[1] Vakatekivu 13

¹Sa lako tani mai Ijipita o Eparama, kei watina kei na veika kece e nona, kei Loti, mai na Ceva.

²Sa vutuniyau sara o Eparama ena manumanu susu, ena siliva kei na koula.

³Sa lako yani ena nona i lakolako mai na ceva me yaco sara ki Peceli “ sa yaco sara yani ena vanua ea tiko kina e liu, o ya ena kedrau maliwa o Peceli kei Ai,

⁴ki na vanua e a cakava kina nai cabocabo ni soro. E kea sa kaciva kina o Eparama na yaca i Jiova.

⁵O Loti talega “ ni rau a lako vata kei Eparama, sa levu sara na nona manumanu susu kei na nona bulumakau kei na nona veivale laca.

⁶Sa sega ni levu na vanua me rau tiko kina, baleta ni sa rui levu na veika e rau taukena.

⁷Era sa veiqati talega na dauqaravi ira na nodrau manumanu, na nei Eparama kei na nei Loti. O ira na kai Kenani kei ira na Perisaiti era sa tiko ena vanua.

⁸Sa tukuna o Eparama vei Loti, "Raica, me daru kua ni veiqati, se o ira na nodaru dauqaravi manumanu, ni da sa veiwekani voleka.

⁹"Sa sega beka ni tu oqori e matamu na vanua taucoko? Au kerea, me daru sa tawase, kevaka o sa lako ki nai mawi, au na lako ki nai matau, se o lako ki nai matau, au na lako ki nai mawi."

¹⁰Sa rai cake o Loti ka raica na buca ena Joritani, ni sa tu na wai e na veiyasana kecega (oqo ni se bera ni vakarusai kina o Sotoma kei Komora) ka sa vaka na were nei Jiova, sa vaka na vanua mai Ijipita ni o lako yani vaka ki Soa.

¹¹Sa digitaka o Loti na buca ni Joritani “ sa lako ki na tokalau o Loti. E rau sa veitawasei.

¹²Sa tiko e Kenani o Eparama, ka sa tiko ena veikoro mai na buca o Loti, sa la'ki birika sara na nona vale-laca e Sotoma.

¹³O ira na tamata mai Sotoma, era sa tamata i valavala vakasisila sara ka sinai e nai valavala ca vei Jiova.

¹⁴O Jiova sa qai tukuna vei Eparama ni sa lako tani mai vua o Loti: "Mo rai cake mai na vanua o sa tu kina oqori “ ki na vualiku “ ki na ceva “ ki na tokalau - ki na ra;

¹⁵"Na vanua kece o sa raica oqori, Au sa solia vei iko kei ira kece na nomu kawa me sega ni mudu.

¹⁶"Au na cakava vei ira na nomu kawa me ra vaka na kuvu ni soso e vuravura; kevaka e dua na tamata e wilika rawa na kuvu ni soso “ ena qai wiliki rawa na nomu kawa.

¹⁷"Oqo mo tu cake, ka lakova na balavu kei na kena raraba ni vanua Au sa solia vei iko."

¹⁸Sa tucake o Eparama ka lobika na nona valelaca ka lako yani ka la'ki tiko ena vuni-terebinici e Mamire, oqori e Epironi, sa tara maikea e dua nai cabocabo ni soro vei Jiova.