[50] Filipai 3

¹Me'u tinia, oi kemudou na wekaqu, dou reki ena Turaga. Noqu vakarau vola yani vei kemudou na veika oqo, e sega ni ka rawarawa vei au, ia ena vinaka vei kemudou.

²Dou qarauni kemudou mai vei ira na koli, dou qarauni kemudou mai vei ira nai to ni tevoro, dou qarauni kemudou mai vei ira na dau vei vakacacani.

³Oi keda eda sa cilivi, na noda lotu vua na Kalou e sa vakayalo, eda sa reki tikoga vei Karisito Jisu, ka sega ni da vakararavi tiko ena ka vakayago,

⁴Oi au e dua, me'u vakararavi ena ka vakayago. Kevaka e dua e nanuma tiko me vakararavi ena ka vakayago, oi au e dua ni'u uasivi cake kina:

⁵Au a cilivi ena i ka walu ni siga, au a sucu me luvei Isireli, mai na yavusa i Penijamini, oi au na Iperiu dina; ena ka ni vunau, oi au na Farisi;

⁶Oi au e dua na dau lomakatakata, au dau vakararawataki ira nai soqosoqo lotu; me baleta na yalododonu sa rawa mai nai vunau, au sa sega ni cala ena dua na tikina.

⁷Ia e sega sara ga ni dua na ka vinaka e kauta mai vei au, na ka kece oqori au sa biuta tani e na vuku i Karisito,

⁸Io e dina ga ni'u sa biuta tani taucoko na ka kecega, me rawa ni uasivi cake kina na noqu veikilai kei na noqu Turaga o Jisu Karisito, e na vukuna au sa vosota kina, me yali vei au, na ka kecega au vakararavi kina, au sa wiliki ira me vaka na benu e mataqu, me'u rawati Karisito ga kina me noqu.

⁹Me laurai vei au o koya, me kakua ni tu vei au na veivakadonui sa rawa mai nai vunau, ia o koya ga sa rawa e na vuku ni vakabauti Karisito, kei na veivakadonui mai vua na Kalou, e na vuku ni vakabauta;

¹⁰Ka me'u kilai koya kei na kaukauwa ni Nona tucake tale mai na mate, ka me keirau veitokani vata ena ka rarawa, ka me'u vakatautauvatani ena Nona mate,

¹¹Au na rawata kina, na noqu tucake tale mai na mate.

¹²Au se sega sara ni rawata kece, se me'u sa rawata taucoko; ia au sa sasaga tikoga, me'u yacova yani na veika sa vakarautaka vei au o Karisito Jisu.

¹³Oi kemudou na veiwekani, au sa sega ni vakasamataki au ni'u sa taura oti; ia sa dua ga na ka'u sa cakava, au sa guilecava na ka sa oti, ka'u sa kakavaki me'u rawata ga na ka ki liu,

¹⁴Au sa ciciva tikoga na cere, me'u rawata nai sala mai cake, o koya sa kacivi au kina na Kalou ena vuku i Karisito Jisu.

¹⁵O koya oqo, ni da sa yacova na matua vakayalo me da vakasamataka na veika oqo; kevaka dou na lomatarotaro kina, na Kalou ena vakatakila vei kemudou na kena dina.

¹⁶Ena vanua cecere eda sa mai yacova tiko oqo, meda tomana tikoga me vaka na kena i vakarau, meda maroroya tikoga na lomavata.

¹⁷Oi kemudou na veiwekani, dou mai muria na noqui vakarau, ka dou wanonova matua nai valavala ni tamata lotu, keitou sai vakarau vei kemudou.

¹⁸Ni levu era muri tiko, au sa dau tukuna tiko vakawasoma vei kemudou, oqo mada ga au sa baci tagi ni'u cavuta tiko, ni ra sa meca ni kauveilatai i Karisito.

¹⁹Ena kedra i tinitini na rusa, e nodra Kalou na ketedra, era na vakamaduataki ena ka era lagilagi kina- era dau vakananuma tu ga na veika vakavuravura.

²⁰Eda sa lewe ni koro mai lomalagi, o koya oqo eda sa waraka tiko kina na noda i Vakabula, na Turaga o Jisu Karisito,

²¹O Koya ena mai veisautaka na yago vuca oqo me yago e vakamataliataki, me vaka na kaukauwa e tu Vua, ena Nona vakamalumalumutaka na ka kecega.