[1] Vakatekivu 2

¹Na veilomalagi kei na vuravura, kei na ka kecega sa tiko kina, sa buli oti.

²Ena i kavitu ni siga, sa mai oti kina na Nona cakacaka na Kalou. Sa vakacegu ena i kavitu ni siga na Kalou mai na Nona cakacaka kecega ni veibuli sa cakava oti.

³Na Kalou sa qai vakalouvinakataka nai kavitu ni siga ka vakatabuya, baleta ni sa vakacegu mai na Nona cakacaka kecega sa cakava ka bulia na Kalou.

⁴Oqo nai tukutuku ni veigauna kei lomalagi kei vuravura, ena gauna rau sa buli kina, ena siga sa bulia kina na lomalagi kei na vuravura na Kalou o Jiova,

⁵ni se bera ni tubu mai e dua na kau ena vanua se, e dua na co me tubu mai. Na Kalou o Jiova e se bera ni vakavuna me tau mai na uca ki vuravura, ka e se bera ni tiko e dua na tamata me vakarautaka na qele;

⁶sa lako cake ga mai na tegu mai vuravura ka vakasuasuataka na qele taucoko.

⁷Na Kalou o Jiova sa bulia na tamata mai na kuvu ni soso mai na qele ka solia nai cegu ni bula ki na ucuna; sa qai yaco me dua na ka bula na tamata.

⁸Na Kalou o Jiova sa tea e dua nai teitei ena tokalau kei Iteni, sa qai vakatikora e kea na tamata sa bulia oti.

⁹Mai na qele, na Kalou o Jiova sa vakatubura mai kina na kau kecega sa vinaka ni laurai, ka sa vinaka talega ni laukana. Na vunikau ni bula sa tiko talega ena loma ni teitei kei na vunikau talega sa kilai kina na vinaka kei na ca.

¹⁰E dua na uciwai sa drodro mai Iteni me vakasuasuataka na i teitei. Mai Iteni ga sa wase va mai kina na uciwai oqo.

¹¹Nai matai ni uciwai o Pisoni, sa drodro yani ena vanua taucoko o Avila, na vanua sa tiko kina na koula.

¹²Na koula ni vanua oqo sa rui vinaka. Na vatu talei, na onikisa sa tu e kea.

¹³Na yaca ni karua ni uciwai o Kioni; oqo e curuma yani na vanua taucoko o Kusi.

¹⁴Nai katolu ni uciwai o Itekeli, na uciwai oqo sa lako yani vaka ki Asiria. Na i ka va ni uciwai na Uferetisi.

¹⁵Na Kalou o Jiova sa kauta na tamata ka biuti koya ena i teitei mai Iteni me qarava ka maroroya.

¹⁶Na Kalou o Jiova sa vakarota na tamata ka vaka: "Na veika kece sa tiko ena i teitei oqo mo kana mai kina;

¹⁷"Ia na vunikau ga ni kila na ka vinaka kei na ka ca, mo kua ni kania, na siga o na kania kina na vuana, o na mate dina."

¹⁸Na Kalou o Jiova sa tukuna, "Sa sega ni vinaka vua na tamata me tiko duadua. Au na cakava e dua na nonai i vukevuke me vakatautauvatataki kei koya."

¹⁹Na Kalou o Jiova sa bulia mai na qele na manumanu kecega ni vanua kei na manumanu vuka ni macawa ka kauta mai vei Atama me raica se ena kacivi ira vakacava. Na yaca ga sa kacivi ira kina o Atama, sa yacadra sara ga.

²⁰O Atama sa vakayacani ira kece na manumanu yavai va kei na manumanu vuka kecega kei na manumanu kecega ni vanua. Ia me baleti Atama, sa sega ni kune e dua me tautauvata kei koya me rawa ni dau veivuke vua.

²¹Na Kalou o Jiova sa vakavuna e dua na moce bi vei Atama ka sa moce lutu sara kina. Na Kalou sa taura mai e dua na sui ni sarisarina ka ubia vinaka tale na lewena.

²²Na Kalou o Jiova sa vakayagataka na sui nei Atama me bulia kina na yalewa, ka sa kauta sara mai vua na tamata.

²³Sa tukuna sara o Atama: "Oqo na sui mai na suiqu, na lewe mai na lewequ, sa na Yalewa o koya, baleta ni a wasei mai vua na Tagane."

²⁴Oqo, na vuna, ena biuta kina na tamana kei na tinana na tagane ka sema vei yalewa (watina), me rau sa yago vata.

²⁵E rau sa luvawale ruarua tu na tagane kei na watina, e rau sa sega ni madua kina.