[1] Vakatekivu 19

¹E rua na Agilosi sa lako mai Sotoma ena yakavi, o Loti sa dabe tiko ena matamata mai Sotoma. Ni sa raici rau o Loti, sa lako yani me sotavi rau, sa cuva ka vakarokoroko vei rau.

²Sa tukuna sara, "Oqo, oi kemudrau na noqu turaga, drau lako mai ki na nona vale na nomuni tamata ka vakacegu mada kina ena bogi oqo, mo ni mai savata mada na yavamuni, ka qai yadra ena mataka caca ka gole yani." E rau sa tukuna, "E sega, keirau na moce tuga ena saqata."

³Sa cikevi rau vakaukauwa, ka rau sa lako mai ki na nona vale. Sa cakava veirau e dua nai vakayakavi, ka vavia veirau na madrai sega ni vakaleveni ka rau sa kana sara.

⁴Ni se bera ni rau davo sobu me moce, o ira na tagane ena koro, o ira na tagane e Sotoma, kece, o ira na qase kei ira na gone “ o ira kece mai na vei tikina, era sa mai vakavolivolita na vale ka tagava.

⁵Era sa kaci yani vei Loti ka tukuna, "E vei oi rau na tamata e rau sa lako mai vei iko ena bogi oqo? Kauti rau mai tuba me keimami mai tulevu taki rau mada."

⁶Sa lako yani ki tuba o Loti vei ira na tamata ka sogota na katuba mai dakuna;

⁷Ka tukuna, "Au kerei kemuni na taciqu, mo ni kua na cakava na ka vakasisila oqo!

⁸"Raica sa rua tiko na luvequ yalewa, era se bera ni kila na tagane, me'u kauti rau mai vei kemuni ka cakava vei rau na veika ga o ni vinakata; me kua ga vei rau na noqu vulagi oqo “ ni oqo ga na vuna e rau mai vakaruru kina ena noqu vale."

⁹Era sa tukuna mai, "Mo tu vakasuka," era sa tukuna tale, "O koya mada ga oqo, e se qai lako vou mai, ka sa via mai turaganilewa sara, keimami na cakava vaka ca sara vei iko, mai vei rau na rua oqori." Era sa vakaukauwataki Loti, me baleti rau na nona vulagi, ka sa voleka sara na kabasu mai na katuba.

¹⁰Oi rau na tamata (Agilosi) e rau sa dodoka yani na ligadrau, ka dreti Loti mai ki loma ni vale ka sogota na katuba.

¹¹E rau sa samuti ira na tamata ena mataboko, o ira kece sa tu ena mata ni katuba. O ira na lelevu kei ira na lalai, sa dredre kina me ra kila se e vei na katuba ni vale.

¹²E rau sa tukuna na tamata (Agilosi) vei Loti, "Sa tiko tale e dua na wekamu eke? Na vugomu, se luvemu tagane se luvemu yalewa, se o cei ga sa tiko ena koro “ me ra kautani yani!

¹³"Ni keirau na vakarusa na vanua oqo, baleta ni sa lako cake yani vei Jiova na veika ca ni vanua oqo “ sa talai keirau mai kina o Jiova me vakarusa."

¹⁴Sa lako yani o Loti me vosa vei rau na vugona tagane (oi rau na watidrau na luvei Loti yalewa) "Drau tucake ka dro yani “ o Jiova ena vakarusa na vanua oqo!" Vei rau na vugona “ sa vaka ga e veiwali tiko o Loti.

¹⁵Ni sa kida mai na mataka, e rau sa vakatotolo taki Loti na Agilosi ka tukuna, "Tucake, taura na watimu kei rau na luvemu yalewa, de dou qai kama vata ena vakarusai ni koro oqo."

¹⁶Ni se vakaberabera tikoga, na agilosi, sa taura na ligana, na ligai watina kei na ligadrau na luvena yalewa, ni sa rui lomani koya o Jiova, e rau sa kauti koya mai ka sereki koya ena taudaku ni koro.

