[1] Vakatekivu 14

¹Sa qai yaco ena veisiga nei Emarafeli na tui Sina, Arioki na tui Elasa, Jadorilaoma na tui Ilama, kei Tidala na tui ni veimatanitu,

²Era sa vala kei Bera na tui Sotoma “ Birisa na tui Komora, o Sinabe na tui Atama, Semeba na tui Seboimi kei na tui Bila (oqori o Soa).

³O ira kece oqo era sa mai sotasota ena buca mai Sidimi (oqori na Waitui Masima).

⁴E tinikarua na yabaki era sa qaravi Jadorilaoma, ena i ka tinikatolu ni yabaki, era sa via veicoqa ka talaidredre.

⁵Ena i katinikava ni yabaki, o Jadorilaoma kei ira na tui era sa tiko vata era sa lako mai ka valuti Refaimi e Esitaroci Karenaimi, o ira na Susimi e Ame, o ira na Emimi e Savei Kiriacaimi,

⁶kei ira na Oraite ena veiulunivanua e Sairi, me yaco sara ki Eli-Perana o ya ena vanua liwa.

⁷Era sa vuki lesu tale ka lako mai ki Misifata (o ya o Kadesi) ka valuti ira kece na Amalekaiti kei ira na Amoraiti, o ira sa vakaitikotiko e Asesoni Tamari.

⁸Na tui Sotoma, na tui Komora, na tui Atama, na tui Seboimi kei tui Bela (oqori o Soa) era sa lako yani ka duavata ena i valu mai na buca o Sidimi

⁹me valuti Jodarilaoma na tui Ilama, Tidala na tui ni veimatanitu, Amarafaele na tui Saina, kei Arioki na tui Elasa “ e va na tui kei ira na lima na tui.

¹⁰Na buca mai Sidimi sa sinai kina na qara dregadregata; o ira na tui ni Sotoma kei Komora era sa dui dro, eso era sa lutu ki na qara ka so era dro ki na veiulunivanua.

¹¹Era sa taura kece nai yaya vinaka mai Sotoma kei Komora kei na nodra i votavota ka era sa lako yani.

¹²Era sa kauti Loti talega “ na luvei taci Eparama, o koya sa tiko mai Sotoma, kei na veika kece e nona, ka lako.

¹³E dua vei ira sa dro mai, ka mai tukuna vei Eparama na Iperiu, ni sa tiko o koya mai Mamire ena veivunikau e Amoraiti, na taci Esekoli, na taci Ena, era sa duavata kei Eparama.

¹⁴Ni sa rogoca o Eparama, sa kau vakavesu na tacina, sa vakayaragitaki ira na tolu na drau tinikalima na nona dauveiqaravi sa vakavulici oti, o ira oqo, era sa sucu ga ena nona loma ni vale, era sa cici muri yani vaka ki Tani.

¹⁵Sa wasei ira na nona i valu ena bogi. O koya kei ira na nona tamata era cici muri ira na meca me yaco sara ki Oba ena vualiku kei Tamasiko.

¹⁶Sa kauta lesu mai na vei ka kece nei Loti kei Loti talega, o ira na yalewa kei ira kecega na tamata.

¹⁷Sa lako yani o tui Sotoma me sotavi koya mai na buca o Savei (oqori na Tui ni Buca) ena nona lesu mai ena nona vakadrukai o Jadorilaoma kei ira na tui era sa tiko vata.

¹⁸O Melekisateki na tui Salemi sa kauta mai na madrai kei na waini. O koya oqo na bete nei Koya na Kalou Cecere.

¹⁹Sa vosa vakalouvinakataki Eparama ka vaka: "Me kalouvinaka o Eparama ni Kalou Cecere, Na i Taukei, ka lewa na lomalagi kei vuravura;

²⁰Me kalouvinaka talega na Kalou sa cecere sara, o Koya sa soli ira na kemu meca e ligamu." Sa solia vua o Eparaama nai sigana (katini) kecega.

²¹Sa tukuna na tui Sotoma vei Eparama, "Mo soli ira na tamata mai vei au ka kauta kece na veika sa tu oqori."

²²Sa sauma yani o Eparama vei tui Sotoma, "Au sa laveta oti na ligaqu vei Jiova, na Kalou Cecere, nai Taukei kei lomalagi kei vuravura,

²³"Ni'u na sega ni kauta e dua na ka, mai nai vesu ni vava, au na sega ni kauta e dua na ka e nomu, de o na tukuna, 'Au sa vaka vutuniyautaki Eparama'”

²⁴"Vakavo walega na veika era sa kania na cauravou, nai votavota ni tamata era sa lako vata kei au: O Ana, o Esikoli, kei Mamire; me ratou kauta na nodratou i votavota."