[50] Filipai 2

¹O koya oqo, kevaka sa mani tiko na veivakacegui i Karisito, kevaka sa tiko na veimositi ni loloma, kevaka sa tiko na lomavata ni Yalo Tabu, kevaka sa tiko na yalololoma kei na yalovinaka,

²Mo dou vakayacora sara na ka au rekitaka ni dou sa duavata ena vakanananu, dou sa tautauvata ena loloma, ka dou qai yalovata ka lomavata.

³Me kua ni caka e dua na ka ena dela ni qaciqacia kei na dokadoka, ia mo dou kauti kemudou sobu, me ra uasivi cake kina vei kemudou o ira na tamata

⁴Dou kua ni dau nanumi kemudou tikoga, dou tovolea mo dou raici ira na kolaiciba tu e yasamudou.

⁵Me tiko vei kemudou na vakanananu oqo ka tu talega vei Karisito.

⁶O koya, nai rairai dina ni Kalou, e sega ni vakasama ni sa butako ena nona vakatautauvatani kei na Kalou,

⁷Ia sa kauti koya sobu me kua ni dokai, ka kauta vua nai tovo ni tamata dauveqaravi, e tautauvata sara ga kei na tamata.

⁸E laurai ena nona bula ni vaka dina na tamata, e vakamalumalumutaki koya ka talairawarawa me mate, io me mate ena kauveilatai.

⁹O koya oqo, sa vakalevulevui Koya cake kina na Kalou, ka solia vua e dua na yaca, sa uasivi cake ena yaca kecega,

¹⁰Ki na yaca i Jisu, me tekiduru kina na duru vakayaduaga, mai lomalagi kei vuravura, kei na botoi vuravura.

¹¹Me vakatusa talega na vei yame kecega, ni sa Turaga o Jisu Karisito, me vakarokorokotaki kina na Kalou o Tamada.

¹²O koya oqo, oi kemudou sa lomani, me vaka nomudou talairawarawa tikoga, ka sega walega ena gauna au tiko kina kei kemudou, e vakauasivi sara na noqu yali mai vei kemudou, mo dou cakacaka taka na nomudou vakabulai, ena rere dina sara.

¹³Ni sa cakacaka vei kemudou na Kalou, mo dou kila nona lewa kei na nomudou cakava na ka sa vinaka vua.

¹⁴Ena nomudou cakacaka kecega, me kakua na vosa kudrukudru se vakaduduileti,

¹⁵Me kakua ni dua na ka mo dou beitaki kina ni dou cala, oi kemudou na luve ni Kalou, me kua ni dua na malumalumu mo dou na vakamelei kina, ni dou bula veimaliwai tiko kei ira nai tabatamata veiveveyaki ka lomavakatani, enakedra maliwa mo dou rarama, ka cina e vuravura,

¹⁶Dou maroroya dei tiko na vosa ni bula, ka me'u sa reki ga ena siga i Karisito ni'u a sega ni cici wale se vakaogai walega.

¹⁷Io, kevaka au sovaraki yani me'u i madrali sa cabori, ena vuku ni nomudou vakabauta, au na reki kina ka marau vata kei kemudou.

¹⁸Ka sa dodonu talega vei kemudou e na vuku ni ka oqo, mo dou reki vata talega kei au.

¹⁹Au sa vakanuinui vua na Turaga o Jisu, ni dua na gauna lekaleka ga mai oqo, au sa na talai Timoci yani, me rawa ni mai tukuna vei au na kemudou i tukutuku me'u vakayaloqaqataki kina.

²⁰E sega tale ni dua au nanuma rawa me na lako yani, me vukei kemudou ena nomudou vakararawataki.

²¹Ni levu era vakasaqara mada ga na veika me ra bula kina, ka sega ni veika baleti Jisu Karisito.

²²Ia dou sa kila vinaka na nonai valavala, o koya e vaka e dua na gone vei tamana ena neirau cakacaka vata tiko e na vuku ni tukutuku vinaka.

²³O koya oqo, au sa nuitaka ni'u na talai koya yani vei kemudou, ena dua na gauna totolo ga mai oqo ni'u sa raica rawa ga na ka e baleti au.

²⁴Ia au sa nuitaka tikoga na Turaga, ni'u na lako yani me datou la'ki sota.

²⁵Ia au sa nanuma mada ga me'u sa talai Epafirotaito yani vei kemudou, o koya e dua na taciqu, ka noqu i tokani ni valu vakayalo, ia o koya na nomudou i talatala ka dau tu tikivi au ena gauna ni noqu galili;

²⁶Sa dua na ka na nona via raici kemudou kecega, e via yalolailai ni sa mai kila ni dou sa rogoca na nona a tauvi mate.

²⁷E tauvi mate dina ka voleka sara kina ni mate; ia na Kalou sa lomani koya, sega ni o koya ga, oi au talega, de vakaikuritaki na noqu rarawa, ena dua tale na ka rarawa.

²⁸O koya oqo au sa sasaga sara ga kina me'u sa talai koya yani, me rawa ni dou reki kina ni dou sa raici koya tale, ena vakaruruya sobu talega na noqu yalo rarawa.

²⁹Mo dou ciqomi koya ena yalo e veidokai ena vuku ni Turaga, na tamata vaka oqo mo dou dau vakarokorokotaka;

³⁰Levu na gauna e dau voleka ni mate ena vuku ni cakacaka i Karisito, e sega ni wilika tu me dua na ka vua na nona bula, sa gu ga na yalona me cakava na cakacaka ni Turaga, me vaka na ka au tukuna vua.