[50] Filipai 4

¹O koya oqo, oi kemudou na wekaqu, au sa daulomani kemudou vakalevu, oi kemudou na noqui tekiteki, mo dou tudei vua na Turaga, oi kemudou au sa daulomana.

²Au vakamamasu vei Otaia au vakamamasu vei Senitiki, me rau monavata mada ena Turaga.

³Au vakamasuti kemudou talega, noqui tokani dina, mo dou vukei rau mada na yalewa oqo, ni rau sa daucakacaka vata kei au ena i tukutuku vinaka, kei Kelemedi talega, kei ira talega na noqu i tokani sa tu na yacadra ena i vola ni bula.

⁴Dou reki tiko ga vua na Turaga, au na tukuna tale, dou reki!

⁵Me ra kila na tamata kecega na nomudou yalomalumalumu, sa voleka sara na Turaga.

⁶Dou kakua ni lomaocaocataka e dua na ka, ia ena ka kecega, mo dou vakaraitaka tiko vua na Kalou, ena nomudou kerekere ena masu kei na cikecike kei na vakavinavinaka;

⁷Na Nona vakacegu na Kalou, sa uasivita na ka kecega e kilai rawa, ena maroroya ka vakataudeitaka na yalomudou kei na lomamudou, ena vuku i Karisito Jisu.

⁸Me'u tinia na veiwekani, a ka kecega sa dina, na ka kecega e vakaTuraga, na ka kecega e dodonu, na ka kecega e savasava, na ka kecega e talei, na ka kecega e yaco kina na rogorogo vinaka, kevaka e dua na ka e vinaka, se na ka e dau dokai “ dou dau vakananuma na veika oqo.

⁹Na veika dou sa vakatavulici kina, ka vakabauta ka rogoca ka raica vei au, dou kitaka sara, na Kalou ni veivakacegui ena qai tiko vata kei kemudou.

¹⁰Ia au sa reki vakalevu vua na Turaga ena vukumudou, ena nomudou nanumi au, ni'u raica ni sa qai vaka me toso cake tale; sa dua na ka nomudou dau via soli ka, ia e sega tikoga ni dua na gauna vinaka mo dou cakava kina ena vuku ni osooso.

¹¹Au sega ni vosa me'u tukuna na leqa e tarai au tu, ia au sa vakavulici au ga, me'u vakacegu tiko, ena ka kecega sa yaco vei au:

¹²Au sa kila na vakadravudravuataki, au sa kila na vakavutuniyautaki. Ena veivanua kei na ka kecega sa yaco, au sa vakatavulici kina me'u mamau, me'u viakana talega, ka me'u vutuniyau, me'u dravudravua talega.

¹³Au sa rawa ni cakava na ka kecega ena vuku i Karisito o koya sa vakaukauwataki au.

¹⁴Sa dua na ka vinaka dou vakayacora, ena nomudou dodoliga mai ena gauna ni noqu leqa.

¹⁵Oqo vei kemudou mai Filipai, dou kila vinaka na kena a tekivu nai tukutuku vinaka, ni'u sa biuti Masitonia mai, e sega sara ga ni bau dua nai soqosoqo lotu, me vukei au ena i lavo se kakana, ia oi kemudou duaduaga.

¹⁶Ena noqu tiko mai Cesalonaika, dou a vakauta yani kina vakadua ka vakarua talega eso nai loloma me baleti au.

¹⁷Au sega ni vakasaqara na ka ni loloma, ia au gadreva vakalevu na vua me tiko vei kemudou.

¹⁸Sa mai levu na ka sa tu oqo vei au, sa sega tale ni'u qai leqa. Au sa mai vakaiyautaki ena ka ni loloma dou solia mai vei Epafirataito, nai solisoli boi kamikamica, ai madrali sa vakadonui, sa vinakata vakalevu na Kalou.

¹⁹O koya na noqu Kalou, ena solia me na sotava nomudou dui leqa kecega, me vaka na Nonai yau vakaiukuuku ena vuku i Karisito Jisu.

²⁰Ia me soli tikoga vua na Kalou o Tamada na vakarokoroko ka sega ni mudu. Emeni.

²¹Au sa loloma yani vei ira sa lotu, era tu vata kei Karisito Jisu. O ira na veiwekani era tiko oqo kei au, era sa loloma tu yani.

²²O ira kece sa lotu tu eke era sa loloma tu yani, ia ka vakabibi na nodra loloma tiko yani, na lewe ni vuvale i Sisa.

²³Na yalololoma ni noda Turaga o Jisu Karisito me sa nomudou kecega. Emeni.