[1] Vakatekivu 23

¹Sa bula tiko o Sera me dua na drau ruasagavulu ka vitu na yabaki; oqo na veiyabaki ni bula nei Sera.

²Sa mate o Sera mai Kirijaci Araba (oqori o Epironi) ena vanua o Kenani. Sa lako mai o Eparaama me lolokutaki Sera ka tagicaki koya.

³Sa tucake o Eparaama mai na nona mate; ka vosa ki vei ira na luvei Eci ka vaka,

⁴"O au e dua na vulagi, ka dau veitosoyaki tu ga ena kemuni maliwa. Mo ni solia vei au e dua na tikina me noqu i bulubulu ena kemuni maliwa, me'u buluta tani kina na noqu mate mai mataqu."

⁵Era sa sauma vei Eparaama na luvei Eci tagane ka vaka,

⁶"Mo rogoci keimami, na neimami turaga, o sa tamata qaqa ena keimami maliwa, buluta na nomu mate ena vanua ga o sa digitaka. Ena sega ni dua vei keimami ena bureitaka na nona i bulubulu, mo buluta kina na nomu mate."

⁷Sa tucake o Eparaama ka cuva ni vakarokoroko vei ira na tamata ni vanua, na luvei Eci.

⁸Sa vosa talega vei ira ka vaka: "Kevaka sa nomuni gagadre me'u buluta tani na noqu mate mai mataqu “ mo ni rogoci au, mo ni sota mada kei Efironi na luvei Soa ena vukuqu,

⁹"Me solia mada vei au na veiqara vatu e Makapila, o koya sa tiko vua, sa tiko ena mua ni were oqo. Me solia vei au ena kena i sau taucoko. Me taukeni kina nai bulubulu oqo ena kemuni maliwa."

¹⁰O Efironi sa tiko ena kedra maliwa na luvei Eci; sa sauma o Efironi na Itaiti vei Eparaama ena matadra na luvei Eci, o ira kece sa curu mai e nona matamata ka vaka,

¹¹"E sega noqu turaga, au sa solia vei iko na veiwere kei na qara vatu sa tiko kina. Au sa solia vei iko ena matadra kece na noqu tamata, au sa solia vei iko “ buluta kina na nomu mate!"

¹²Sa cuva sobu o Eparaama ena matadra na tamata ni vanua;

¹³sa qai vosa vei Efironi ena matadra kece na tamata ka vaka: "Kevaka o sa solia vei au, mo rogoca talega oqo, au na solia vei iko nai lavo ena vuku ni vanua, taura oqo mai vei au “ au na qai buluta na noqu mate e kea."

¹⁴Sa sauma o Efironi vei Eparama ka vaka,

¹⁵"Mo rogoci au na noqu turaga, na vanua sa kenai sau e rua na drau onosagavulu na dola, na cava oqori ena kedaru maliwa? Buluta ga yani na nomu mate."

¹⁶Sa rogoca o Eparaama na vosa nei Efironi, ka sa vakarautaka na i lavo me vaka sa tukuni ena nodra vakarorogo na luvei Eci, e rua na drau onosagavulu na dola, ena i lavo ni veivoli.

¹⁷Na vanua nei Efironi ena vanua e Makapila sa tiko ena matai Mamire, na vanua kei na qara vatu sa tiko kina, kei na vunikau kece sa tiko kina kei na veika kece sa tiko vakavolivolita, sa tiko ena veivolivoli oqo

¹⁸Vei Eparaama me sa kena i taukei ena matadra kece na luvei Eci, o ira kece sa lako mai ena matamata ni koro.

¹⁹Ni sa oti oqo, sa buluti Sera o Eparaama ena qaravatu ni vanua e Makapila e Mamire (oqori o Epironi) ena vanua e Kenani.

²⁰Na vanua kei na qaravatu sa tiko kina, sa volitaki vei Eparaama mai vei ira na luvei Eci, me nona i bulubulu.