[1] Vakatekivu 4

¹O Atama sa curumi Ivi, ka sa mani kunekune sara o Ivi, ka vakasucumi Keni ka tukuna, "Au sa rawata e dua na tagane mai vei Jiova."

²Sa vakasucu tale, oqo sa sucu o Epeli na tacina. O Epeli sa dau vakaraici ira na sipi, o Keni sa dau teitei ena vanua.

³Ni sa toso tiko na gauna, sa qai yaco me kauta mai o Keni e so na i soro vuata ni vanua vei Jiova.

⁴O Epeli talega sa kauta mai na ulumatua ni nona sipi kei na kedra uro me i soro. O Jiova, sa doka vakalevu nai soro nei Epeli,

⁵sa sega ni taleitaki Keni kei na nona i soro. Sa cudru sara vakalevu o Keni ka sa duatani mai na kena i rairai.

⁶O Jiova sa qai vosa vei Keni ka vaka: "Na cava o via cudru kina? Na cava na vuna sa duatani kina nai rairai ni matamu?

⁷"Kevaka o sa caka vinaka, o na sega beka ni ciqomi? Ia, kevaka o sega ni caka vinaka, sa wawa tiko nai valavala ca mai na mata ni katuba. Sa tiko na nona gagadre vei iko, ia, mo lewa vinaka ga ena vukuna."

⁸E rau sa dau veivosaki o Keni kei Epeli na tacina; sa yaco na gauna ni rau sa tiko e na vanua, sa tucake o Keni ka sa yalocataki Epeli na tacina ka vakamatei koya.

⁹Sa taro mai o Jiova vei Keni, "E vei o Epeli na tacimu?" Sa sauma mai, "Au sa sega ni kila, oi au beka na nonai vakatawa?"

¹⁰Sa tukuna mai o Jiova, "Na cava o sa cakava, na domo ni dra i tacimu sa tagi tiko mai vei Au mai na qele.

¹¹"Oqo o sa vakaloucataki mai vuravura, ni sa dolava na gusuna me ciqoma na dra i tacimu mai na ligamu.

¹²"Ni o sa tea na qele, ena sega ni solia na nona taucoko vei iko. O na tamata dauvakacudrui rawarawa ka o na dau veilakoyaki tu ga e vuravura."

¹³Sa tukuna mai o Keni vei Jiova, "Na kequ i totogi sa rui levu sara ka sa rui bibi!

¹⁴"Sa dina sara, o ni sa vakasavi au ena siga oqo mai na Matamuni; au na tamata sevaki ka dauveitosoyaki tu ga e vuravura, ena yaco na tamata kecega sa raici au ena via vakamatei au."

¹⁵Sa tukuna vua o Jiova, "O koya sa vakamatei Keni, ena vakasukai vua me vakavitu tale." O Jiova sa vakatakilakilataki Keni, de qai dua e kunei koya ka vakamatea.

¹⁶Sa lako tani o Keni mai na mata i Jiova, ka la'ki tiko ena vanua o Noti, ena ra kei Iteni.

¹⁷Sa curu vei watina o Keni, ka sa kunekune sara o watina, ka qai vakasucumi Inoke. Sa tara sara e dua na koro o Keni ka vakayacana na koro o ya vei luvena ga”o Inoke.

¹⁸Mai vei Inoke, sa basika mai kina o Irati, o Meujaeli, o Lemeki mai vei Metuisela.

¹⁹O Lemeki sa rua na watina, e dua o Ada kei na kena i karua o Sila.

²⁰O Ada sa vakasucumi Jabali, o koya oqo na tamadra na dau vakavale laca tuga ka ra dau susu manumanu talega.

²¹Na tacina o Jubali. O koya oqo na tamadra na dauvakatagi api kei na bitu uvuci.

²²Vei Sila sa sucu kina o Tubale-Keni na kena dau ni matai ni varasa kei na kaukamea. Sa dua na gane i Tubale-Keni, na yacana o Naema.

²³Sa tukuna o Lemeki vei rau na watina, "Kemudrau o Ada kei Sila, drau rogoci au na wati Lemeki, drau rogoca na domoqu! Au sa vakamatea e dua na tamata ni a vakamavoataki au, io, e dua na cauravou ni a vakararawataki au.

²⁴Kevaka sa saumi vei Keni me vakavitu, vei Lemeki me vakavitusagavulu na vitu."

²⁵Sa curumi watina tale o Atama, ka sa vakasucuma vua e dua na gone e tagane, ka sa vakayacani koya me o Seci, "Ni o Jiova na Kalou sa solia tale vei au e dua mei sosomi kei Epeli, o koya sa vakamatea o Keni."

²⁶Mai vei Seci, sa vakasucumi vua e dua na gone ka tagane na yacana o Inosi. Oqo na vanua sa vakatekivu kina vei ira na tamata me ra kaciva kina na yaca i Jiova.