¹⁷Sa qai yaco ni ratou sa kau mai ki taudaku ni koro, sa qai tukuni vua, "Dro mo bula “ kua ni rai tale i muri se mo vakacegu ena buca. Dro ki na veiulunivanua, de o na vakarusai talega."

¹⁸Sa tukuna yani o Loti, "Isa noqu turaga, me kua oqori!

¹⁹"Sa kune loloma na nomuni tamata e matamuni; o ni sa vakalevutaka na Nomuni loloma o ni sa vakaraitaka, ena Nomuni vakabulai au; au sa sega ni rawa ni dro ki na veiulunivanua “ de ra qai toboki au na ca ka vakamatei au.

²⁰"Sa voleka na koro oqo me'u dro kina, e koro lailai ga me'u dro kina, me bula kina na yaloqu."

²¹Sa tukuna mai na Agilosi vua, "Raica, Au sa totaki iko ena vuku ni ka oqo. Au na sega ni vakarusa na koro oqo, o sa digitaka mo dro kina.

²²"Totolo sara dro yani kina, Au na sega mada ni cakava e dua na ka me yacova ni dou sa yaco kina." Sa yaca ni koro o ya o Soa.

²³Sa cadra na siga e vuravura ni sa curu yani ki Soa o Loti.

²⁴Sa qai vakatauca o Jiova na kuvu kama, kei na bukawaqa e Sotoma kei Komore, mai vei Jiova mai lomalagi.

²⁵O Jiova sa vuaviritaka na veikoro oqori, na veibuca kei ira kece na lewe ni koro kei na veika sa tubu mai na qele.

²⁶O watina sa rai lesu me raici Loti, ka sa yaco me duru vatu (masima).

²⁷Sa lako vaka mataka o Eparaama, ena vanua sa tu kina o koya ena mata i Jiova.

²⁸Sa rai yani vaka ki Sotoma kei Komora, kei na veivanua vaka ki na buca, ka sa raica na kubou ni vanua sa vaka na kubou ni dua na kama levu.

²⁹Sa qai yaco ni sa vakarusa oti na Kalou na veikoro kece mai na buca, na Kalou sa qai nanumi Eparaama, ka sa qai vakatalai Loti tani mai na Nona vuaviri oqo, ni sa vuaviritaka na veikoro sa tiko kina o Loti.

³⁰Sa lako tani mai Soa o Loti ka la'ki tiko ena veiulunivanua vata kei rau na luvena yalewa. Ni sa rere ni tiko e Soa. E ratou sa la'ki tiko ena veiqaravatu.

³¹Sa tukuna o koya e qase veirau na yalewa vei koya e gone, "Sa qase o tamadaru, sa sega na tagane me mai curumi kedaru me vaka na kena i valavala e vuravura.

³²"Me daru vakamatenitaki tamadaru ena waini, ka me daru curumi kina mai vua, me daru maroroya kina na kawa mai vei tamadaru."

³³E rau sa vakagunuvi tamadrau ena waini ena bogi o ya, sa lako yani o koya e qase ka vakacurumi tamana vua. Sa sega ni kila o tamana na nona lako yani kei na nona lesu mai.

³⁴Ena siga ka tarava, sa tukuna na qase vua na tacina gone, "Au sa vakacurumi tamaqu oti vei au ena bogi, oqo me daru cakava tale na waini, me gunu ena bogi oqo, ka mo lako yani, ka vakacurumi koya vei iko me maroroi kina na kawa mai vei tamadaru."

³⁵E rau sa vakagunuvi tamadrau ena bogi o ya. Sa tucake yani o koya e gone, ka la'ki vakacurumi tamana vua. Sa sega ni kila o tamana na nona lako yani kei na nona lesu mai.

³⁶Oi rau ruarua na luvei Loti yalewa oqo, e rau sa vakagone mai vei tamadrau.

³⁷Sa vakasucuma e dua na gone tagane o koya e qase, ka sa vakayacani me o Moape; o koya sa tamadra na Moape me yacova na siga oqo.

³⁸O koya talega sa gone veirau, sa vakasucuma e dua talega na gone tagane, ka sa vakayacani me Peni-Ame (Peniame). O koya oqo na tamadra na Amoni me yacova na siga oqo.