[1] Vakatekivu 15

¹Ni sa oti oqo, sa lako mai na vosa i Jiova vei Eparama ena raivotu ka tukuna, "Mo kua ni rere Eparama, oi Au na nomu i sasabai, kei na nomu i votavota e levu sara."

²Sa tukuna mai o Eparama, "I Jiova na noqu Kalou, na cava o ni na solia vei au, sa sega na luvequ, na kawa ga ni noqu o Iliesa na kai Tamasiko?"

³Sa tukuna tale o Eparama, "Raica o ni sa sega ni solia vei au na kawa: me dua ga e sucu e noqu vale me noqu kawa!"

⁴Sa qai lako tale mai vua na vosa i Jiova ka vaka: "O Iliesa ena sega ni nomu kawa, e dua ga ena lako mai ena yagomu dina ena wili me nomu kawa."

⁵O Jiova sa qai kauti koya i tuba ka tukuna, "Mo rai mada i lomalagi ka wilika mada na veikalokalo, kevaka e rawa ni o wilika ira," sa tukuna tale vua, "Era na vaka oqori na nomu kawa."

⁶Sa vakabauti Jiova o Eparama, na Kalou sa wiliki Eparama me yalododonu.

⁷Na Kalou sa vosa vei Eparama ka vaka, "Oi Au o Jiova, o Koya sa kauti iko mai Uri e Kalitia, Me'u solia vei iko na vanua oqo mo taukena."

⁸Sa sauma yani o Eparama, "I Jiova na Kalou me'u kila vakacava ni'u na taukena?"

⁹Na Kalou sa sauma vei Eparama, "Kauta mai vei Au e dua na luve ni bulumakau yabaki tolu, e dua na me yalewa yabaki tolu, e dua na luve ni sipi yabaki tolu, e dua na ruve dina kei na dua na ruve kawa vata."

¹⁰Sa kauta kece mai oqo o Eparama vei Jiova musuka wase rua na manumanu kece ka sega ga na ruve e rua oqo.

¹¹Ni ra sa vuka sobu mai na tuivucilevu me ra mai kana, sa cemuri ira tikoga o Eparama.

¹²Ni sa dromu sobu na siga, sa tarai Eparama e dua na via moce levu, sa yaco mai vua e dua na rere kei na butobuto levu.

¹³Na Kalou sa tukuna vei Eparama, "Mo kila oqo “ ni o ira na nomu kawa era na vulagi ena vanua oqo, o koya sa sega ni nodra, era na qaravi ira, era na vakararawataki kemuni me va na drau na yabaki.

¹⁴"Na matanitu talega era na qarava, Au na veilewaitaki ira “ ni oti o ya era na qai sereki mai kei na veika era na taukena, ena levu sara.

¹⁵"O iko, o na lako vei ira na tamamu ena vakacegu. O na buluti ni o sa qase vinaka sara.

¹⁶"Ena i kava ni tabatamata, era na qai lesu tale mai eke, baleta na nodra talaidredre vakasisila na Amoraiti e se bera ni taucoko."

¹⁷Sa oti oqo, sa qai dromu na matanisiga, sa butobuto sara, sa dua na lovo sa kuvu tiko, kei na yameyame sa caudre tiko, sa lako voli ena kedra maliwa na lewe ni manumanu.

¹⁸Ena siga vata ga o ya, sa cakava kina e dua na veiyalayalati o Jiova kei Eparama ka vaka: "Kivei ira na nomu kawa Au sa solia kina na vanua oqo, mai na uciwai mai Ijipita ki na Uciwai levu na Uferetisi ”

¹⁹"Na Kenaiti, na Kenaseraiti kei na Kadomonaiti,

²⁰"Na Itaiti, na Perisaiti kei na Refaimi,

²¹"Na Amoraiti, na Kenaninaiti, na Qeviqasaiti kei na Jepusaiti."