[1] Vakatekivu 1

¹Na Kalou, e nai tekitekivu ni ka kecega, sa vakavuna na veilomalagi kei na vuravura.

²Na vuravura sa sega ni vakavotukana tu, qai lala talega; na kena butobuto sa titobu sara. Na Yalo ni Kalou sa vakaraica sobu tu mai na dela ni wai.

³Na Kalou sa tukuna, "Me sa rarama mai," sa qai dua sara na rarama.

⁴Na Kalou sa raica na rarama, ka sa vinaka. Na Kalou sa wasea na rarama mai na butobuto.

⁵Na Kalou sa tukuna, na rarama me Siga, kei na butobuto me Bogi. Na karobo ni yakavi ki na kida ni mataka, sai matai ni siga.

⁶Na Kalou sa tukuna, "Me dua mada na kabukabu, me wasea na veiwai mai na veiwai."

⁷Na Kalou sa qai cakava na kabukabu, ka sa wasea na wai sa tiko ena ruku ni kabukabu kei na wai ena dela ni kabukabu, sa yaco me vakakina.

⁸Na Kalou sa vakayacana na kabukabu ni maliwa lala, na Lomalagi, sa karobo na yakavi ka sa mataka tale, sai karua ni siga.

⁹Na Kalou sa tukuna, "Na wai kece ena ruku i lomalagi, me vakasoqoni kece ena dua na vanua, ka me basika mai na vanua mamaca;" sa yaco me vakakina.

¹⁰Na Kalou sa vakayacana na vanua mamaca me Vuravura, kei na wai sa vakasoqoni vata tu, me, Wasawasa. Na Kalou sa raica oqo ni sa vinaka.

¹¹Na Kalou sa qai tukuna, "Na vanua me vakatubura mai na veico, na veisenikau kei na botebotekoro sa vakasorena, na veivunikau sa vakavuana ena kena veimataqali sa tiko e loma na sorena," sa yaco me vakakina.

¹²Sa tubu mai na veico, na veisenikau, na botebotekoro vakasorena na kena veimataqali, na veivunikau vakavuana sa tiko e loma na sorena ena kena veimataqali. Na Kalou sa raica ni sa vinaka.

¹³Sa karobo, ka sa mataka tale na i katolu ni siga.

¹⁴Na Kalou sa tukuna tale, "Me dua na rarama me tiko mai lomalagi, me wasea na siga mai na bogi, me vakatakilakila ni veiveisau ni veitabadraki kei na veitaba-gauna, vakasiga ka vakayabaki talega;

¹⁵"Me rarama kina na veilomalagi ka me solia mai na rarama e vuravura." Sa yaco me vakakina.

¹⁶Na Kalou sa cakava e rua na rarama levu, na rarama levu me lewa na siga kei na rarama me lewa na bogi. Sa bulia talega na veikalokalo.

¹⁷Na Kalou sa vakatikori ira na veirarama oqo ena veiyasana vakalomalagi, me ra solia mai na rarama ki vuravura,

¹⁸ka me ra lewa talega na siga kei na bogi, me ra wasea na rarama mai na butobuto. Na Kalou, ni sa raica oqo, sa vinaka vua.

¹⁹Oqo na karobo ni yakavi kei na mataka, sa i ka va ni siga.

²⁰Na Kalou sa qai tukuna, "Me sa levu mai na wai, ka me levu talega mai na vei manumanu bula, me ra sa vuka mai na manumanu vuka e delai vuravura ka vukaca yani na veiyasana vakalomalagi."

²¹Na Kalou sa qai bulia na veimanumanu levu ni waitui kei na veika bula kecega era sinai tu mai na wailevu ena kena veimataqali, na vei manumanu kece vakatabana ena kena veimataqali. Na Kalou, ni sa raica oqo sa vinaka vua.

²²Na Kalou sa qai vosa vakalouvinakataka na veika oqo ka tukuna, "Mo ni yagavakalevu ka vakavuqataki kemuni ka vakatawana na wai ni wasawasa kei na manumanu vuka me levu sara e vuravura."

²³Sa qai karobo na yakavi ka mataka tale ni kalima ni siga.

²⁴Na Kalou sa qai tukuna, "O vuravura me kauta mai na veika bula me vaka na kena veimataqali na manumanu yavai va, na veimanumanu kece sa qasi voli, na veimanumanu kila ni veikau, o ira kece oqo kei na kena veimataqali," sa yaco me vakakina.

²⁵Na Kalou sa bulia na veimanumanu ni vuravura me vaka na kena veimataqali, na bulumakau, na veika sa qasi voli, na veimanumanu kila ni vanua, me vaka na kedra dui veimataqali. Na Kalou ni sa raica oqo, sa vinaka dina.

²⁶Na Kalou sa tukuna, "Medatou bulia mada na tamata me vakataki kedatou, me rairai vakataki kedatou, me ra lewa na vei ika kecega mai wai, na veimanumanu vuka e macawa kei na manumanu kecega ni vanua kei na veika kecega sa qasi voli e delai vuravura."

²⁷Na Kalou, sa qai bulia na tamata me vakataki Koya ga, e nai rairai ga e va-Kalou, na Kalou sa bulia kina na tamata, na tagane kei na yalewa sa bulia o Koya.

²⁸Na Kalou sa vakalouvinakataki rau, ka sa tukuna vei rau, "Mo drau yagavakalevu ka vakalewelevutaki kemudrau, me vakatawai o vuravura ka me vakarorogo vei kemudrau; drau lewa na ika mai wai, na manumanu vuka e macawa, kei na veika kecega sa lako voli e delai vuravura."

²⁹Na Kalou sa tukuna, "Raica, Au sa solia vei kemudrau na veico kei na veika sa tubu mai ena qele, ka vakasorena tiko kei na vei vunikau vakavuana sa tiko e loma na sorena, oqori me kakana.

³⁰"Na vei manumanu kece ni veikau kei na manumanu vuka ni macawa kei na veika kecega sa qasi voli e vuravura ka bula tiko, Au sa solia vei ira na co kei na botebotekoro kecega sa tubu mai me kedra kakana;" sa yaco me vakakina.

³¹Na Kalou, ni sa raica na veika kece sa cakava oti, io, sa dina, sa vinaka sara. Sa qai karobo na yakavi ka mataka ni ka ono ni siga.