[1] Vakatekivu 22

¹Sa oti kece na veika oqo, na Kalou sa vakatovolei Eparaama, ka tukuna vua, "I Eparaama," sa sauma mai, "Sai au oqo."

²Na Kalou sa tukuna tale vua, "Mo kauta na luvemu, na luvemu tagane e dua ga o Aisake, o koya, o sa daulomana, lako ki na vanua o Moraia “ la'ki vakacabori koya me i soro kama ena dua na ulunivanua au na tukuna vei iko."

³Sa sou ena mataka o Eparaama, sa vakarautaka na nona asa, ka kauta e rua na nona cauravou vata kei koya, kei Aisake na luvena; sa taya na buka ni soro kama “ sa tucake ka lako ki na vanua sa tukuna vua, na Kalou.

⁴Ena i katolu ni siga, sa rai cake o Eparaama, sa raica sara na vanua vakayawa.

⁵Sa tukuna o Eparaama vei rau na nona cauravou, "Drau tiko eke kei na asa, na gone kei au, keirau na lako yani ka lotu vei Jiova ka qai lesu tale mai vei kemudrau."

⁶O, Eparaama sa kauta yani na buka ni soro kama ka vakataqara vei Aisake, sa taura mai na buka e waqa kei nai sele, e rau sa lako vata yani.

⁷Sa taro o Aisake, vei Eparaama na tamana ka vaka: "Tamaqu," sa sauma yani, "Sai au oqo na luvequ," sa tukuna sara mai, "Raica na buka e waqa kei na kau me buka sa tu oqo, e vei ga na lami me i soro kama?"

⁸Sa sauma yani o Eparaama, "Na luvequ na Kalou ena vakarautaka vei koya ga e dua na lami me i soro kama." E rau sa lako ruarua vata yani.

⁹E rau sa lako mai ki na vanua sa lesia na Kalou. Sa tara nai cabocabo ni soro o Eparaama ka tuva na buka. Sa vivigi Aisake na luvena ka vakacabora ena i cabocabo ni soro ena dela ni buka sa tuvai tu.

¹⁰O Eparaama sa dodoka na ligana ka taura nai sele, me vakamatea nai soro (luvena).

¹¹Na Agilosi i Jiova sa kaci mai lomalagi ka vaka: "Eparaama i Eparaama!" sa sauma yani, "Sai au oqo."

¹²Sa tukuna mai na Agilosi, "Kua ni vakamatea na gone, se cakava vua e dua na ka, ni oqo, Au sa kila ni o sa rerevaka na Kalou “ ni o sa sega ni via maroroya na luvemu, na luvemu tagane e dua ga, mai vei Au."

¹³Sa rai cake o Eparaama, ka raica e dua na lami sa tacori tu na nona i leu ena dua na veico e dakuna. Sa kauta mai o Eparaama ka vakacabora mei sosomi kei Aisake na luvena mei soro kama.

¹⁴O Eparaama sa vakayacana na vanua o ya me, Sa Vakarautaka O Jiova, me yacova na siga oqo. "Ena Ulunivanua i Jiova, sa vakarautaki kina."

¹⁵Na Agilosi i Jiova sa kacivi Eparaama vakarua mai lomalagi,

¹⁶Ka vaka: "Vei Au ga vakai Au, Au sa bubului kina, sa tukuna vaka oqo o Jiova, ni o sa cakava na ka oqo, ka sa sega ni bureitaka na luvemu tagane e dua ga”

¹⁷"Ena veivakalouvinakataki, Au na vakalouvinakataki iko, ena veivakatuburi, Au na vakatuburi iko vakalevu sara, me vaka na veikalokalo ni lomalagi, me vaka talega na nuku ni veimatasawa. O ira na nomu kawa era na taukena na nodra matamata na nodra meca.

¹⁸"Mai vei iko, na matanitu kece e vuravura era na vakalouvinakataki, baleta ni o sa rogoca na Domoqu."

¹⁹Sa lesu tale o Eparaama vei rau na nona cauravou, e rau sa tucake, ka ratou sa lesu vata ki Periesepa; ka sa tiko mai Periesepa o Eparaama.

²⁰Sa oti na veika oqo, sa tukuni vei Eparaama ka vaka, "O Milika talega sa vakasucu gone vei Neori na tacimu:

²¹"O Usi na ulumatua, o Buse na tacina, o Kemueli na tamai Erami,

²²"O Keseti, o Aso, o Pilidosi, o Jidafa kei Pecueli."

²³O Pecueli sa vakasucumi vua o Repeka. O ira na lewe walu oqo sa vakasucuma o Milika vei Neori na taci Eparaama.

²⁴Na watina lailai o Reuma, sa vakasucumi Teba, Qaema, Taesi kei Maeka.