[1] Vakatekivu 21

¹O Jiova, sa sikovi Sera me vaka ga ea tukuna, o Jiova, sa cakava vei Sera me vaka ga ea tukuna.

²Sa kunekune o Sera ka vakasucuma vei Eparaama e dua na luvena tagane ni sa qase sara, ena gauna lokuci ga sa vosa kina vua na Kalou.

³Sa vakayacani koya o Eparaama, na luvena tagane”na luvena tagane sa vakasucuma o Sera “ me o Aisake.

⁴O Eparaama sa cilivi na luvena o Aisake ni sa bogi walu oti, me vaka sa vakarota vua na Kalou.

⁵Sa yabaki dua na drau o Eparaama ena gauna sa sucu kina o Aisake.

⁶Sa tukuna o Sera, "Na Kalou sa vakavuna me'u dredre, ni o ira kece era na rogoca, era na dredre vata kei au."

⁷Sa tukuna talega, "O cei ena tukuna rawa vei Eparaama, ni na mea e dua na gone o Sera? Ni'u sa vakasucuma vua e dua na gone vua ni sa qase sara o koya."

⁸Sa tubu cake na gone ka sa kali sara. Sa cakava o Eparaama e dua na kakana levu ena siga sa kali kina o Aisake.

⁹O Sera, sa raica na luvei Eka na yalewa ni Ijipita vei Eparaama ni veivakalialiai tiko.

¹⁰Sa tukuna kina vei Eparaama, "Mo vakagalalataki rau na yalewa bobula kei na luvena; na luvena na yalewa bobula ena sega ni mai taukei vata kei na luvequ o Aisake."

¹¹Na veika oqo sa sega ni taleitaka o Eparaama baleta na luvena o Isimeli.

¹²Ia, na Kalou sa tukuna vei Eparaama, "Me kakua ni vakararawataki iko na veika me baleta na gone se o tinana na yalewa bobula. Na veika sa tukuna vei iko o Sera, mo rogoca na domona, baleta ena lako mai vei Aisake na nomu kawa.

¹³"Au na cakava talega e dua na matanitu mai vua na luve ni bobula, baleta ni sa luvemu talega."

¹⁴Sa sou ena mataka o Eparaama ka kauta na madrai kei na wai, ka biuta e domo i Eka ka solia na gone vua, sa qai vakatalai rau yani. E rau sa lako yani ka lako voli ena vanua liwa e Perisepa.

¹⁵Sa maca na wai mai na kena bola, ka sa vakadabera tiko na gone ena dua na veico.

¹⁶Sa lako yani o tinana, ka la'ki dabe veibasai tiko mai vei koya, me vaka e dua nai vana ena dakai titi, ni sa tukuna tikoga e lomana, "Me'u kua ni raica na nona mate na gone." Sa dabe tikoga mai vakayawa ka tagi tiko vakadomoilevu.

¹⁷Na Kalou sa rogoca na domo ni gone, ka sa kaci yani vei Eka na Agilosi ni Kalou mai lomalagi ka tukuna vua, "Na cava o sa tagi kina Eka? Kua ni rere, na Kalou sa rogoca na domona na gone mai na vanua e tiko kina.

¹⁸"Mo tucake, keveta na gone e ligamu, Ni'u na cakava me matanitu levu o koya."

¹⁹Na Kalou sa vakaraitaka na matana, ka sa raica sara e dua na tobu wai. Sa la'ki takiva sara na wai ena kena bola, ka solia vua na gone me gunu.

²⁰Na Kalou sa tiko vata kei na gone; sa tubu cake na gone ka sa dau tiko ena vanua liwa, sa yaco talega me dauvavana.

²¹Sa dautiko ena Vanua Liwa mai Parana, sa kauta vua o tinana e dua na watina mai na vanua o Ijipita. E Dua Na Veiyalayalati Vata Kei Apimeleki

²²Sa yaco mai e dua na gauna, o Apimeleki kei Fikoli, (nai liuliu ni mataivalu na Apimeleki) e rau sa veivosaki kei Eparaama ka vaka: "Sa tiko vata kei iko na Kalou ena veika kecega o cakava.

²³"Mo yalataka vei au ena Kalou, ni o na sega ni cakacaka vaka i lasu vei au, vei ira na noqu kawa kei na veika au taukena; me vaka ga na veika vivinaka au sa cakava vei iko, mo cakava vaka kina vei au, ki na vanua talega o na lako kina."

²⁴Sa sauma o Eparaama, "Au na cakava vaka kina."

²⁵O Eparaama sa vakadodonutaki Apimeleki, baleta na mataniwai era sa taura vakaukauwa na dauveiqaravi nei Apimeleki.

²⁶Sa tukuna o Apimeleki, "Au sega ni kila, se o cei sa cakava na ka oqo: O iko sa sega ni tukuna vei au, se me'u rogoca me yacova na siga oqo."

²⁷Sa taura na sipi kei na bulumakau o Eparaama ka solia vei Apimeleki, ka ra sa cakava e dua na veiyalayalati.

²⁸Sa vakatala yani o Eparaama e vitu na luve ni sipi vakataki ira ga.

²⁹Sa tarogi Eparaama o Apimeleki, "Na cava na kena i balebale oqo, na lami o sa vakatalai ira oqo?"

³⁰Sa tukuna mai, "Mo taura mai ligaqu na lami oqo, me noqu i vakadinadina ni'u sa kelia na tobu oqo."

³¹Sa vakayacani kina na vanua me Perisepa, baleta ni rau sa bubului ena veiyalayalati e kea.

³²E rau sa cakava na veiyalayalati e Perisepa, sa tucake o Apimeleki kei Fikoli (nai liuliu ni mataivalu) ka rau sa lesu tale ki na vanua o Filisitia.

³³Sa tea o Eparaama e dua na vu ni tamarisi e Perisepa, ka sa kaciva mai kea na yaca i Jiova, na Kalou Sega Ni Mudu.

³⁴Sa lako voli o Eparaama e lomai Filisitia me vica vata na siga.