[1] Vakatekivu 18

¹Sa basika o Jiova vei Eparaama ena vunikau ni Mamire, ena nona a dabe tiko ena mata ni nona vale laca, ena katakata ni siga.

²Sa rai cake ka raica, e tolu na tamata sa tu vata kei koya; ni sa raici iratou, sa cici yani me sotavi iratou, sa cuva sobu ki na qele,

³Ka tukuna, "Noqu turaga kevaka au sa kune loloma e Matamuni, mo ni kua ni lako sivia na Nomuni tamata."

⁴"Me kau mada mai e dua na wai me sava kina na yavamudou, ka dou vakacegu mada ena ruku ni vunikau.

⁵"Au na kauta mai eso na madrai me vakabulabulataka na yalomudou, ni oti o ya, dou na qai lako, oqo, baleta ni dou sa lako mai vua na Nomudou tamata." E ratou sa tukuna mai, "Mo cakava me vaka o sa tukuna."

⁶Sa vakatotolo o Eparaama ki na vale laca vei Sera ka tukuna, "Mo cakava mada vakatotolo e tolu nai vakarau falawa, bulia eso na keke."

⁷Sa cici yani o Eparaama ka vakarautaka e dua na luve ni bulumakau vinaka ka solia vua na nona cauravou me vakarautaka vakatotolo.

⁸Sa kauta mai na bata kei na sucu kei na manumanu sa vakarautaki, ka vakarautaka e matadratou; sa tu vakarau tuga o Eparaama ena ruku ni vunikau ni ratou sa kana tiko.

⁹E ratou sa tukuna vei Eparaama, "E vei o Sera na watimu?" Sa sauma mai, "Oqo ena vale laca."

¹⁰Sa qai tukuna o Koya, "Au na lesu tale mai vei iko ena gauna ni bula, ka raica, o Sera na watimu ena vakasucuma e dua na gone tagane." (Sa vakarorogo tu o Sera ena mata ni katuba ena dakui koya e vosa tiko.)

¹¹O Eparaama kei Sera e rau sa qase sara ka sa levu na nodrau veiyabaki; sa sivia talega o Sera na veiyabaki ni vakasucu gone.

¹²Sa cuva ka dredre ga e lomana o Sera ka tukuna, "Au sa qase mai oqo, me'u na ia tale beka na veidomoni, ni sa qase talega o noqu turaga?"

¹³Sa tukuna mai o Jiova vei Eparaama, "Na cava e dredre kina, o Sera ka tukuna, 'Au na vakasucu beka, ni'u sa qase mai?'

¹⁴"E dua beka na ka e sa rui dredre vei Jiova? Ena gauna sa lokuci, Au na lesu tale mai vei iko, me vaka na gauna ni bula, o Sera ena vakasucuma mai e dua na gone tagane."

¹⁵Sa cakitaka o Sera ka tukuna, "Au a sega ni dredre," baleta talega ni sa rere. Sa tukuna mai o Jiova, "E sega, o iko, e a dredre dina!"

¹⁶E ratou sa tucake na tamata, ka rai yani ki Sotoma, sa lako talega vata kei iratou o Eparaama me raica na nodratou lesu yani.

¹⁷Sa tukuna o Jiova, "Me'u vunitaka beka vei Eparaama na veika Au na cakava,

¹⁸"Baleta, ni o Eparaama ena yaco me matanitu levu ka qaqa, na veimatanitu taucoko e vuravura era na vakalouvinakataki mai vua?

¹⁹"Ni'u sa kilai koya, me rawa kina vua me vakaroti ira na luvena kei ira na nona vuvale era muri koya, me ra muria na sala i Jiova, me ra cakava na ka dodonu kei na lewa, me kauta mai kina o Jiova vei Eparaama na veika sa vosa oti kina vua."

²⁰Sa qai tukuna tale o Jiova, "Baleta na tagi me baleti Sotoma kei Komora sa rui levu sara, kei nai valavala ca sa rui vakasisila dina,

²¹"Au na lako sobu oqo, Me'u raica, se, sa dina na veika sa lako cake mai vei Au; ke sega, Au na kila."

²²E ratou sa lako tani mai kea na tamata, ka lako vaka ki Sotoma, o Eparaama e se tu ga ena mata i Jiova.

²³Sa lako voleka mai o Eparaama ka tukuna, "O ni na vakarusai ira vata na yalododonu kei ira nai valavala ca?

²⁴"Kevaka mada ga era sa tiko ena koro e limasagavulu na yalododonu “ o ni na vakarusa vata kei ira na yalododonu oqo?

²⁵"E sega ni dodonu vei Kemuni oqo, Mo ni vakarusai ira vata na yalododonu kei ira na i valavala ca, me ra vaka kina nai valavala ca na yalododonu “ me yawa sara vei Kemuni oqo. Me kua beka ni lewa vakadodonu na Turaga ni lewa levu kei vuravura?"

²⁶Sa tukuna mai o Jiova: "Kevaka Au sa kunea e Sotoma e limasagavulu na tamata yalododonu, Au na sega ni vakarusa na koro ena vukudra na lewe limasagavulu na yalododonu oqo."

²⁷Sa vosa tale yani o Eparaama ka vaka, "O au sa vaka ga na kuvu ni soso kei na dravusa, o cei o au me'u vosa vei Jiova:

²⁸"Kevaka mada ga me vasagavulu ka lima na tamata yalododonu, o ni na vakarusa tikoga na koro?" Sa tukuna mai o Jiova, "Kevaka Au sa raica kina e vasagavulu ka lima na tamata yalododonu, Au na sega ni vakarusa na koro."

²⁹Sa vosa tale vei Jiova o Eparaama, "Kevaka mada ga sa kune kina e vasagavulu na yalododonu?" Sa sauma mai o Jiova, "Au na sega ni cakava ena vukudra na vasagavulu oqori."

³⁰Sa tukuna tale, "Me kua ni cudru mada o Jiova, au na qai vosa: Kevaka mada ga sa kune kina e tolusagavulu na yalododonu?" Sa sauma yani o Jiova, "Au na sega ni cakava ena vukudra na tolusagavulu na yalododonu oqori."

³¹Sa tukuna tale, "Oqo sa na bale ga vei au, au na vosa yani oqo vei Jiova: vakacava ke ruasagavulu na tamata yalododonu era kune ena koro?" Sa tukuna mai o Jiova, "Au na sega ni vakarusa."

³²Sa tukuna tale, "Me kua ni cudru o Jiova, me'u vosa tale vakadua ga, vakacava ke kune kina e tini na yalododonu?" sa tukuna mai o Jiova, "Au na sega ni vakarusa ena vukudra na lewe tini oqori."

³³Sa lako sara yani o Jiova ena Nona sala ni sa vosa oti vei Eparaama “ ka sa lesu tale o Eparaama ki na nona tikina.