tu, kei na kena taqomaki ka vakadeitaki nai tukutuku vinaka, eda sa wasea vata kina na loloma.

⁸Sa kila ga na Kalou na noqu dau vakasamataki kemudou, ena veika dredre dou sotava ena vuku i Jisu Karisito.

⁹Sa noqu masu, me tikoga vei kemudou na loloma, kei na nomudou kila, ena kila ka vakayalo kecega.

¹⁰Me rawa ni dou kabita kina na ka vinaka, mo dou savasava ka sega ni cala, me yacova nona lesu mai o Karisito.

¹¹Ka mo dou qai vakasinaiti tu ena vua ni yalododonu ena vuku i Jisu Karisito, me vakalagilagi ka vakavinavinakataki kina na Kalou.

¹²Ia oqo na veiwekani au sa vinakata mo dou kila, ni veika taucoko e vakayacori vei au, sa qai tete ga kina nai tukutuku vinaka,

¹³E vunautaki vei ira na sotia dau yadrava na vale ni Tui, kei ira taucoko na veiqaravi tu kina, me ra kila ni'u vesuki tiko ena vuku i Karisito;

¹⁴Na ka au cakava e solia e dua na yalo ni bolebole vei ira na wekada sa lotu tiko, me ra vunau ka sega ni rere.

¹⁵E dina ga sa so era vunautaki Karisito, ni ra sa dauvuvu ka dauveileti, eso talega ni ra sa lomavinaka;

¹⁶Eso vei ira na dauvunau tiko mai era vunau tu ga vakaviavialevu ka sega na yalomatua, ka ra sega ni kila na ka era cakava ni mai tarai au na kena bibi;

¹⁷Ia eso ena loloma, ena nodra kila noqu tu oqo me baleta ga nai tukutuku vinaka.

¹⁸Me cava tale? Sa muri na gaunisala kece, me veirairai walega se laurai na dina, sa vunautaki oti o Karisito; oqo na ka e vakamarautaki au, io au sa dau reki tikoga kina.

¹⁹Au sa kila na veika taucoko oqo ena yaco kina na noqu sereki, o ya na nomudou masu kei na veivuke ni Yalo i Jisu Karisito,

²⁰Me vaka na ka au sa namaka ka vakanuinuitaka, ni sega na ka me'u madua kina, ia au doudou me caka e yagoqu na veika e vakarokorokotaki kina o Karisito, me'u bula se me'u mate ga.

²¹Kivei au, me'u bula, o Karisito ga, sa uasivi sara ke yaco na mate.

²²Ia kevaka e vakayago tiko noqu bula, oqori sai vakaraitaki ni vua ni noqu cakacaka; ni ka au digitaka ena sega ni rawa me'u tukuna.

²³E dua ga vei rau me'u na taura, au sa daugadreva tu ga me'u lako yani vei Karisito, ni sa vinaka cake mai na bula oqo.

²⁴Ena vinaka talega vei kemudou me'u tiko vata mada ga kei kemudou.

²⁵Au sa vakadeitaka vei au, me'u tiko mada ka veitomani vata kei kemudou ena nomudou vakatuburi cake kei na reki ni vakabauta,

²⁶Na nomudou marautaki au ena noqu na lesu tale yani vei kemudou, me sa uasivi cake sara ena vuku i Jisu Karisito.

²⁷Nai tukutuku vinaka i Karisito me rau salavata tiko kei na nomudou i valavala, ni'u tiko me'u raici kemudou se'u yali mai vei kemudou, au vinakata ga me'u rogoca ni dou tudei ka yalovata, qai gumatua ena lomavata, ka vakabauta tiko nai tukutuku vinaka,

²⁸Dou kua ni rere ena nodra vei vakarerei mai tuba, oqori sa vakaraitaka tiko na nodra na rusa, ia vei kemudou oqori na nomudou vakabulai, ni sa yaco tiko na nona lewa na Kalou.

²⁹E sega ni vakacalaka na veika e yacovi kemudou ena vuku i Karisito, e sega ni nomudou mai lewena ga nai soqosoqo lotu, ia mo dou na mai sotava sara ga na veika rarawa ena vukuna,

³⁰Dou sa raica ka vakadinadinataka na veika rarawa e tarai au, ia oqo au sa mai rogoca ni dou sotava talega.